ଭୁବନେଶ୍ୱର,୧୯/୯ : ଗଣେଶ ମହୋତ୍ସବ ପାଇଁ ଚଳଚଞ୍ଚଳ ହୋଇଉଠିଛି ବଡ଼ଗଡ଼ । କାରିଗରଙ୍କ ଶେଷ ସ୍ପର୍ଶରେ ସୁଶୋଭିତ ୫୫ ଫୁଟ ଉଚ୍ଚର ବିଶାଳ ଗଣେଶଙ୍କ ମୁଣ୍ମୟୀ ମୂର୍ତ୍ତି । ଠାକୁରଙ୍କ ରୁପା ନିର୍ମିତ ପଦଯୁଗଳ ମୂର୍ତ୍ତିକୁ ଆହୁରି ଆକର୍ଷଣୀୟ କରି ତୋଳିଛି । ବଡ଼ ଗଣେଶଙ୍କ ମୂର୍ତ୍ତିକୁ ଦୃଷ୍ଟିରେ ରଖି ସୁଦୃଶ୍ୟ ସାମିଆନା । ତା’ ସହିତ ଜର୍ମାନ ହାଙ୍ଗରରେ ସାଂସ୍କୃତିକ କାର୍ଯ୍ୟକ୍ରମର ଆସର । ମହୋତ୍ସବକୁ ଅଧିକ ଲୋକାଭିମୁଖୀ କରିବା ଲାଗି ମୀନାବଜାର ବ୍ୟବସ୍ଥା । ସବୁ ସଜାଡ଼ି ରଖିଛନ୍ତି ଆୟୋଜକ ମଣ୍ଡଳୀ । ରାଜଧାନୀର ଅନ୍ୟତମ ଆକର୍ଷଣ ସାଜିଥିବା ଏହି ମହୋତ୍ସବକୁ ବୁଧବାର ସନ୍ଧ୍ୟାରେ ରାଜ୍ୟପାଳ ଗଣେଶୀ ଲାଲ ମୁଖ୍ୟଅତିଥି ଭାବେ ଯୋଗଦେଇ ଏହାକୁ ଆନୁଷ୍ଠାନିକ ଭାବେ ଉଦ୍ଘାଟନ କରିବାର କାର୍ଯ୍ୟକ୍ରମ ରହିଛି । ରାଜ୍ୟପାଳ ଶ୍ରୀ ଲାଲ ସନ୍ଧ୍ୟା ୬ଟାରେ ବ୍ରାଇଟ୍ ଷ୍ଟାର ୟୁଥ୍ ଆସୋସିଏସନ୍ ଦ୍ୱାରା ଆୟୋଜିତ ମହୋତ୍ସବସ୍ଥଳୀରେ ପହଞ୍ଚିବେ । ସେଠାରେ ବଡ଼ଗଡ଼ ଗ୍ରାମବାସୀ ତାଙ୍କୁ ସ୍ୱାଗତ ସମ୍ବର୍ଦ୍ଧନା ଦେବେ । ଏହାପରେ ଗଣେଶ ମଣ୍ଡପରେ ପହଞ୍ଚି ଠାକୁରଙ୍କୁ ଦର୍ଶନ କରିବେ ।
ସେହିଭଳି ବଡ଼ଗଡ଼ ଗ୍ରାମର ବିଶିଷ୍ଟ ସଂଗ୍ରାମୀ ଶହୀଦ ପଦ୍ମନାଭ ଛୋଟରାୟଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ ପୂର୍ବକ ଶ୍ରଦ୍ଧାଞ୍ଜଳି ଦେବାର କାର୍ଯ୍ୟକ୍ରମ ରହିଛି । ସଂଯୋଗବଶତଃ ରାଜ୍ୟପାଳ ଗଣେଶୀ ଲାଲଙ୍କ ଜନ୍ମତିଥି ଗଣେଶ ଚତୁର୍ଥୀରେ ହୋଇଥିବାରୁ ବଡ଼ଗଡ଼ ବାସିନ୍ଦା ତାଙ୍କ ଜନ୍ମୋତ୍ସବ ପାଳନ କରିବାକୁ ମନସ୍ଥ କରିଛନ୍ତି । ଶ୍ରୀ ଲାଲ ୮୨ ବର୍ଷ ବୟସରେ ପଦାର୍ପଣ କରିଥିବାରୁ ଗ୍ରାମବାସୀ ୮୨ଟି ପ୍ରଦୀପ ପ୍ରଜ୍ଜ୍ୱଳନ କରି ତାଙ୍କର ଦୀର୍ଘଜୀବନ କାମନା କରିବେ । ଜର୍ମାନ ହାଙ୍ଗରରେ ଅନୁଷ୍ଠିତ ସଙ୍ଗୀତ ମହାକୁମ୍ଭରେ ରାଜ୍ୟପାଳ ଶ୍ରୀ ଲାଲଙ୍କ ଜନ୍ମଦିନ କେକ୍ କାଟି ପିଲାମାନଙ୍କୁ ବଣ୍ଟନ କରାଯିବ । ଏହି ଅବସରରେ ଆୟୋଜିତ ସମ୍ବର୍ଦ୍ଧନା ସଭାରେ ଗଣେଶ ମହୋତ୍ସବ କମିଟିର ସମ୍ପାଦକ ସଂଗ୍ରାମ ମାର୍ଥା ଅଧ୍ୟକ୍ଷତା କରି ନିଜର ବକ୍ତବ୍ୟ ରଖିବେ । ସଦସ୍ୟ ଅମିତାଭ ମହାନ୍ତି ଅତିଥି ପରିଚୟ ପ୍ରଦାନ କରିବେ । ଅନୁରୂପ ଭାବେ ପ୍ରତିଭାବାନ୍ ବ୍ୟକ୍ତିବିଶେଷଙ୍କୁ ରାଜ୍ୟପାଳ ସମ୍ବର୍ଦ୍ଧିତ କରିବେ ଏବଂ ଗ୍ରାମବାସୀଙ୍କ ତରଫରୁ ରାଜ୍ୟପାଳ ଶ୍ରୀ ଲାଲଙ୍କୁ ସମ୍ବର୍ଦ୍ଧନା ଦିଆଯିବ ବୋଲି କମିଟି ପକ୍ଷରୁ ସୂଚନା ମିଳିଛି ।