କଟକ,୨୯/୦୧: ପ୍ରଥମେ ବାଦାମ୍ବାଡିରେ । ପରେ ତୁଳସୀପୁର ଠାରେ । ପରିଶେଷରେ ଏହି ଦୁଇଟି ଜାଗାକୁ ବାଦ୍ ଦିଆଯାଇ ମାତାମଠରେ ତାରକସି ହବ୍ ପାଇଁ ଜାଗା ଚିହ୍ନଟ ହେଲା । ନିର୍ମାଣ ଖର୍ଚ୍ଚ ପାଇଁ ମଧ୍ୟ ବ୍ୟୟବରାଦ କରାଗଲା । କିନ୍ତୁ ଗ୍ରୀନ୍ ଟ୍ରିବ୍ୟୁନାଲ୍ ପାଇଁ ପୁଣି ଥରେ ଅଟକିଗଲା ତାରକସି ହବ୍ । ମହାନଦୀ ପଠାରେ ବାଲିଯାତ୍ରା ଆୟୋଜନ କରି ଶିକ୍ଷା ପାଇଥିବା ଜିଲ୍ଲା ପ୍ରଶାସନ ମାତାମଠରେ ତାରକସି ହବ୍ କରିବାରୁ ମୁହଁ ଫେରାଇ ନେଲା । ଇତିମଧ୍ୟରେ ଜାଗା ଚିହ୍ନଟ ପ୍ରକ୍ରିୟା ଭିତରେ ତାରକସି ହବ୍ ଫାଇଲ୍ ଇତିମଧ୍ୟରେ ସମ୍ପୂର୍ଣ୍ଣ ବନ୍ଦ ହୋଇଯାଇଛି । ତେବେ ଯେତେବେଳେ କଟକ ତାରକସିକୁ ଜିଆଇ ମାନ୍ୟତା ଦେବାକୁ ଉଦ୍ୟମ ହେଉଛି, ସେତିକିବେଳେ ତାରକସି ହବ୍ର ସ୍ୱପ୍ନ ପୂରଣ ନ ହେବା ଏହି ଉଦ୍ୟମକୁ ଦୁର୍ବଳ କରିଦେଉଛି ।
ତାରକସି କଟକକୁ ଦେଇଛି ନିଆରା ପରିଚୟ । କାହିଁ କେଉଁ କାଳରୁ ତାରକସି ସହ ଜଡିତ ରହିଛନ୍ତି ଏଠାକାର ଶିଳ୍ପୀକୁଳ । ସୃଜନଶୀଳତାର ଯୋଗୁଁ ଉତ୍କର୍ଷ ତାରକସି କଳା ଆଖି ଝଲସେଇଦିଏ । ସୂକ୍ଷ୍ମ ନିହାଣର ସ୍ପର୍ଶ ସହ ବେଶ୍ ଯତ୍ନ ସହକାରେ କାରିଗର ତୋଳିଦିଏ ମନଲୋଭା କୃତି, ଯାହା ଇତିହାସକୁ କରିଦିଏ ଆହୁରି ରୁଦ୍ଧିମନ୍ତ । କିନ୍ତୁ କାଳକ୍ରମେ କଟକ ସହରରୁ ତାରକସିର ଉତ୍କର୍ଷତା କମିବାକୁ ଲାଗିଲାଣି । ଆଗଭଳି ଚମକ ବି ଆଉ ନାହିଁ । ଆଧୁନିକତାର ଛାପରେ, ମେସିନ୍ ଯୁଗରେ ହାତତିଆରି ଏହି ସୂକ୍ଷ୍ମ କାରିଗରୀ ଲୋପ ପାଇବାକୁ ବସିଲାଣି । କଟକର ଏହି ଲୁପ୍ତ ପ୍ରାୟ କଳାକୁ ପୁଣି ଜନମାନସକୁ ଫେରାଇ ଆଣିବା ଏବଂ ପ୍ରସିଦ୍ଧ କରାଇବାକୁ ପ୍ରଶାସନ ପକ୍ଷରୁ ଏକ ନିଆରା ଯୋଜନା ହୋଇଥିଲା ।
ସହର ଛାତିରେ ତାରକସି ହବ୍ କରି କଳା ଓ କାରିଗରଙ୍କୁ ପୁନଃସକ୍ରିୟ କରିବାକୁ ଯୋଜନା କରାଯାଇଥିଲା । ତେବେ ଯୋଜନାକୁ ପ୍ରାୟ ୧୦ ବର୍ଷ ପୂରିଥିଲେ ମଧ୍ୟ ବର୍ତ୍ତମାନ ସୁଦ୍ଧା ଜାଗା ଖଣ୍ଡେ ଚିହ୍ନଟ ହୋଇପାରିଲା ନାହିଁ । ବାରମ୍ବାର ଜାଗା ଚିହ୍ନଟ କରାଯାଉଥିଲେ ମଧ୍ୟ କୌଣସି ନା କୌଣସି କାରଣ ଯୋଗୁଁ ଜାଗା ଚୂଡ଼ାନ୍ତ ହୋଇପାରୁନାହିଁ । ଯୋଜନାରେ ଅହେତୁକ ବିଳମ୍ୱ ହେବା ଦ୍ୱାରା ତାରକସି ହବ୍ ଏକପ୍ରକାର ଅନିଶ୍ଚିତତାରେ ରହିଯାଇଛି ।
କଟକରେ ତାରକସିକୁ ପ୍ରୋତ୍ସାହନ ଦେବାକୁ ଯାଇ ବାଦାମ୍ବାଡିରେ ହବ୍ ପ୍ରତିଷ୍ଠା କରିବାକୁ ତତ୍କାଳୀନ ହସ୍ତତନ୍ତ ଓ ହସ୍ତକଳା ମନ୍ତ୍ରୀ ସ୍ନେହାଙ୍ଗିନୀ ଛୁରିଆ ଘୋଷଣା କରିଥିଲେ । ଏହା ପୂର୍ବରୁ ତୁଳସୀପୁର ରେଭିନ୍ୟୁ କଲୋନୀ ପାଖରେ ମଧ୍ୟ ହବ୍ ପ୍ରତିଷ୍ଠା କରିବାକୁ ଯୋଜନା କରାଯାଇଥିଲା । ଏ ନେଇ ୧କୋଟି ଟଙ୍କା ବଜେଟ୍ ମଧ୍ୟ କରାଯାଇଥିଲା । କିନ୍ତୁ ଜାଗା ନେଇ କିଛି ସମସ୍ୟା ଥିବାରୁ କାର୍ଯ୍ୟ ଆଗେଇ ପାରିଲା ନାହିଁ । ପରିଶେଷରେ ମାତାମଠ ମହାନଦୀ କୂଳରେ ତାରକସି ହବ୍ ପ୍ରତିଷ୍ଠା କରିବାକୁ ଯୋଜନା ହୋଇଥିଲା । ଏ ନେଇ ଜିଲ୍ଳା ପ୍ରଶାସନ ତରଫରୁ ୩ ଏକର ପରିମିତ ଜମି ମଧ୍ୟ ଯୋଗାଇ ଦିଆଯାଇଥିଲା । ଜାଗାର ସ୍ଥିତି ଯୋଗୁଁ ଏହା ପର୍ଯ୍ୟଟକଙ୍କୁ ଆକୃଷ୍ଟ କରିିବ ବୋଲି ଆଶା କରାଯାଉଥିଲା । ପର୍ଯ୍ୟଟକଙ୍କ ପାଇଁ ସମସ୍ତ ସୁବିଧା ସୁଯୋଗ ମଧ୍ୟ କରାଯାଇଥାନ୍ତା । କିଓସ୍କୋ ଭଳି ଛୋଟ ଛୋଟ ଘର ନିର୍ମାଣ କରାଯାଇ କାରିଗରମାନଙ୍କୁ ସେଠାରେ ବସିବାକୁ ସୁଯୋଗ ଦିଆ ଯାଇଥାନ୍ତା । କାରିଗର ସେମାନଙ୍କ ହାତହତିଆର ସହ ସେଠାରେ ବସି ତାରକସି କାର୍ଯ୍ୟ କରିଥାନ୍ତେ ।
ଯାହାଫଳରେ ପର୍ଯ୍ୟଟକ ସିଧାସଳଖ ତାରକସି କାର୍ଯ୍ୟଶୈଳୀ ଦେଖିବାକୁ ସୁଯୋଗ ପାଇଥାନ୍ତେ । କେବଳ ଏତିକି ନୁହେଁ କିଣାବିକା ମଧ୍ୟ ହୋଇଥାନ୍ତା । ଆନୁସଙ୍ଗିକ ବ୍ୟବସ୍ଥା ମଧ୍ୟ କରାଯିବାକୁ ନିଷ୍ପତ୍ତି ହୋଇଥିଲା । ପାର୍କିଂ ବ୍ୟବସ୍ଥା ସହ କାଫେଟେରିଆ, ବିଶ୍ରାମ ଗୃହ, ଟଏଲେଟ୍ ବ୍ୟବସ୍ଥା ହେବାର ଥିଲା । କିନ୍ତୁ ଏତେ ସବୁ ଯୋଜନାରେ ପୂର୍ଣ୍ଣଚ୍ଛେଦ ପଡିଯାଇଛି ।
ଗ୍ରୀନ୍ ଟ୍ରିବ୍ୟୁନାଲ୍ ଡ଼ରରେ ମାତାମଠରେ ତାରକସି ହବ୍ ପ୍ରତିଷ୍ଠା ଯୋଜନା ବାଟବଣା ହୋଇଯାଇଛି । ଏବେ ଏ ଫାଇଲ୍ ସମ୍ପୂର୍ଣ୍ଣ ବନ୍ଦ କରିଦେବାକୁ ପ୍ରଶାସନିକ ସ୍ତରରେ ଚିନ୍ତା କରାଯାଉଛି । ଯଦିଓ ଏ ସମ୍ପର୍କରେ କେହି ପାଟି ଖୋଲିବାକୁ ପ୍ରସ୍ତୁତ ନୁହନ୍ତି । ତେବେ ଏ ଯୋଜନା କାର୍ଯ୍ୟକାରୀ କରିବାକୁ ଆଗ୍ରହୀ ଥିବା ଅଧିକାରୀମାନଙ୍କର ଇତିମଧ୍ୟରେ ବଦଳି ହୋଇଯାଇଥିବାବେଳେ ଏବର ଅଧିକାରୀମାନେ ଏ ସମ୍ପର୍କରେ ଆଦୌ ଜାଣିନଥିବା ପ୍ରକାଶ କରିଛନ୍ତି ।
