ନୂଆଦିଲ୍ଲୀ,୧/୨ : ଉତ୍ତରପ୍ରଦେଶର ହରଦୋଇ ଜିଲ୍ଲାରେ ଏକ ଛାତି ଥରେଇଲା ଭଳି ଘଟଣା ସାମ୍ନାକୁ ଆସିଛି । ଏଠାରେ ରାଜ୍ୟ ପରିବହନ ନିଗମ କନ୍ନୋଜ ଡିପୋର ଏକ ବସ୍ ଡ୍ରାଇଭରକୁ ବସ୍ ଚଳାଇବା ସମୟରେ ହୃଦଘାତ ହୋଇଥିଲା । ମାତ୍ର ତା’ର ଉପସ୍ଥିତ ବୁଦ୍ଧି ଯୋଗୁଁ ବସରେ ଥିବା ୪୦ଯାତ୍ରୀଙ୍କ ଜୀବନ ବର୍ତ୍ତି ଯାଇଛି ।

ପ୍ରକାଶ ଯେ,ଗୁରୁବାର ଅପରାହ୍ନରେ ବସ୍ ଡ୍ରାଇଭର  ମାନସିଂହ(୪୫) ଏବଂ କଣ୍ଡକ୍ଟର ସୁରେନ୍ଦ୍ର ୪୦ଯାତ୍ରୀଙ୍କୁ  କନ୍ନୋଜରୁ ନେଇ ହରଦୋଇ ଲାଗି ବାହାରିଥିଲେ । ହରଦୋଇ ସହରର ୧୭କିଲୋମିଟର ପୂର୍ବରୁ ସୋମରାଠାରେ ବସ୍ ଚଳାଇବା ସମୟରେ ମାନସିଂହଙ୍କ ସ୍ବାସ୍ଥ୍ୟ ଖରାପ ହୋଇଯାଇଥିଲା । ମୁଣ୍ଡ ବ୍ୟଥା ଏବଂ ନିଶ୍ବାସ ନେବାରେ ଅସୁବିଧା କାରଣରୁ ମଝି ରାସ୍ତାରେ ବସ୍ ଛିଡ଼ା କରିଦେଇଥିଲେ ।

ଏହାପରେ ଝରକା ଖୋଲି ତଳକୁ ଓହ୍ଲାଇପଡ଼ିଥିଲେ ଏବଂ ରାସ୍ତାରେ ବସିପଡ଼ିଥିଲେ । ଲୋକେ କିଛି ବୁଝିବା ପୂର୍ବରୁ ସେ ବେହୋସ ହୋଇଗଲେ । ତାଙ୍କୁ ରାସ୍ତା ଉପରେ ବେହୋସ ଦେଖି ବସରେ ଥିବା ଯାତ୍ରୀ ଏବଂ କଣ୍ଡକ୍ଟର ଉପସ୍ଥିତ ବୁଦ୍ଧି ଖଟାଇ ତାଙ୍କୁ ବସରେ ପକାଇ ଦେଇଥିଲେ । ଏହାପରେ ଯାତ୍ରୀଙ୍କ ଦ୍ବାରା ବସ୍ ଚଳାଇ କଣ୍ଡକ୍ଟର ସିଧା ଯାଇ ମେଡ଼ିକାଲ କଲେଜରେ ପହଞ୍ଚିଥିଲେ । ସେଠାରେ ଡକ୍ଟର ତାଙ୍କୁ ମୃତ ଘୋଷଣା କରିଥିଲେ । ମେଡ଼ିକାଲ କଲେଜର ଡକ୍ଟରଙ୍କ ପକ୍ଷରୁ ଡ୍ରାଇଭରର ହୃଦଘାତରେ ମୃତ ହୋଇଥିବା ଆଶଙ୍କା କରାଯାଉଛି । ମୃତଦେହକୁ ବ୍ୟବଚ୍ଛେଦ ଲାଗି ପଠାଯାଇଛି । ମାନସିଂହ କନ୍ନୋଜ ଜିଲ୍ଲାର ସିକନ୍ଦରପୁର କରନ ଗାଁର ବାସିନ୍ଦା। 

ଏହି ଘଟଣାକୁ ନେଇ ମେଡ଼ିକାଲ କଲେଜ ହରଦୋଇର ଡିଏମଓ ୟଶ ଅଗ୍ନିହୋତ୍ରୀ କହିଛନ୍ତି କି, ଡ୍ରାଇଭର ମାନସିଂହକୁ ଆମ ପାଖକୁ ନିଆଯାଇଥିଲା । ଜରୁରୀକାଳୀନ ଭିତ୍ତିରେ ତାଙ୍କୁ ପରୀକ୍ଷା କରାଗଲା ତ ତାଙ୍କର ମୃତ୍ୟୁ ହୋଇଯାଇଥିଲା । ମୃତ୍ୟୁର କାରଣ କାର୍ଡ଼ିୟକ ଅରେଷ୍ଟ ବୋଲି ଆଶଙ୍କା କରାଯାଉଛି । ଏଆରଏମ୍ ରୋଡ଼ଓ୍ବେଜ ହରଦୋଇ ପଙ୍କଜ ତିଓ୍ବାରୀ କହିଛନ୍ତି କି କନ୍ନୋଜ ଡିପୋର ବସ୍ ହରଦୋଇ ଲାଗି ଆସୁଥିଲା । ସେଥିରେ ପ୍ରାୟ ୪୦ଜଣ ଯାତ୍ରୀ ଥିଲେ । ଅଚାନକ ସ୍ବାସ୍ଥ୍ୟବସ୍ଥା ବିଗିଡ଼ି ଯିବାରୁ ଡ୍ରାଇଭର ବ୍ରେକ୍ ଲଗାଇ ସେଠାରେ ବସକୁ ଅଟକାଇ ଦେଇଥିଲେ । ତାଙ୍କର ଉପସ୍ଥିତ ବୁଦ୍ଧି ଯୋଗୁଁ ୪୦ଜଣ ଯାତ୍ରୀ ସୁରକ୍ଷିତ ବର୍ତ୍ତି ଯାଇଛନ୍ତି ।