ଜେରୁସାଲେମ: ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଦେଶରେ ନ୍ୟୁଜ ଚ୍ୟାନେଲ ‘ଅଲ ଜଜୀରା’ର ପ୍ରସାରଣ ଉପରେ ରୋକ ଲଗାଇବାକୁ ନିର୍ଦ୍ଦେଶ ଦେଇଛନ୍ତି । ନେତାନ୍ୟାହୁ ‘ଅଲ ଜଜୀରା’କୁ ଆତଙ୍କବାଦୀ ଚ୍ୟାନେଲ ବୋଲି କହିଥିବା ନେଇ ମିଡିଆ ରିପୋର୍ଟରୁ ଜଣାପଡ଼ିଛି । ସୋମାବର ଇସ୍ରାଏଲ ସଂସଦରେ ଅଲ ଜଜୀରାର ପ୍ରସାରଣ ବନ୍ଦ କରିବାକୁ ନେଇ ଏକ ଆଇନ୍‌ ଆସିଛି । ଏହା ପରେ ଚ୍ୟାନେଲ ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି ଇସ୍ରାଏଲ ସରକାର । 

 ଇସ୍ରାଏଲ ସୁରକ୍ଷାକୁ ପ୍ରଭାବିତ କରିବା, ୭ ଅକ୍ଟୋବରରେ ହମାସ ଆକ୍ରମଣରେ ଅଂଶଗ୍ରହଣ କରିବା ଏବଂ ଇସ୍ରାଏଲ ବିରୋଧରେ ହିଂସା ସୃଷ୍ଟି କରିବା ନେଇ ଅଲ ଜଜୀରା ଉପରେ ଅଭିଯୋଗ କରିଛନ୍ତି ନେତାନ୍ୟାହୁ ସରକାର । ଇସ୍ରାଏଲ ପ୍ରଧାନମନ୍ତ୍ରୀ ନେତାନ୍ୟାହୁ ଏକ୍ସରେ ଲେଖିଛନ୍ତି ଯେ, ଆତଙ୍କବାଦୀ ଚ୍ୟାନେଲ ଅଲ ଜଜୀରା ଏବେ ଇସ୍ରାଏଲରେ ବନ୍ଦ ହେବ ।

 ସୋମବାର ସଂସଦରେ ଏକ ଆଇନ୍‌ ଆସିବା ପରେ ନେତାନ୍ୟାହୁ ଅଲ ଜଜୀରାର ପ୍ରସାରଣ ଉପରେ ରୋକ ଲଗାଇଛନ୍ତି । ଏବେ ଇସ୍ରାଏଲରେ ଅଲ ଜଜୀରା ନିଜର ପ୍ରସାରଣ ବନ୍ଦ କରିବାକୁ ବାଧ୍ୟ ହେବ । ସେପଟେ ହମାସ ସହ ଲଢ଼େଇରେ ଇସ୍ରାଏଲକୁ କମଜୋର କରିବାକୁ ଅଲ ଜଜୀରାର ସାମ୍ବାଦିକଙ୍କ ଭୂମିକା ଉପରେ ବାରମ୍ବାର ପ୍ରଶ୍ନ ଉଠାଇଥିଲେ ନେତାନ୍ୟାହୁ ସରକାର । ଆଉ ଏବେ ନୂଆ ଆଇନ୍‌ ଆସିବା ପରେ ଆତଙ୍କବାଦୀ ଚ୍ୟାନେଲ ବୋଲି ଅଲ-ଜଜୀରାକୁ ଅଭିଯୋଗ କରିଆସିଥିବା ଇସ୍ରାଏଲ ଏହାର ପ୍ରସାରଣ ଉପରେ ରୋକ ଲଗାଇଛି ।