ନୂଆଦିଲ୍ଳୀ: ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କୁ କୋର୍ଟରୁ ଆଶ୍ବସ୍ତି ମିଳିନାହିଁ । ଦିଲ୍ଲୀର ରାଉଜ ଆଭେନ୍ୟୁ କୋର୍ଟ ତାଙ୍କର ଜାମିନ ଆବେଦନ ଉପରେ ଏପ୍ରିଲ ୨୦ରେ ଶୁଣାଣି କରିବେ । ଏହା ପୂର୍ବରୁ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ଜେଲ ଅବଧି ଏପ୍ରିଲ ୨୩ ଯାଏଁ ବଢ଼ାଇଥିଲେ ରାଉଜ ଆଭେନ୍ୟୁ କୋର୍ଟ । ଆଜି କେଜ୍ରିଓ୍ବାଲଙ୍କୁ ଭିଡିଓ କନଫରେନ୍ସିଂ ମାଧ୍ୟମରେ କୋର୍ଟରେ ହାଜର କରାଯାଇଥିଲା ।
ସିସୋଦିଆଙ୍କୁ ୨୦୨୩ ଫେବୃଆରୀ ୨୬ରେ ଗିରଫ କରିଥିଲା ସିବିଆଇ । ପରେ ତାଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ମଧ୍ୟ ଗିରଫ କରିଥିଲା । ଜାମିନ ଲାଗି ସିସୋଦିଆ ହାଇକୋର୍ଟ ଏବଂ ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିବା ବେଳେ ତାଙ୍କୁ ଆଶ୍ବସ୍ତି ମିଳିପାରି ନାହିଁ । ମନୀଷ ସିସୋଦିଆ ଲୋକସଭା ନିର୍ବାଚନ ପ୍ରଚାରରେ ସାମିଲ ହେବାକୁ ଜାମିନ ଆବେଦନ କରିଛନ୍ତି । ଏହି ଆବେଦନ ଉପରେ ଏପ୍ରିଲ ୨୦ରେ ଶୁଣାଣି ହେବ ।
ଦେଶରେ ପ୍ରଥମ ଚରଣର ନିର୍ବାଚନ ଏପ୍ରିଲ ୧୯ରେ ହେବାକୁ ଯାଉଛି । ଦିଲ୍ଲୀରେ ମେ’ ୨୫ରେ ଲୋକସଭାର ସବୁ ୭ଟି ଆସନରେ ନିର୍ବାଚନ ହେବ । ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିଓ୍ବାଲଙ୍କ ପରେ ସିସୋଦିଆ ଦ୍ବିତୀୟ କ୍ଷମତା କେନ୍ଦ୍ର ବୋଲି କୁହାଯାଏ । ଏକଦା ସେ ଦିଲ୍ଲୀର ଶିକ୍ଷା ମନ୍ତ୍ରୀ ସାଙ୍ଗକୁ ଉପମୁଖ୍ୟମନ୍ତ୍ରୀ ଥିଲେ । ଗିରଫ ହେବା ପରେ ସେ ନିଜ ପଦରୁ ଇସ୍ତଫା ଦେଇଥିଲେ । ଆଉ ଏବେ ଉଭୟ କେଜ୍ରିଓ୍ବାଲ ଏବଂ ସିସୋଦିଆ ଜେଲରେ ଅଛନ୍ତି ।