ଭୁବନେଶ୍ୱର,୨୯/୦୯(ସ୍ମୃତିରଞ୍ଜନ ବିଶ୍ୱାଳ): ବିଧାୟକ ଓ ଅଫିସରଙ୍କ ପାଇଁ ତିଆରି ଚାଲିଛି ସମ୍ଭ୍ରାନ୍ତ କୋଠା । ଏଥିରେ ଅତ୍ୟାଧୁନିକ ସୁବିଧାସୁଯୋଗ ରହିବ । ଏହାର ହାଇଟେକ୍ ଡିଜାଇନ୍ ଦେଖିଲେ ଆଖି ଝଲସି ଯିବ । ରାଜଧାନୀର ଯେ କୌଣସି ବିଳାସପୂର୍ଣ୍ଣ ଫ୍ଲାଟ୍ ଏହା ଆଗରେ ଫିକା ପଡ଼ିଯିବ । ପ୍ରାୟ ୪ ହଜାର ବର୍ଗଫୁଟର ବିଶାଳ ଫ୍ଲାଟ୍ରେ ସବୁ ସୁବିଧା ଖଞ୍ଜି ଦିଆଯିବ । ୭ଟି ବେଡ୍ରୁମ, ସ୍ୱତନ୍ତ୍ର ଅଫିସ, ଭିଜିଟର ରୁମ୍, ଲବି ଓ ସହାୟକଙ୍କ ପାଇଁ ଅଲଗା ରୁମ୍ ରହିବ । ଏମ୍ଏଲ୍ଏ କ୍ୱାର୍ଟର୍ସ କମ୍ପେ୍ଲକ୍ସ ପରିସରରେ କ୍ଲବ ହାଉସ୍ଠାରୁ ନେଇ ଟେନିସ୍ କୋର୍ଟ, ବ୍ୟାଡମିଣ୍ଟନ କୋର୍ଟ, ଭିଆଇପି ଗେଷ୍ଟହାଉସ୍, କାଫେ, ଡାକ୍ତରଖାନା, ପୁଲିସ ଆଉଟ୍ପୋଷ୍ଟ ଭଳି ସୁବିଧା ରହିବ ।
ୟୁନିଟ୍-୪ ଏମ୍ଏଲଏ କଲୋନି ସ୍ଥାନରେ ଏହି ସମ୍ଭ୍ରାନ୍ତ ଅଟ୍ଟାଳିକା ତିଆରି ଚାଲିଛି । ମୋଟ ୧୭ ଏକର ଜାଗାରେ ୬ଟି ନଭଶ୍ଚୁମ୍ବୀ ଟାୱାର ଛିଡ଼ା ହେବ । ଏଥିପାଇଁ ଓଡ଼ିଶା ସେତୁ ଓ ନିର୍ମାଣ ନିଗମ(ଓବିସିସି) କୁ ତଦାରଖ ଦାୟିତ୍ୱ ଦିଆଯାଇଛି । ମୁମ୍ବାଇର କେଇସି ଇଣ୍ଟରନ୍ୟାସନାଲ ଲିମିଟେଡ୍ ଏହି ମେଗା ପ୍ରକଳ୍ପର ନିର୍ମାଣ ଟେଣ୍ଡର ନେଇଛି । ଏବେସୁଦ୍ଧା ମାତ୍ର ୧୦% କାମ ଆଗେଇଛି । ରାଜ୍ୟରେ ନୂଆ ସରକାର ଆସିବା ପରେ ଏହି ପ୍ରକଳ୍ପକୁ ଅଧିକ ଫୋକସ୍ କରୁଛନ୍ତି । ୨୦୨୫ ଡିସେମ୍ବର ସୁଦ୍ଧା ପ୍ରକଳ୍ପ ସାରି ବିଧାୟକ ଓ ବରିଷ୍ଠ ଅଫିସରଙ୍କୁ କ୍ୱାର୍ଟର୍ସ ହସ୍ତାନ୍ତର କରିବାକୁ ଯୋଜନା ହୋଇଛି । ଏବେ ବିଧାୟକ ଓ ବରିଷ୍ଠ ଅଫିସରମାନେ ଟାଇପ୍-୬ ଓ ଟାଇପ୍-୭ କ୍ୱାର୍ଟର୍ସରେ ରହୁଛନ୍ତି । ଏ ସବୁ ସହରର ଭିନ୍ନ ଭିନ୍ନ ସ୍ଥାନରେ ଥିବା ବେଳେ ଏଥିପାଇଁ ଏକର ଏକର ସରକାରୀ ଜାଗା ବ୍ୟବହାର ହେଉଛି । ବିକାଶମୂଳକ କାମ ପାଇଁ ରାଜଧାନୀରେ ସରକାରୀ ଜାଗାର ଅଭାବ ସୃଷ୍ଟି ହେଉଛି ।
ଏହି ପ୍ରକଳ୍ପ ସମ୍ପୂର୍ଣ୍ଣ ହେଲେ ବିଧାୟକ ଓ ଅଫିସରଙ୍କ ପାଇଁ ରହିଥିବା କ୍ୱାର୍ଟର୍ସକୁ ଖାଲି କରି ଅନ୍ୟ କାମରେ ଲଗାଇବାକୁ ସରକାର ଯୋଜନା କରିଛନ୍ତି । ଏହି ପ୍ରକଳ୍ପର ଡିଜାଇନ୍ ଅନୁସାରେ, ୧୭ ଏକର ଜାଗାରେ ମୋଟ ୬ଟି ଟାୱାର ଛିଡ଼ା ହେବ । ୧୦୫ଟି ଟାଇପ୍-୭ ଓ ୧୯୫ଟି ଟାଇପ୍-୬ କ୍ୱାର୍ଟର୍ସ ତିଆରି ହେବ । ୧୦୫ଟି ଟାଇପ୍-୭ କ୍ୱାର୍ଟର୍ସକୁ ଗ୍ରୁପ୍-ଏ ରେସିଡେନ୍ସିଆଲ କୁହାଯିବ । ଏଥିରେ ବରିଷ୍ଠ ବିଧାୟକ ରହିବେ । ୬ଟି ଟାୱାରରୁ ଦୁଇଟି ଟାୱାରରେ ସବୁ ଟାଇପ୍-୭ କ୍ୱାର୍ଟର୍ସ ରହିବ । ଏହାକୁ ୯ ମହଲା ବିଶିଷ୍ଟ କରାଯିବ । ପାର୍କିଂ ପାଇଁ ଦୁଇଟି ବେସ୍ମେଣ୍ଟ ରହିବ । ଟାୱାର୧ରେ ମୋଟ ୫୩ଟି ଟାଇପ୍-୭ କ୍ୱାର୍ଟର୍ସ ରହିବ । ଟାୱାର-୨ରେ ୫୨ଟି ଟାଇପ୍-୭ କ୍ୱାର୍ଟର୍ସ ରହିବ । ପ୍ରତି ଟାୱାରରେ ୬ଟି ଲିଫ୍ଟ ରହିବ ।
ବାକି ୪ଟି ଟାୱାରରେ ଟାଇପ୍-୬ କ୍ୱାର୍ଟର୍ସ ରହିବ । ଏହି ବ୍ଲକ୍ର ଟାୱାର-୧ରେ ୫୨ଟି କ୍ୱାର୍ଟର୍ସ ରହିବ । ଟାୱାର-୨ରେ ୫୨ଟି, ଟାୱାର-୩ରେ ୪୬ଟି ଓ ଟାୱାର-୪ରେ ୪୫ଟି କ୍ୱାର୍ଟର୍ସ ତିଆରି ହେବ । ଏହାର ପ୍ରତି ଟାୱାରରେ ୪ଟି ଲିଫ୍ଟ ରହିବ । ୬ଟି ଟାୱାରର ଡିଜାଇନ୍ ସମ୍ପୂର୍ଣ୍ଣ ସମାନ(ୟୁନିଫର୍ମ) ରହିବ । ୬ଟି ଯାକ ଟାୱାର ଧଳା ଓ ବ୍ରାଉନ୍ ରଙ୍ଗରେ ଚମକିବ । ବିଲ୍ଡିଂର ବାଲକୋନିରେ ଅର୍ଣ୍ଣାମେଣ୍ଟାଲ ଟ୍ରି ଲଗାଯିବ । ଏଥିରେ ଦୁଇଟି କ୍ଲବ୍ ହାଉସ୍, ୩ଟି ଡିସ୍ପେନସାରୀ, ଭିଆଇପି ଗେଷ୍ଟହାଉସ୍, ପୁଲିସ ଆଉଟପୋଷ୍ଟ ମଧ୍ୟ ରହିବ । ଶିଶୁଙ୍କ ପାଇଁ ପାର୍କ ଓ ଏକ ବଡ଼ ପାର୍କ ରହିବ । ବିସ୍ତୀର୍ଣ୍ଣ ଲ୍ୟାଣ୍ଡସ୍କେପ୍ ଓ ଗ୍ରୀନ୍ ଏରିଆ ରହିବ । ଏମଏଲଏ କମ୍ପେ୍ଲକ୍ସ ପାଚେରିକୁ ଲାଗି ସବୁଜିମା ସୃଷ୍ଟି କରାଯିବ । ଏହାର ନିର୍ମାଣ କାମ ଜୋରସୋରରେ ଚାଲିଛି । ବାଚସ୍ପତି ସୁରମା ପାଢ଼ୀ ନିୟମିତ ପ୍ରକଳ୍ପର ସମୀକ୍ଷା ବି କରୁଛନ୍ତି । ପ୍ରତି ୧୫ଦିନରେ ନିର୍ମାଣ ଅଗ୍ରଗତିର ସମୀକ୍ଷା ହେଉଛି । ଏହାକୁ ସର୍ବୋତ୍ତମ କରିବାକୁ ଆମେ ପ୍ରୟାସ କରୁଛୁ ବୋଲି ଓବିସିସିର ଜଣେ ବରିଷ୍ଠ ଅଧିକାରୀ କହିଛନ୍ତି ।
୧୦୫ଟି ଟାଇପ୍-୭ କ୍ୱାର୍ଟର୍ସ
୧୦୫ଟି ଟାଇପ୍-୭ କ୍ୱାର୍ଟର୍ସ ରହିବ । ଏଥିରେ ମୋଟ ଦୁଇଟି ବ୍ଲକ୍/ ଟାୱାର୍ ରହିବ । ଟାୱାର୍-୧ରେ ୫୩ଟି କ୍ୱାର୍ଟର୍ସ ତିଆରି ହେବ । ଟାୱାର୍-୨ରେ ୫୨ଟି କ୍ୱାର୍ଟର୍ସ ରହିବ । ପ୍ରତି ଟାୱାରକୁ ୯ ମହଲା ବିଶିଷ୍ଟ କରାଯିବ । ଦୁଇଟି ବେସ୍ମେଣ୍ଟ ପାର୍କିଂରେ ୨୧୪ଟି ଗାଡ଼ି ପାର୍କିଂ ହୋଇପାରିବ । ଏହାକୁ ଛାଡ଼ି ଆଉ କିଛି ଗାଡ଼ି ପାର୍କିଂ ହେବା ଭଳି ବ୍ୟବସ୍ଥା ରହିବ । ପ୍ରତି ଟାୱାରରେ ୫ଟି ପାସେଞ୍ଜର ଲିଫ୍ଟ ରଖାଯିବ । ସେହିଭଳି ବିଭିନ୍ନ ଉପକରଣ ନେବାକୁ ଗୋଟିଏ ଷ୍ଟ୍ରେଚର୍ ଲିଫ୍ଟ ରହିବ । ଲିଫ୍ଟ ଓ ସିଡ଼ିକୁ ବିଡିଏ ଓ ଏନ୍ବିସି ଗାଇଡଲାଇନ୍ ହିସାବରେ ତିଆରି କରାଯାଉଛି । ଏଥିରେ ୨୩୦ ବର୍ଗଫୁଟ ବିଶିଷ୍ଟ ଗୋଟିଏ ବିରାଟ ମାଷ୍ଟର ବେଡରୁମ୍ ରହିବ । ଏହାକୁ ଛାଡ଼ି ଆଉ ୬ଟି ବେଡ୍ରୁମ ରହିବ । ଅତିଥିଙ୍କ ପାଇଁ ଟଏଲେଟ୍, ସହାୟକଙ୍କ ପାଇଁ ରୁମ୍, ଅଫିସ୍, ଲବି, ବିଧାୟକଙ୍କୁ ଦେଖା କରିବାକୁ ଆସୁଥିବା ଲୋକଙ୍କ ପାଇଁ ସ୍ୱତନ୍ତ୍ର ରୁମ୍ ଓ ଡାଇନିଂ ରହିବ ।
୧୯୫ଟି ଟାଇପ୍-୬ କ୍ୱାର୍ଟର୍ସ
୧୯୫ଟି ଟାଇପ୍-୬ କ୍ୱାର୍ଟର୍ସ ତିଆରି ହେବ । ଏଥିରେ ୪ଟି ବ୍ଲକ୍/ଟାୱାର୍ ରଖାଯାଉଛି । ଟାୱାର-୧ରେ ୫୨ଟି କ୍ୱାର୍ଟର୍ସ ରହିବ । ଟାୱାର-୨ରେ ୫୨, ଟାୱାର-୩ରେ ୪୬, ଟାୱାର-୪ରେ ୪୫ଟି କ୍ୱାର୍ଟର୍ସ ତିଆରି ହେବ । ପ୍ରତି ଟାୱାରରେ ୩ଟି ପାସେଞ୍ଜର ଲିଫ୍ଟ ଓ ଗୋଟିଏ ଷ୍ଟ୍ରେଚର ଲିଫ୍ଟ ରହିବ । ପ୍ରତିଟି ଟାୱାରରେ ଦୁଇଟି ବେସ୍ମେଣ୍ଟ ରହିବ । ଏଠାରେ ମୋଟ ୩୯୦ଟି କାର୍ ପାର୍କିଂ ହୋଇପାରିବ । ଟାଇପ୍-୬ କ୍ୱାର୍ଟର୍ସର ଏରିଆ ୨୭୫୫ ବର୍ଗଫୁଟ ଅଞ୍ଚଳ ରହିଛି । ଏଥିରେ ମୋଟ ୪ଟି ବେଡରୁମ୍ ରହିଛି । ୫୩୮ ବର୍ଗଫୁଟ ଅଞ୍ଚଳର ଏକ ବିରାଟ ଲିଭିଂ କମ୍ ଡାଇନିଂ ରୁମ୍ ରଖାଯାଇଛି ।
ଏସି କ୍ଲବ୍ ହାଉସ୍
ଏବେ ଯେଉଁ ବିଧାନସଭା ଅତିଥି ଭବନ ଅଛି ତାକୁ ଭଙ୍ଗାଯିବନି । ଏହାକୁ ନବୀକରଣ କରାଯିବ । ଏହାବାଦ୍ ଆଉ ଏକ ଭିଆଇପି ଗେଷ୍ଟହାଉସ୍ କରାଯିବ । ଏହାକୁ ଲାଗି କ୍ଲବ୍ ହାଉସ ତିଆରି କରାଯିବ । ଏହା ଭିତରକୁ ଯିବାକୁ ସ୍ୱତନ୍ତ୍ର ଫାଟକ ରହିବ । କ୍ଲବ୍ ହାଉସରେ ୫୦୦ ଲୋକଙ୍କ କ୍ଷମତା ବିଶିଷ୍ଟ ଦୁଇଟି ହଲ୍ ରହିବ । ଏହାକୁ ସେଣ୍ଟ୍ରାଲ ଏସି କରାଯିବ । ସେହିଭଳି ଏହା ପରିସରରେ ପୁରୁଷ ଓ ମହିଳାଙ୍କ ପାଇଁ ପାର୍ଲର, କାଫେ, ରେଷ୍ଟୁରାଣ୍ଟ, ପୁଲିସ ଆଉଟପୋଷ୍ଟ୍ ଓ ଅନ୍ୟ ଦୋକାନ ରହିବ ।
ଗ୍ରୁପ୍-ଏ ଆବାସିକ ଟାୱାରରେ ବରିଷ୍ଠ ବିଧାୟକ
ଟାଇପ-୭ କ୍ୱାର୍ଟର୍ସ ବରିଷ୍ଠ ବିଧାୟକଙ୍କୁ ଆବଣ୍ଟନ କରାଯିବ । ଏହାକୁ ଗ୍ରୁପ୍-ଏ ଆବାସିକ ଟାୱାର କୁହାଯାଉଛି । ଏଭଳି ଦୁଇଟି ଟାୱାର ରହିବ । ଗୋଟିଏ ଟାୱାରରେ କିଛି ମନ୍ତ୍ରୀଙ୍କୁ ମଧ୍ୟ କ୍ୱାର୍ଟର୍ସ ଦିଆଯାଇପାରେ । ସେହିଭଳି ଟାଇପ୍-୬ କ୍ୱାର୍ଟର୍ସକୁ ବରିଷ୍ଠ ଆଇଏଏସ୍ ଓ ଆଇପିଏସ୍ ଅଧିକାରୀଙ୍କୁ ଦିଆଯିବ । ନବନିର୍ବାଚିତ ବିଧାୟକ ମଧ୍ୟ ଏଠାରେ ରହିବେ ।
ମୋଟ ୪ଟି ମୁଖ୍ୟ ଫାଟକ ରହିବ
ଏମଏଲଏ କ୍ୱାର୍ଟର୍ସ କମ୍ପେ୍ଲକ୍ସର ୪ଟି ମୁଖ୍ୟ ଫାଟକ ରହିବ । କମିଶନରେଟ ପୁଲିସ ବିଲ୍ଡିଂ ଅପରପାଶ୍ୱର୍ରେ ଟାଇପ୍-୭ କ୍ୱାର୍ଟର୍ସର ଦୁଇଟି ଟାୱାର ଛିଡ଼ା ହେବ । ଲୋକସମ୍ପର୍କ ଭବନ ଅପରପାଶ୍ୱର୍ରେ ଟାଇପ୍-୬ କ୍ୱାର୍ଟର୍ସର ଦୁଇଟି ଟାୱାର ରହିବ । କୃଷି ଭବନ ଓ ରାଜ୍ୟ ଅତିଥି ଭବନ ଅପରପାଶ୍ୱର୍ରେ ଆଉ ଦୁଇଟି ଟାଇପ୍-୬ କ୍ୱାର୍ଟର୍ସର ଟାୱାର ଛିଡ଼ା ହେବ ।
ହୋମିଓପାଥି ଓ ଆର୍ୟୁବେଦ ଡିସ୍ପେନସାରୀ
କ୍ଲବ୍ ହାଉସକୁ ଲାଗି ସ୍ୱତନ୍ତ୍ର ଡିସପେନସାରୀ(ଏଲୋପାଥିକ୍) ରହିବ । ଏହାଛଡ଼ା ଆର୍ୟୁବେଦିକ୍ ଓ ହୋମିଓପାଥି ଡିସପେନସାରୀ ବି ରହିବ। ଡାକ୍ତରଙ୍କ ପାଇଁ ସ୍ୱତନ୍ତ୍ର ରୁମ୍ ସହିତ ଅନ୍ୟ ଆନୁସଙ୍ଗିକ ସୁବିଧା ରହିବ ।
ଅତ୍ୟାଧୁନିକ ସ୍ପୋର୍ଟସ୍ କମ୍ପେ୍ଲକ୍ସ
କ୍ଲବ୍ ହାଉସ୍ ଭିତରେ ସ୍ୱତନ୍ତ୍ର ସ୍ପୋର୍ଟସ୍ କମ୍ପେ୍ଲକ୍ସ ରହିବ । ଏଥିରେ ଟେନିସ ଓ ବ୍ୟାଡ୍ମିଣ୍ଟନ କୋର୍ଟ ରହିବ । ଅନ୍ୟ ଖେଳର ସୁବିଧା ମଧ୍ୟ ରହିବ । ଶିଶୁଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା ହେବ ।
ବଳି ପଡ଼ିଥିଲା ୧୦୦୦ ଗଛ
ପ୍ରସ୍ତାବିତ ଏହି ଏମ୍ଏଲଏଲ କ୍ୱାର୍ଟର୍ସ ପ୍ରକଳ୍ପ ପାଇଁ ୧୦୦୦ଟି ବିଶାଳ ଗଛ ବଳି ପଡ଼ିଥିଲା । ଏମଏଲଏ କଲୋନୀରେ ଥିବା ଏହି ଗଛକୁ ଓଏଫଡିସି ତରବରିଆ ଭାବେ କାଟି ଚାଲିଥିଲା । ପ୍ରମେୟରେ ଏ ସମ୍ପର୍କରେ ରିପୋର୍ଟ ପ୍ରକାଶ ପରେ ତମ୍ବିତୋଫାନ ହୋଇଥିଲା । ହାଇକୋର୍ଟରେ ମାମଲା ରୁଜୁ ହୋଇଥିଲା । ହାଇକୋର୍ଟଙ୍କ ତାଗିଦ୍ ପରେ ଗଛଗୁଡ଼ିକୁ ଅନ୍ୟତ୍ର ସ୍ଥାନାନ୍ତର କରି ପୁନଃରୋପଣ ପାଇଁ ବନବିଭାଗ ଯୋଜନା କରିଥିଲା । କଟା ଯାଇଥିବା ଗଛର କ୍ଷତିପୂରଣ ବାବଦରେ ପ୍ରାୟ ୬୨ଲକ୍ଷ ଟଙ୍କା ବନବିଭାଗ ପାଖରେ ଜମା କରିଥିଲା ଓବିସିସି ।
