ତିହିଡ଼ି,୧୪/୦୯: ତିନିମାସ ତଳେ ଭୋଟ ଦେବାକୁ ଆସିଥିଲେ । କିଏ ମାସେ ତ କିଏ ୧୫ଦିନ ଗାଁରେ ରହି ଫେରିଥିଲେ କାମକୁ । ଏବେ ରାସନ କାର୍ଡ ଇ-କେୱାଇସି ପାଇଁ କାମ ଛାଡ଼ି ଗାଁକୁ ପୁଣି ଥରେ ଆସିବାକୁ ଅମଙ୍ଗ ବାହାରେ ଖଟୁଥିବା ଓଡ଼ିଆ ଦାଦନ । ସେଥିପାଇଁ ସେମାନେ ବାହାର କରିଛନ୍ତି ଉପାୟ । ଗାଁ ଡିଲର୍ଙ୍କୁ ପାଖକୁ ଡକାଇଛନ୍ତି । ଡିଲର୍ଙ୍କ ଯିବା-ଆସିବା, ରହିବା-ଖାଇବା ଖର୍ଚ୍ଚ ବହନ କରିବାକୁ ମିଳିମିଶି ଚାନ୍ଦା କରିଛନ୍ତି । ଖାଲି ଏତିକି ନୁହେଁ, ଡିଲର୍ ଯେପରି ସୁବିଧାରେ ଆସିବେ ଏବଂ ଫେରିବେ ସେଥିଲାଗି ଫ୍ଲାଇଟ୍ ଟିକେଟ୍ ବ୍ୟବସ୍ଥା ମଧ୍ୟ କରିଛନ୍ତି ।
ରାସନ୍ କାର୍ଡରୁ ଭୂତ ହିତାଧିକାରୀଙ୍କୁ ହଟାଇବାକୁ ନୂଆ ସରକାର ନୂଆ ନିୟମ ଆଣିଛନ୍ତି। ରାସନକାର୍ଡ ତାଲିକାଭୁକ୍ତ ହେବାକୁ ଆଶାୟୀ ପରିବାରର ସବୁ ସଦସ୍ୟଙ୍କ ଆଇସ୍କାନ୍ କିମ୍ବା ଅଙ୍ଗୁଳି ଛାପ ରହିବା ବାଧ୍ୟତାମୂଳକ କରାଯାଇଛି । ଡିଲର୍ମାନେ ହିତାଧିକାରୀଙ୍କ ଘରକୁ ଯାଇ କିମ୍ବା ସେମାନଙ୍କୁ ଡିଲର୍ ପଏଣ୍ଟ୍କୁ ଡକାଇ ଆଇସ୍କାନ୍ କରାଇବେ । ଏହାଦ୍ୱାରା ବର୍ଷ ବର୍ଷ ହେଲା ହେଉଥିବା ଚାଉଳ ହଡ଼ପକୁ ରୋକାଯାଇପାରିବ । ଯୋଗ୍ୟ ହିତାଧିକାରୀ ଖାଦ୍ୟ ସୁରକ୍ଷା ଯୋଜନାରେ ସାମିଲ ହେବେ । ଏଭଳି ନିୟମ ପରେ ଯେମିତି ହେଉ ରାସନ୍ କାର୍ଡରେ ନାମ ଅନ୍ତର୍ଭୁକ୍ତ କରିବା ପାଇଁ ହିତାଧିକାରୀଙ୍କ ମଧ୍ୟରେ ଚାଲିଛି କସରତ । ଏଥିପାଇଁ ଡିଲର୍ ପଏଣ୍ଟ୍ରେ ନାହିଁ ନ ଥିବା ଭିଡ଼ ହେଉଛି । ଲୋକେ ରାତି ଅନିଦ୍ରା ହେଉଛନ୍ତି । ହେଲେ ପ୍ରବାସୀ ଓଡ଼ିଆଙ୍କ ପାଇଁ ଗାଁକୁ ଆସି ଏତେସବୁ ନିୟମ ପାଳନ କରିବା କାଠିକର ପାଠ ହୋଇଛି ।
ସମସ୍ୟାର ସମାଧାନ ପାଇଁ ପ୍ରବାସୀ ଓଡ଼ିଆ ଶ୍ରମିକମାନେ ଏହାର ସମାଧାନର ଉପାୟ ବାହାରି କରିଛନ୍ତି । ଡିଲର୍ଙ୍କୁ ଡାକିବା ପରେ ଏବେ ସେମାନେ ଉଡ଼ାଜାହାଜରେ ଠିକଣା ସ୍ଥାନକୁ ଗଲେଣି । ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ବି କଥା ସମ୍ପୂର୍ଣ୍ଣ ସତ୍ୟ । ଭଦ୍ରକ ଜିଲ୍ଲାର ୬ରୁ ଅଧିକ ଡିଲର୍ ସୁରଟ, ବେଙ୍ଗାଲୁରୁ ଓ କେରଳ ଯାଇଛନ୍ତି । ତିହିଡ଼ି ବ୍ଲକ୍ରୁ ୩ ଜଣ, ଚାନ୍ଦବାଲିରୁ ୨ଜଣ ଓ ଭଦ୍ରକ ବ୍ଲକ୍ରୁ ଜଣେ ଡିଲର୍ ଯାଇଥିବା ଜଣାପଡ଼ିଛି । ଏହି ଡିଲର୍ମାନଙ୍କ ସମସ୍ତ ଯାତ୍ରା ଖର୍ଚ୍ଚ ଦାଦନ ଶ୍ରମିକମାନେ ବୁଝୁଛନ୍ତି ।
କାରଣ ନିର୍ବାଚନ ବେଳେ ମାସେ ଛୁଟି ନେଇ ଏହି ଦାଦନମାନେ ଗାଁକୁ ଆସିଥିଲେ ଭୋଟ ଦେବାକୁ । ଏବେ ସେମାନେ କାମ କରୁଥିବା ସୂତାକଳ, ରବର କଳ, ଝୋଟକଳ କମ୍ପାନୀ ମାଲିକ ଛୁଟି ଦେଉନାହାନ୍ତି । ତେଣୁ ରାସନ୍ କାର୍ଡ ପାଇଁ ଆଇସ୍କାନ୍ କରିବାକୁ ସେମାନେ ଘରକୁ ଫେରୁନାହାନ୍ତି । ଗାଁକୁ ଆସିଲେ ଯାତାୟାତ ଖର୍ଚ୍ଚ ଲାଗିବ । ଦରମା ବି କଟିବ । ତେଣୁ ନିଜ ଗାଁର ଡିଲର୍ଙ୍କୁ ପାଖକୁ ଡକାଉଛନ୍ତି । ଏଥିପାଇଁ ମିଳିମିଶି ଚାନ୍ଦା କରି ଡିଲର୍ମାନଙ୍କୁ ଟ୍ରେନ୍, ଫ୍ଲାଇଟ୍ରେ ନେଇଯାଉଛନ୍ତି ସୁରଟ । ମନ୍ତ୍ରୀ କିମ୍ବା ବିଧାୟକଙ୍କୁ ସ୍ୱାଗତ କରିବା ଭଳି ଡିଲର୍ଙ୍କୁ ସମ୍ମାନ ଦେଇଛନ୍ତି । ଏଥିରେ ଡିଲର୍ ବି ବେଶ୍ ଖୁସ୍ ।
ଭଦ୍ରକ ଜିଲ୍ଲାର ସମ୍ପୃକ୍ତ ରିଟେଲର୍ମାନେ ବେଙ୍ଗାଲୁରୁ, କୋଲକାତା, ସୁରଟ୍, ହାଇଦ୍ରାବାଦରେ ଥିବା ପ୍ରବାସୀଙ୍କ ଇ-କେୱାଇସି କରିବାକୁ ବାହାରି ଯାଇଥିବା ଜଣାପଡ଼ିଛି । ସାଙ୍ଗରେ ନେଇଛନ୍ତି ଆଇସ୍କାନ୍ ମେସିନ୍ । ବିଶେଷ କରି ସୁରଟରେ ଥିବା ଓଡ଼ିଆ ଶ୍ରମିକଙ୍କ ଇ-କେୱାଇସି କରିବା ସେମାନଙ୍କ ପାଇଁ ଚ୍ୟାଲେଞ୍ଜ ପାଲଟିଛି । ଏବେ ସେମାନେ ସୁରଟର ବସ୍ତିରେ ବୁଲିବେ । ଆଶାୟୀଙ୍କ ଆଇସ୍କାନ୍ କରାଇବେ ।
