ମୁମ୍ବାଇ ୦୯/୦୫: ‘ହୀରାମଣ୍ଡି: ଦ ଡାଇମଣ୍ଡ୍ ବାଜାର’ ସିରିଜ୍କୁ ନେଇ ସବୁଠି ଚର୍ଚ୍ଚା । ଏଥିରେ ସୋନାକ୍ଷୀ ଉଭୟ ମା’ ରିହାନା ଓ ଝିଅ ଫରୀଦନ ଭୂମିକା ନିର୍ବାହ କରିଛନ୍ତି । ଏଥିପାଇଁ ତାଙ୍କୁ ଖୁବ୍ ପ୍ରଶଂସା ମିଳୁଛି । ସିରିଜ୍ରେ ତାଙ୍କ ସହ ଅନେକ ଶୀର୍ଷ ନାୟିକା ଅଛନ୍ତି । ସମସ୍ତେ ପରଦାରେ ପରସ୍ପରକୁ ସହଯୋଗ କରୁଥିବା ଦେଖିବାକୁ ମିଳିଛି । କିନ୍ତୁ ଅନେକ ଥର ଗୁଜବ ଉଠିଛି, ସେଟ୍ରେ ସବୁ ନାୟିକାଙ୍କ ମଧ୍ୟରେ ଏକ ପ୍ରକାର ଟକ୍କର ଚାଲିଥିଲା । କାହାର କାହା ସହିତ ପଡୁନଥିଲା ।
ଏ ନେଇ ସୋନାକ୍ଷୀ ନିଜର ପ୍ରତିକ୍ରିୟା ଦେଇଛନ୍ତି । ଏକ ଗଣମାଧ୍ୟମ ସହ ବାର୍ତ୍ତାଳାପରେ ସୋନାକ୍ଷୀ ଏହି ଗୁଜବରେ ପୂର୍ଣ୍ଣଚ୍ଛେଦ ପକାଇଛନ୍ତି । କହିଛନ୍ତି, ଯିଏ ଏହି ଗୁଜବ ପ୍ରଚାର କରିଛି, ସେ ନିଜେ ଖୁବ୍ ଚିନ୍ତିତ ଥିବ । ‘ହୀରାମଣ୍ଡି’ ଆମ ସମସ୍ତଙ୍କ ପାଇଁ ଏକ ଚମତ୍କାର ଅନୁଭବ ଥିଲା । ଏହା ମୋ ଜୀବନର ସବୁଠୁ ଭଲ କାମର ଅନୁଭବ ମଧ୍ୟରେ ଅନ୍ୟତମ । ଯିଏ ବି ଏଭଳି ଗୁଜବ ପ୍ରଚାର କରୁଛି, ମୁଁ ସେମାନଙ୍କୁ ଚ୍ୟାଲେଞ୍ଜ୍ କରୁଛି, ଏକସଙ୍ଗେ ୬ ହିରୋ ଥିବା ଫିଲ୍ମ ନିର୍ମାଣ କରିବାକୁ ଚେଷ୍ଟା କରି ଦେଖାଅ ।’
ସିରିଜ୍ର ନିର୍ମାତା ସଞ୍ଜୟ ଲୀଲା ଭଂସାଲି ପ୍ରତ୍ୟେକ ଅଭିନେତ୍ରୀଙ୍କୁ ସେମାନଙ୍କ ହିସାବରେ ପରଦାରେ ଉପସ୍ଥାପନ କରିଛନ୍ତି । ସମସ୍ତଙ୍କୁ ସମାନ ଭାବେ ପରଦା ପ୍ରଦାନ କରିଛନ୍ତି । ପ୍ରତ୍ୟେକ ଅଭିନେତ୍ରୀଙ୍କୁ ସମାନ ଭାବେ ପ୍ରାଧାନ୍ୟ ଦେବା ଭଂସାଲିଙ୍କ ପାଇଁ ଅତି ସହଜ ଥିଲା । ସେ ଏହାକୁ ଅତି ନିଖୁଣ ଭାବେ ନ୍ୟାୟ ଦେଇଛନ୍ତି । ସମସ୍ତ ନାୟିକା ଏକାଠି କାମ କରି ଖୁବ୍ ଆନନ୍ଦିତ ବୋଲି ସୋନାକ୍ଷୀ କହିଛନ୍ତି । ସୁଟିଂ ବେଳେ ସମସ୍ତେ ପରସ୍ପରକୁ ସମର୍ଥନ କରୁଥିଲେ । କାରଣ ‘ହୀରାମଣ୍ଡି’ ଅତ୍ୟନ୍ତ ଜଟିଳ ସେଟ୍ ଥିଲା । ବେଶ ଶାନ୍ତିପୂର୍ଣ୍ଣ ଭାବେ ସମସ୍ତେ କାମ କରିବାର ସୁଯୋଗ ପାଇଥିଲେ ବୋଲି ସୋନାକ୍ଷୀ କହିଛନ୍ତି । ଗତ ୧ ତାରିଖରୁ ନେଟ୍ଫ୍ଲିକ୍ସରେ ପ୍ରସାରିତ ହେଉଛି ‘ହୀରାମଣ୍ଡି’ । ଫିଲ୍ମକୁ ମିଶ୍ର ପ୍ରତିକ୍ରିୟା ମିଳିଛି । ଏଥିରେ ମନୀଷା କୋଇରାଲା, ଋଚା ଚଡ୍ଢା, ଅଦିତି ରାଓ ହୈଦରୀ, ଶର୍ମିନ ସେଗଲ ଓ ଫରୀଦା ଜଲାଲ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଛନ୍ତି ।
