ପୁରୀ,୩୧/୦୫: ଭଉଁରୀରେ ଚକ ଅଖ ସଂଯୁକ୍ତ ହେଲା । ଏବେ ରଥରେ ଚାରି ନାହାକା ଉଠାଇବା ଲକ୍ଷ୍ୟ । ସମସ୍ତ ଚକ ଅଖ ସଂଯୁକ୍ତ ହେଲେ ଦଣ୍ଡା ପଡ଼ି ରଥର ଚାରି ନାହାକା ଉଠିବ । ମୁଖ୍ୟ ବିଶ୍ୱକର୍ମାଙ୍କ ନିର୍ଦ୍ଦେଶରେ ଆଗେଇ ଚାଲିଛି ତିନି ରଥର ନିର୍ମାଣ । ଗୁରୁବାର ସୁଦ୍ଧା ଆପାତତଃ ୨୪ଟି ଚକ ନିର୍ମାଣ ଶେଷ ହୋଇଥିବା ସୂଚନା ରହିଛି । ଗୁରୁବାର ରଥର ନିରାଡ଼ି କାମ ଆରମ୍ଭ ହୋଇଛି । ଧଉରା ଓ ଫାସୀ କାଠକୁ ବାରିସିରେ ହାଣି ନିରାଡ଼ି ପ୍ରସ୍ତୁତ କରୁଛନ୍ତି ବିଶ୍ୱକର୍ମା । କୋଣ ଗୁଜରେ ସିଂହବିରାଳ ମୂର୍ତ୍ତି ଖୋଦେଇରେ ନିମଗ୍ନ ରହିଛନ୍ତି ରୂପକାର। ଏଥିସହ ରେଢାଖୋଲ ଡିଭିଜନ୍ରୁ ରଥ କାଠ ବଡ଼ଦାଣ୍ଡରେ ପହଞ୍ଚିଛି ।
ରଥ ଖଳାରେ ଏବେ ଚକ କାମ ଶେଷ କରିବାକୁ ଯୋର ଦିଆଯାଉଛି । ତାଳଧ୍ୱଜ ରଥ,ଦର୍ପଦଳନ ରଥ ଓ ନନ୍ଦିଘୋଷ ରଥର ମୋଟ ୪୨ ଚକରୁ ୨୪ ଚକ ପ୍ରାୟ ଶେଷ । ସିଙ୍ଗଡ଼ା ବାଡ଼ିଆ କରି ତୁମ୍ବ ସହ ଅର ଯୋଡ଼ି ରଥଖଳାକୁ ବୋହି ନେଉଛନ୍ତି ଭୋଇ ସେବକ । ସେଠାରେ ବିଲେଇ ବାଡ଼ିଆ ପଦ୍ଧତିରେ ଚକ ପ୍ରସ୍ତୁତ ହେଉଛି। ଚକ ମଝିରେ ଥାଇ ଉପଯୁକ୍ତ ନିର୍ଦ୍ଦେଶ ଦେଉଛନ୍ତି ମୁଖ୍ୟ ବିଶ୍ୱକର୍ମା । ଓଝା ସେବକମାନେ ମାପ ଅନୁସାରେ ପନ୍ଦାରି ଓ ବଳା ଯୋଗାଇଦେବାରେ ଚକରେ ସେସବୁ ଫିଟିଂ କରାଯାଉଛି । ତିନି ରଥର ୧ଟି ଲେଖାଏଁ ନାହାକା ଅଖ କାମ ସରିଥିଲା । ଅନ୍ୟ ୧୮ଟି ଅଖ ତିଆରି ପାଇଁ ଚାଲିଛି ପ୍ରସ୍ତୁତି ।
ଗୁରୁବାର ରଥର ନିରାଡ଼ି କାର୍ଯ୍ୟ ଆରମ୍ଭ ହୋଇଛି । ପ୍ରତି ରଥର ୪ଟି କରି ନିରାଡ଼ି କାର୍ଯ୍ୟ ଜାରି ରଖିଛନ୍ତି ବିଶ୍ୱକର୍ମା । ଏପଟେ କୋଣଗୁଜରେ ରୂପ ଖୋଦନରେ ନିମଗ୍ନ ରହିଛନ୍ତି ରୂପକାର ସେବକ। ଗୁଜରେ ସିଂହ ବିରାଳ ମୂର୍ତ୍ତି ଶୋଭାପାଉଛି । ବିଶ୍ୱକର୍ମାମାନେ ଧଉରା କାଠ ଚଉପଟ କରି ଯୋଗାଉଛନ୍ତି । ଦୋଳବେଦି ଅସ୍ଥାୟୀ କମାର ଶାଳରେ ଓଝା ସେବକମାନେ ଲୁହା ସାମଗ୍ରୀ ନିର୍ମାଣ କରୁଛନ୍ତି।