ନୀଳଗିରି, ୧୭/୪ : ନୀଳଗିରିରେ ବିଜେଡି ୨ ଫାଳ। ବିଜୁ ବାବୁଙ୍କ ଶ୍ରାଦ୍ଧ ଦିବସକୁ ଅଲଗା ଅଲଗା ପାଳିଲେ ୨ ବିଜେଡି ଆଶାୟୀ। ବିଧାୟକ ସୁକାନ୍ତ ନାୟକ ତାଙ୍କ ସମର୍ଥକଙ୍କ ସହ ଶ୍ରାଦ୍ଧ ଦିବସ ପାଳନ କରିଛନ୍ତି। ତାଙ୍କ ସମର୍ଥଙ୍କ ସହ ଆସି ବାଇପାସ୍ ରୋଡ଼ରେ ଥିବା ବିଜୁବାବୁଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିଥିଲେ। ପରେ ପୋଡାଶୂଳ ନିକଟରେ ପୂଜ୍ୟପୂଜା କମିଟି ତରଫରୁ ଏକ ସମାବେଶ ଆୟୋଜିତ ହୋଇଥିଲା। ହଜାର ହଜାର ବିଜୁପ୍ରେମୀ ଓ ସୁକାନ୍ତଙ୍କ ସମର୍ଥକ ଉପସ୍ଥିତ ଥିଲେ।

ଅନୁରୂପ ଭାବେ ବିଜେଡି ଆଶାୟୀ ପ୍ରାର୍ଥୀ ସନ୍ତୋଷ ଖଟୁଆ ତାଙ୍କ ସମର୍ଥକଙ୍କୁ ଧରି ଅଲଗା ପାଳନ କରିଛନ୍ତି। ସେ ସକାଳୁ ତିଳତର୍ପଣ କରି ଜଗନ୍ନାଥ ମନ୍ଦିରରେ ପୂଜାର୍ଚ୍ଚନା କରି ବିଜୁବାବୁଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିଥିଲେ। ପରେ ଏନଏସି କଲ୍ୟାଣ ମଣ୍ଡପରେ ଏକ ସମାବେଶ ଅନୁଷ୍ଠିତ ହୋଇଥିଲା। ଏଥିରେ ବିଜେଡିର ବିଭିନ୍ନ ଜନ ପ୍ରତିନିଧି ବରିଷ୍ଠ ବ୍ୟକ୍ତିତ୍ୱମାନେ ସାମିଲ ହୋଇଥିଲେ। ବିଜେଡିର ବିଧାୟକ ଆଶାୟୀ ପ୍ରାର୍ଥୀ ଭାବେ ଉଭୟ ସନ୍ତୋଷ ଓ ସୁକାନ୍ତ ଆଜିର ଉତ୍ସବକୁ ମହାସମାରୋହରେ ପାଳନ କରିବା ନେଇ ସାଧାରଣରେ ବେଶ ଚର୍ଚ୍ଚା ପାଲଟିଛି।