ଭୁବନେଶ୍ୱର,୦୨/୦୯: କ୍ୟାପିଟାଲ୍‌  ହସ୍ପିଟାଲ୍‌-ପିଜିଆଇଏମ୍‌ଇଆରରେ ରାଜ୍ୟପାଳ  ରଘୁବର ଦାସଙ୍କ ଅର୍ଶ ଅସ୍ତ୍ରୋପଚାର କରାଯାଇଛି । ଅସ୍ତ୍ରୋପଚାର ପରେ ରାଜଭବନ ଫେରି ଯାଇଛନ୍ତି ଶ୍ରୀ  ଦାସ । ସେଠାରେ ତାଙ୍କର ସ୍ୱାସ୍ଥ୍ୟାବସ୍ଥା ଯାଞ୍ଚ ଲାଗି  ଡାକ୍ତରୀ ଦଳ ନିୟୋଜିତ ଅଛନ୍ତି। ଶ୍ରୀ ଦାସ ରବିବାର  ସକାଳ ୯.୪୦ରେ କ୍ୟାପିଟାଲ ହସ୍ପିଟାଲ୍‌ରେ  ପହଞ୍ଚିଥିଲେ । ସ୍ୱାସ୍ଥ୍ୟ ପରୀକ୍ଷା ପରେ ଅତ୍ୟାଧୁନିକ  ମଡ୍ୟୁଲାର ଓଟିରେ ୧୧.୪୦ ବେଳେ ଅସ୍ତ୍ରୋପଚାର  ଶେଷ ହୋଇଥିଲା । ସନ୍ଧ୍ୟା ୫ଟା ବେଳେ ସେ  ରାଜଭବନ ଫେରିଥିଲେ । ପିଜିଆଇଏମ୍‌ଇଆର ପ୍ରଫେସର ଶ୍ରୀକାନ୍ତ ପାତ୍ର ରାଜ୍ୟପାଳ ଶ୍ରୀ ଦାସଙ୍କ  ଅସ୍ତ୍ରୋପଚାର କରିଛନ୍ତି । ହସ୍ପିଟାଲ୍‌ରେ ତାଙ୍କର  ଅସ୍ତ୍ରୋପଚାର ପାଇଁ ସ୍ୱତନ୍ତ୍ର ଡାକ୍ତରୀ ଦଳ ଗଠିତ  ହୋଇଥିଲେ । ସେଥିରେ ନିଶ୍ଚେତକ ଡାକ୍ତର ଓ  ଭେଷଜ ବିଶେଷଜ୍ଞ ଅଛନ୍ତି । କ୍ୟାପିଟାଲ୍‌ ହସ୍ପିଟାଲ୍‌ରେ  ରାଜ୍ୟପାଳଙ୍କ ଅସ୍ତ୍ରୋପଚାର ହେବା ପ୍ରଥମ ଘଟଣା ।  ସରକାରୀ ଡାକ୍ତରଖାନାରେ ଗୁଣାତ୍ମକ ସ୍ୱାସ୍ଥ୍ୟ ସେବା ଓ  ଅଭିଜ୍ଞ ଡାକ୍ତରଙ୍କ ଉପସ୍ଥିତି ରହିଥିବା ଏହା ସୂଚାଉଛି ।