ମୟୂରଭଞ୍ଜ/ରାଇରଙ୍ଗପୁର, ୨୩/୧୧ : ବିଧବା ମହିଳାଙ୍କୁ ଦୁଷ୍କର୍ମ ପରେ ଜଙ୍ଗଲରେ ମାରି ଫୋପାଡିଦେଲେ ଦୁର୍ବୃତ୍ତ। ମୟୂରଭଞ୍ଜ ଜିଲ୍ଲା ଜାମଦା ଥାନା ଅନ୍ତର୍ଗତ ବୁଢ଼େଇରଣା ଜଙ୍ଗଲରୁ ନିଖୋଜ ଥିବା ବିଧବା ମହିଳାଙ୍କ ମୃତଦେହ ଉଦ୍ଧାର ହୋଇଛି। ମହିଳା ଜଣଙ୍କ ଗତ ୧୦ ତାରିଖରୁ ନିଖୋଜ ଥିବା ସୂଚନା ମିଳିଛି। ପୋଲିସ ମୃତଦେହ ଜବତ କରି ତଦନ୍ତ ଚଳାଇଛି।

ସୂଚନାନୁଯାୟୀ, ତୋପଇ ମହାନ୍ତ(୪୫ ବର୍ଷ) ନିଖୋଜ ଥିବା ନେଇ ଗତ ୧୧ତାରିଖ ଦିନ ପୁଅ ଜାମଦା ଥାନାରେ ଅଭିଯୋଗ କରିଥିଲେ। ବୁଧବାର ସନ୍ଧ୍ୟାରେ ବୁଢ଼େଇରଣା ଜଙ୍ଗଲକୁ ଜଣେ ଲୋକ ଆସିଥିବା ବେଳେ ଦୁର୍ଗନ୍ଧ ବାରି ପୋଲିସକୁ ଖବର ଦେଇଥିଲେ। ଆଜି ସକାଳୁ ଖବର ପ୍ରଚାରିତ ହେବାପରେ ଜାମଦା ପୋଲିସ,ଏସଡିପିଓ ରାଇରଙ୍ଗପୁର ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଛନ୍ତି। ମହିଳାଙ୍କୁ ଦୁଷ୍କର୍ମ ପରେ ପଥରରେ ଛେଚି ହତ୍ୟା କରାଯାଇଥିବା ଅନୁମାନ କରାଯାଉଛି। ମହିଳାଙ୍କ ବସ୍ତ୍ର ଗୁଡ଼ିକ ଏଣେତେଣେ ପଡ଼ିଥିବାରୁ ଦୁଷ୍କର୍ମ ହୋଇଥିବା ଅନୁମାନ କରାଯାଉଛି।

ଘଟଣା ସ୍ଥଳରୁ ଜଣେ ପୁରୁଷ ଲୋକଙ୍କର ଚପଲ ମିଳିଛି। ଖୁବ୍ ଶୀଘ୍ର ଦୋଷୀକୁ ଧରି ଉଚିତ୍ ଦଣ୍ଡ ଦିଆଯାଉବୋଲି ପୁଅ ବାପୁନ ମହାନ୍ତ ଦାବି କରିଛନ୍ତି। ତଦନ୍ତ ପରେ ସବୁକିଛି ସ୍ପଷ୍ଟ ହେବ ବୋଲି ପୋଲିସ କହିଛି।