ନୂଆଦିଲ୍ଲୀ : ନରେନ୍ଦ୍ର ମୋଦି ସରକାରଙ୍କ ୩ୟ କାର୍ଯ୍ୟକାଳର ସବୁଠୁ ବଡ଼ ଯୋଜନା ‘ଗୋଟିଏ ଦେଶ ,ଗୋଟିଏ ନିର୍ବାଚନ’କୁ ନୀତୀଶ କୁମାରଙ୍କ ପାର୍ଟି ଜେଡିୟୁ ସମର୍ଥନ କରିଛି। ଜେଡିୟୁ ସୋମବାର ମୋଦିଙ୍କ ପ୍ଲାନକୁ ସମର୍ଥନ କରି କହିଛନ୍ତି , ଏଥିରେ ନୀତି ଗୁଡ଼ିକର ନିରନ୍ତରତା ଜାରି ରହିବ , ତଥା ବାରମ୍ୱାର ନିର୍ବାଚନ ହେବାର ସମସ୍ୟାକୁ ମଧ୍ୟ ଦୂର କରାଯାଇ ପାରିବ। ବର୍ତ୍ତମାନର ଲୋକସଭାରେ ରାଷ୍ଟ୍ରୀୟ ଗଣତାନ୍ତ୍ରିକ ଗଠବନ୍ଧନ (ଏନଡିଏ)ର ପ୍ରମୁଖ ସହଯୋଗୀ ଜେଡେୟୁର ଏହି ବୟାନ ଏମିତି ସମୟରେ ଆସିଛି, ଯେବେ କେନ୍ଦ୍ର ସରକାରଙ୍କ ସୂତ୍ରରୁ ରବିବାର କୁହାଯାଇଥିଲା କି , ଭାରତୀୟ ଜନତା ପାର୍ଟି (ବିଜେପି) ପରିଚାଳିତ ସରକାର ଏହି କାର୍ଯ୍ୟକାଳରେ ହିଁ ଗୋଟିଏ ଦେଶ, ଗୋଟିଏ ନିର୍ବାଚନ କୁ ଲାଗୁ କରିବ। ସୂତ୍ର ଭରସା ଦେଇଥିଲା ଯେ ଏହାକୁ ସବୁ ଦଳର ସମର୍ଥନ ମିଳିବ।
ଜେଡିୟୁର ରାଷ୍ଟ୍ରୀୟ ପ୍ରବକ୍ତା ରାଜିବ ରଞ୍ଜନ ପ୍ରସାଦ ଏକ ଭିଡ଼ିଓ ଜାରି କରି କହିଛନ୍ତି, ଗୋଟିଏ ଦେଶ, ଗୋଟିଏ ନିର୍ବାଚନ ଉପରେ ତାଙ୍କର ପାର୍ଟି ଓ ଏନଡିଏର ରାୟ ଗୋଟିଏ ରହିଛି। ସେ କହିଛନ୍ତି , ଆମେ ଜାଣିଛୁ କି, ଏଥିରେ ଦେଶରେ ନୀତି ଗୁଡିକର ନିରନ୍ତରତା ଜାରି ରହିବ। ବାରମ୍ୱାର ହେବାକୁ ଥିବା ନିର୍ବାଚନରେ ବିକାଶର ଯୋଜନାର ଗତି ଅବରୁଦ୍ଧ ହୋଇଥାଏ ଏବଂ ଅନ୍ୟ ସବୁ ସମସ୍ୟା ମଧ୍ୟ ଆସିଥାଏ। ଏଥିରୁ ମୁକ୍ତି ମିଳିବ।
ଜେଡିୟୁ ପ୍ରବକ୍ତା କହିଛନ୍ତି , ଏଥିରେ ମତଦାତା ବହୁ ସଂଖ୍ୟାରେ ମତଦାନ କେନ୍ଦ୍ରକୁ ଆସିବେ ଏବଂ ବିକାଶ କାର୍ଯ୍ୟ ମଧ୍ୟ ଖୁବ୍ ଜୋରରେ ଆଗେଇବ। ସେ କହିଛନ୍ତି , ବିକାଶ ଯୋଜନାକୁ ନେଇ କେନ୍ଦ୍ର ସରକାରଙ୍କ ଯେଉଁ ନିଷ୍ପତ୍ତି ରହିଛି , ଏହାର କ୍ରିୟାନ୍ୱୟନ ଏହାପରେ ଭଲ ଉପାୟରେ କରାଯାଇ ପାରିବ। ବିଜେପି ବ୍ୟତୀତ ତେଲୁଗୁ ଦେଶମ ପାର୍ଟି ( ଟିଡିପି) ପରେ ଜେଡ଼ିୟୁ ଏନଡିଏର ୩ୟ ସବୁଠୁ ବଡ଼ ଦଳ।
ପ୍ରଧାନମନ୍ତ୍ରୀ ମୋଦି ମଧ୍ୟ ଗୋଟିଏ ଦେଶ ଗୋଟିଏ ନିର୍ବାଚନକୁ ନେଇ ଜୋରଦାର ଟିପ୍ପଣୀ କରିଛନ୍ତି । ଗତ ମାସରେ ସ୍ୱାଧୀନତା ଦିବସ ଅବସରରେ ଲାଲ୍ କିଲ୍ଲାରୁ ପିଏମ ମୋଦି କହିଥିଲେ, ବାରମ୍ୱାର ନିର୍ବାଚନରେ ଦେଶର ପ୍ରଗତିରେ ବାଧା ଉପୁଜୁଛି। ନିକଟରେ ଶେଷ ହୋଇଥିବା ଲୋକସଭା ନିର୍ବାଚନର ପୂର୍ବରୁ ବିଜେପି ନିର୍ବାଚନ ଘୋଷଣାପତ୍ରରେ ଗୋଟିଏ ଦେଶ , ଗୋଟିଏ ନିର୍ବାଚନକୁ ପ୍ରମୁଖ ପ୍ରତିଶ୍ରୁତି ଭାବେ ସାମିଲ କରିଥିଲା।
