ପ୍ୟାରିସ୍,୦୫/୦୮: ସବୁ ଆଲୋଚନାର ଅନ୍ତ ଘଟାଇ ବିଶ୍ୱ ଚାମ୍ପିଅନ୍ ୟୁଏସଏର ନୋଆ ଲାଇଲ୍ସ ୧୦୦ମିଟର ଦୌଡ଼ ଇଭେଣ୍ଟ୍ରେ ସ୍ୱର୍ଣ୍ଣ ପଦକ ହାସଲ କରିଛନ୍ତି । ସେ ନିର୍ଦ୍ଧାରିତ ଦୂରତାକୁ ୯.୭୯ ସେକେଣ୍ଡରେ ଅତିକ୍ରମ କରିଥିଲେ । ଜାମାଇକାର କିସେନ ଥମ୍ପସନ ମଧ୍ୟ ୯.୭୯ ସେକେଣ୍ଡ୍ରେ ରେସ୍ ଶେଷ କରିଥିଲେ । ମାତ୍ର ବିଜେତା ଘୋଷିତ ହୋଇଥିଲେ ଲାଇଲ୍ସ । କିଛି କ୍ଷଣ ପାଇଁ ଏହା ପଛର ରହସ୍ୟ ବୁଝା ପଡ଼ି ନଥିଲା । ଷ୍ଟାଡିୟମ୍ରେ ଲାଗିଥିବା ବିଶାଳ ସ୍କ୍ରିନ୍ରେ ଲାଇଲ୍ସ ଓ ଥମ୍ପସନ୍ଙ୍କ ରେସ୍ ଟାଇମ୍ ପ୍ରକାଶ ପାଇବା ମାତ୍ରେ ଲାଇଲ୍ସ ବିଜୟ ଉଲ୍ଲାସରେ ଆତ୍ମହରା ହୋଇଯାଇଥିଲେ । ସେ ୯.୭୮୪ ସେକେଣ୍ଡ ଓ ଥମ୍ପସନ ୯.୭୮୯ସେକେଣ୍ଡରେ ରେସ୍ ଶେଷ କରିଥିଲେ । ୟୁଏସଏର ଫ୍ରେଡ୍ କର୍ଲି ୯.୮୧ ସେକେଣ୍ଡ ଟାଇମିଂ ସହ ବ୍ରୋଞ୍ଜ ପଦକ ଜିତିଥିଲେ ।
ଲାଇଲ୍ସଙ୍କ ଏହି ପଦକ ୟୁଏସଏ ପାଇଁ ରହିଥିଲା ସ୍ୱତନ୍ତ୍ର । ୨୦ ବର୍ଷ ପରେ ୟୁଏସଏକୁ ପୁରୁଷ ବର୍ଗ ୧୦୦ମିଟର ଦୌଡ଼ରେ ସ୍ୱର୍ଣ୍ଣ ପଦକ ଫେରିଥିଲା । କେବଳ ସେତିକି ନୁହେଁ, ୟୁଏସଏ ପଦକ ତାଲିକାର ଶୀର୍ଷକୁ ଉନ୍ନୀତ ହୋଇଥିଲା । ୟୁଏସଏ ପାଇଁ ଏହା ଥିଲା ପ୍ୟାରିସ୍ରେ ୧୯ତମ ସ୍ୱର୍ଣ୍ଣ ପଦକ ।
ଲାଇଲ୍ସ ଓ ଥମ୍ପସନଙ୍କ ମଧ୍ୟରେ ସମୟର ବ୍ୟବଧାନ ଅତ୍ୟନ୍ତ କମ୍ ରହିଥିଲା । ୧ ସେକେଣ୍ଡର ୫୦୦୦ଭାଗରୁ ଭାଗେ (୦.୦୦୫) ବ୍ୟବଧାନ ବଳରେ ଲାଇଲ୍ସ ସ୍ୱର୍ଣ୍ଣ ପଦକ ଜିତିଥିଲେ । ପୂର୍ବରୁ ୧୦୦ମିଟର ଦୌଡ଼ ଇତିହାସରେ ଏତେ କମ୍ ସମୟ ବ୍ୟବଧାନରେ ପଦକ ଫଇସଲା ହୋଇ ନଥିଲା ।
ବିଶ୍ୱ ଚାମ୍ପିଅନ୍ ଲାଇଲ୍ସ, ୱାର୍ଲ୍ଡ ଲିଡର ଥମ୍ପସନ୍, ଅବଲିକ୍ ସେଭିଲ୍ ଓ କର୍ଲିଙ୍କ ମଧ୍ୟରେ ଏଥର ସ୍ୱର୍ଣ୍ଣ ପଦକକୁ ନେଇ ତୀବ୍ର ପ୍ରତିଦ୍ୱନ୍ଦ୍ୱିତା ହେବ ବୋଲି ପୂର୍ବାନୁମାନ କରାଯାଉଥିଲା । ସେଭିଲ ଏକମାତ୍ର ପ୍ରତିଯୋଗୀ ଭାବେ ଚଳିତ ବର୍ଷ ଲାଇଲ୍ସଙ୍କୁ ପରାଜିତ କରିଥିଲେ । ମାତ୍ର ସେ ଅନ୍ତିମ ସ୍ଥାନରେ ରହିଥିଲେ । ଶେଷ ଥର ପାଇଁ ୨୦୦୪ ଏଥେନ୍ସ ଅଲିମ୍ପିକ୍ସରେ ଜଷ୍ଟିନ ଗାଟଲିନ୍ (୯.୮୫ସେକେଣ୍ଡ) ସ୍ୱର୍ଣ୍ଣ ପଦକ ହାସଲ କରିଥିଲେ । ଏହାପରେ ୨୦୦୮ ବେଜିଂ, ୨୦୧୨ ଲଣ୍ଡନ ଓ ୨୦୧୬ ରିଓ ଅଲିମ୍ପିକ୍ସରେ ଜାମାଇକାର ୟୁସେନ ବୋଲ୍ଟ ସ୍ୱର୍ଣ୍ଣ ପଦକ ଜିତିଥିଲେ । ଟୋକିଓ ଅଲିମ୍ପିକ୍ସରେ ଇଟାଲୀର ମର୍ସେଲ ଜାକବ୍ସ ସ୍ୱର୍ଣ୍ଣ ପଦକ ହାସଲ କରି ସମସ୍ତଙ୍କୁ ଚକିତ କରିଦେଇଥିଲେ । ଏଥର ସେ ପଞ୍ଚମ ସ୍ଥାନରେ ରହିଥିଲେ ।
ସେମି ଫାଇନାଲ୍ରେ ଥମ୍ପସନ ଦ୍ରୁତତମ ସାବ୍ୟସ୍ତ ହେବା ପରେ ଜାମାଇକାକୁ ପୁନର୍ବାର ସ୍ୱର୍ଣ୍ଣ ପଦକ ଫେରିବ ବୋଲି ଆଶା ଜାଗ୍ରତ ହୋଇଥିଲା । ମାତ୍ର ଲାଇଲ୍ସ ତାଙ୍କ ୩ବର୍ଷ ତଳର ପ୍ରତିଶ୍ରୁତି ରଖିଥିଲେ । ଫାଇନାଲ୍ ରେସ୍ ବେଳକୁ ଷ୍ଟେଡ୍ ଡି ଫ୍ରାନ୍ସରେ ୮୦,୦୦୦ ଦର୍ଶକ ଏକତ୍ରିତ ହୋଇ ସାରିଥିଲେ । ରେସ୍ ଆରମ୍ଭ ହେବା ମାତ୍ରେ ଦର୍ଶକ କୋଳାହଳରେ ଷ୍ଟାଡ଼ିୟମ୍ କମ୍ପିଥିଲା । ଟ୍ରାକ ଉପରେ ୧୦ସେକେଣ୍ଡର ସେହି ଲଢ଼େଇ ଜଣେ ହେଲେ ଦର୍ଶକଙ୍କୁ ବସିବାକୁ ସୁଯୋଗ ଦେଇ ନଥିଲା ।
