ମସ୍କୋ,୦୬/୦୯: ରୁଷ୍ ରାଷ୍ଟ୍ରପତି ଭ୍ଲାଦିମିର ପୁଟିନ ୟୁକ୍ରେନ୍ ସହ ଯୁଦ୍ଧ ରୋକିବା ଲାଗି ଆଲୋଚନା ଲାଗି ପ୍ରସ୍ତୁତ ବୋଲି କହିଛନ୍ତି । ଏଥିପାଇଁ ଭାରତ, ଚୀନ୍, ବ୍ରାଜିଲ ଦୁଇ ଦେଶ ମଧ୍ୟରେ ମଧ୍ୟସ୍ଥତା କରିପାରିବେ ବୋଲି ସେ ପ୍ରକାଶ କରିଛନ୍ତି । ରୁଷ୍ର ଭ୍ଲାଦିଭୋସ୍ତୋକ୍ ସହରରେ ଇଷ୍ଟର୍ଣ୍ଣ ଇକୋନୋମିକ୍ ଫୋରମ୍ରେ ଆଲୋଚନା ବେଳେ ପୁଟିନ୍ କହିଛନ୍ତି, ୨୦୨୨ରେ ଯୁଦ୍ଧ ଆରମ୍ଭ ହେବାବେଳେ ତୁର୍କୀ ଦୁଇଦେଶ ମଧ୍ୟରେ ବୁଝାମଣା କରିବାକୁ ଉଦ୍ୟମ କରିଥିଲା । କିନ୍ତୁ ରୁଷ୍ର ସର୍ତ୍ତକୁ ଲାଗୁ କରାଯାଇ ନ ଥିଲା । ଏବେ ନୂଆକରି ଆଲୋଚନା ଆରମ୍ଭ କରିବା ପାଇଁ ପୂର୍ବର ଉଦ୍ୟମକୁ ଆଧାର ବନାଯାଇପାରିବ । ଏଥିସହ ୟୁକ୍ରେନ୍ର ଡୋନବାସ୍ ଅଞ୍ଚଳକୁ କବ୍ଜା କରିବା ରୁଷ୍ର ପ୍ରମୁଖ ଉଦ୍ଦେଶ୍ୟ । ରୁଷ୍ ସେନା ଧୀରେ ଧୀରେ କୁର୍ସ୍କରୁ ୟୁକ୍ରେନ୍ ସେନାକୁ ପଛକୁ ହଟାଉଥିବା କଥା ମଧ୍ୟ ପୁଟିନ୍ କହିଛନ୍ତି । ପୂର୍ବରୁ ମଧ୍ୟ ପୁଟିନ୍ ଯୁଦ୍ଧ ରୋକିବା ପାଇଁ ୨ଟି ସର୍ତ୍ତ ରଖିଥିଲେ । ତାହା ହେଲା ଡୋନେସ୍କ, ଲୁହାନ୍ସ୍କ, ଖେରସୋନ ଏବଂ ଜାପୋରଜିଆରୁ ୟୁକ୍ରେନ୍ ନିଜ ସୈନ୍ୟ ହଟାଇବ । ଏଥିସହ ୟୁକ୍ରେନ୍ କେବେ ବି ନାଟୋର ସଦସ୍ୟ ହେବ ନାହିଁ । ତେବେ ୟୁକ୍ରେନ୍ ଏହି ଦୁଇଟି ସର୍ତ୍ତ ମାନିବାକୁ ରାଜି ହୋଇ ନ ଥିଲା ।
ନିକଟରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୟୁକ୍ରେନ୍ ଗସ୍ତ କରିଥିବାବେଳେ ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି ମଧ୍ୟ ଶାନ୍ତି ଆଲୋଚନା ପାଇଁ ଭାରତ ମଧ୍ୟସ୍ଥତା କରିପାରିବ ବୋଲି କହିଥିଲେ । ଏହି ଆଲୋଚନା ଭାରତରେ ମଧ୍ୟ ହୋଇପାରିବା କଥା ସେ ଉଠାଇଥିଲେ । ଜେଲେନ୍ସ୍କିଙ୍କ ସହ ଦ୍ୱିପାକ୍ଷିକ ବୈଠକରେ ମୋଦି ଭାରତର ଆଭିମୁଖ୍ୟ ଦୋହରାଇବା ସହ ଭାରତ ସର୍ବଦା ଶାନ୍ତିର ପକ୍ଷରେ ରହିଥିବା କହିଥିଲେ । ଏହା ପୂର୍ବରୁ ମୋଦି ରୁଷ୍ ଗସ୍ତ କରି ସେଠାରେ ପୁଟିନ୍ଙ୍କ ସହ ଦ୍ୱିପାକ୍ଷିକ ବୈଠକ କରିଥିଲେ । ଯୁଦ୍ଧ ଭୂମିରେ ଶାନ୍ତିର ରାସ୍ତା ବାହାରି ନ ଥାଏ ବୋଲି ମୋଦି ସେଠାରେ ପୁଟିନ୍ଙ୍କୁ କହିଥିଲେ । ଯୁଦ୍ଧଗ୍ରସ୍ତ ୟୁକ୍ରେନ୍ ଏବଂ ରୁଷ୍ରେ ମୋଦି ଉଭୟ ଜେଲେନ୍ସ୍କି ଏବଂ ପୁଟିନ୍ଙ୍କୁ ଆଲିଙ୍ଗନ କରିବା ବିଶ୍ୱବ୍ୟାପୀ ଚର୍ଚ୍ଚାର ବିଷୟ ହୋଇଥିଲା ।
ପ୍ରକାଶଥାଉ କି, ୨୦୨୨ ଫେବ୍ରୁଆରୀରୁ ରୁଷ୍-ୟୁକ୍ରେନ୍ ଯୁଦ୍ଧ ଜାରି ରହିଛି । ଯୁଦ୍ଧବେଳେ ରୁଷ୍ ୟୁକ୍ରେନ୍ର ଅନେକ ଅଞ୍ଚଳ କବ୍ଜା କରିଥିବାବେଳେ ଏବେ ୟୁକ୍ରେନ୍ ରୁଷ୍ ଭିତରେ ପଶି ଆକ୍ରମଣ ଜାରି ରଖିଛି । ୟୁକ୍ରେନ୍ ରୁଷ୍ର କୁର୍ସ୍କ ଅଞ୍ଚଳକୁ କବ୍ଜା ମଧ୍ୟ କରିଛି । ରୁଷ୍ ସେଠାରୁ ୟୁକ୍ରେନ୍ ସୈନ୍ୟଙ୍କୁ ହଟାଇବା ଲାଗି ଉଦ୍ୟମ ଜାରି ରଖିଛି ।
