ଗୋପ,୦୫/୦୮: ମତ୍ସ୍ୟ ଓ ପଶୁସଂପଦ  ବିଭାଗ ଅଧୀନରେ ୧୯୯୫ ମସିହାରେ ୪ର୍ଥ  ଶ୍ରେଣୀ କର୍ମଚାରୀ ଭାବେ ଚାକିରି କରିଥିଲେ । ହେଲେ କୌଣସି କାରଣ ନ ଦର୍ଶାଇ ବିଭାଗୀୟ  କର୍ତ୍ତୃପକ୍ଷ ତାଙ୍କୁ ୧୯୯୭ ମସିହାରେ ଚାକିରିରୁ ବାହାର କରି ଦେଇଥିଲେ । ଏ ନେଇ ବିଭାଗୀୟ  ଅଧିକାରୀଙ୍କଠାରୁ ଆରମ୍ଭ କରି ହାଇକୋର୍ଟଙ୍କ  ଦ୍ୱାରସ୍ଥ ହୋଇଥିଲେ ମଧ୍ୟ କୌଣସି ସୁଫଳ ମିଳିଲା  ନାହିଁ । ଚାକିରିରୁ ଛଟେଇ ପରେ ବର୍ତ୍ତମାନ ଜୀବନ  ଦୁର୍ବିସହ ହୋଇପଡିଛି । ଦୀର୍ଘ ୨୭ ବର୍ଷ ଧରି  ନ୍ୟାୟ ପାଇବା ଅପେକ୍ଷାରେ ରହିଛନ୍ତି ଗୋପ ବ୍ଲକ  ଅଧିନ ଗଣେଶ୍ୱରପୁର ପଞ୍ଚାୟତ ହାଟସାହି ଗ୍ରାମର  ଭଗବାନ ସାହୁ (୫୨) ।   

ସୂଚନାଯୋଗ୍ୟ, ମତ୍ସ୍ୟ ଓ ପଶୁସଂପଦ ବିଭାଗ  ଅଧୀନରେ ନିମାପଡ଼ା ବ୍ଲକ ତମ୍ପାଳଠାରେ ଭଗବାନ  ୪ର୍ଥ ଶ୍ରେଣୀ କର୍ମଚାରୀ ଭାବେ କାର୍ଯ୍ୟ ଆରମ୍ଭ  କରିଥିଲେ । ହେଲେ କୌଣସି କାରଣ ନ ଦର୍ଶାଇ  କର୍ତ୍ତୃପକ୍ଷ ତାଙ୍କୁ ସେତେବେଳେ ଚାକିରିରୁ ବାହାର  କରିଦେଇଥିଲେ । ଏ ନେଇ ୧୯୮୯ ମସିହାରେ  ଭଗବାନ ହାଇକାର୍ଟଙ୍କ ଦ୍ୱାରସ୍ଥ ହୋଇଥିଲେ ।  ଘଟଣାର ତର୍ଜମା କରି ତୁରନ୍ତ ଭଗବାନଙ୍କୁ ନିଯୁକ୍ତି  ଦେବା ଲାଗି ହାଇକୋର୍ଟ ମତ୍ସ୍ୟ ଓ ପଶୁସଂପଦ  ବିଭାଗକୁ ନିର୍ଦ୍ଦେଶ ଦେଇଥିଲେ । କିନ୍ତୁ ଦୀର୍ଘବର୍ଷ  ବିତିଯାଇଥିଲେ ମଧ୍ୟ ହାଇକୋର୍ଟଙ୍କ ନିର୍ଦ୍ଦେଶକୁ  ପଶୁ ସଂପଦ ବିଭାଗ ଫୁ କରି ଦେଇଛି । ଫଳରେ  ଭଗବାନଙ୍କ ସ୍ତ୍ରୀ ସବିତା ସାହୁ ଏବଂ ତାଙ୍କ  ଦୁଇ ସନ୍ତାନ ଏବେ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି । ରହିବା ପାଇଁ ଆବଶ୍ୟକ  ଘର ନ ଥିବାରୁ ଭଙ୍ଗା ଘରେ ଜରି ପାଲ ପକାଇ  ଦୁଃଖ କଷ୍ଟରେ ରହୁଛନ୍ତି । 

ସେହିପରି ଦୁଇ ଓଳି  ଗଣ୍ଡେ ଖାଇବା ପାଇଁ ପର ଦୁଆରେ ମୁଲ ମଜୁରି  ଲାଗିବାକୁ ପଡୁଛି । ଏସବୁ ଭିତରେ ୨ ପିଲାଙ୍କ  ପାଠପଢା ସାଙ୍ଗକୁ ପରିବାର ଭରଣପୋଷଣ  କରିବା କଷ୍ଟକର ହୋଇପଡୁଥିବା ଭଗବାନ ପ୍ରକାଶ  କରିଛନ୍ତି । ବର୍ତ୍ତମାନ ବି ସେ ନ୍ୟାୟ ପାଇବା ପାଇଁ  ଦୈନିକ କୋର୍ଟ କଚେରୀ ସହ ମତ୍ସ୍ୟ ଓ ପଶୁ  ସଂପଦ ବିଭାଗକୁ ଦୌଡୁ ଥିବା ଜଣାପଡ଼ିଛି । ନୂଆ  ମୁଖ୍ୟମନ୍ତ୍ରୀ ହୋଇଥିହା ମୋହନ ଚରଣ ମାଝୀଙ୍କ  ଉପରେ ଭରଷା ରହିଛି । ନ୍ୟାୟ ମିଳିବ ବୋଲି  ଆଶା ରହିଥିବା ଭଗବାନ ପ୍ରକାଶ କରିଛନ୍ତି ।