ଅସ୍ତରଙ୍ଗ,୦୭/୦୯: ବାର୍ଡ ଫ୍ଲୁ ଆତଙ୍କ ପରେ ଏବେ  ଛେଳି ମଡ଼କ ଘଟଣା ପୁରୀ ଜିଲ୍ଲା ଅସ୍ତରଙ୍ଗ ବ୍ଲକ ଅଞ୍ଚଳରେ ଛେଳି ଚାଷୀଙ୍କ ମୁଣ୍ଡରେ ଚଡକ ପକାଇଛି । ସପ୍ତାହକ ଭିତରେ  ୨ଜଣ ଚାଷୀଙ୍କ ୨୩ରୁ ଊଦ୍ଧ୍ୱର୍ ଛେଳି ଅଜଣା ରୋଗର ଶିକାର  ହୋଇ ମୃତ୍ୟୁମୁଖରେ ପଡିଛନ୍ତି । ରୋଗ ନିରୂପଣ କରିବାରେ  ପ୍ରାଣୀଧନ ବିଭାଗ ସକ୍ଷମ ହେଉ ନ ଥିବାରୁ ଅଜଣା ରୋଗ  ଗାଁରୁ ଗାଁ ବ୍ୟାପିବାରେ ଲାଗିଥିବା ସ୍ଥାନୀୟ ଅଞ୍ଚଳର ଛେଳି  ଚାଷୀମାନେ ଅଭିଯୋଗ କରିଛନ୍ତି । 

ସୂଚନା ମୁତାବକ, ପୁରୀ  ଜିଲ୍ଲା ଅସ୍ତରଙ୍ଗ ବ୍ଲକ ଝାରିଆ ଗ୍ରାମର ଅମରେଶ୍ୱର ବସ୍ତିୟାଙ୍କ ୩ଟି  ଛେଳି ଅଜଣା ରୋଗରେ ଆକ୍ରାନ୍ତ ହୋଇଥିଲେ। ଅମରେଶ୍ୱର  ସ୍ଥାନୀୟ ପ୍ରାଣୀ ଚିକିତ୍ସାଳୟକୁ ଅସୁସ୍ଥ ଛେଳିଙ୍କୁ ନେଇଥିବାବେଳେ  ସେଠାରେ ସମସ୍ତ ଛେଳି ମୃତ୍ୟୁବରଣ କରିଥିଲେ । ଛେଳି ମୃତ୍ୟୁର ପ୍ରକୃତ କାରଣ ଜଣାପଡି ନ ଥିବାବେଳେ ବ୍ୟବଚ୍ଛେଦ  ରିପୋର୍ଟ ଆସିବା ପରେ ପ୍ରକୃତ କାରଣ ଜଣାପଡିବ ବୋଲି  ଅମରେଶ୍ୱର ଗଣମାଧ୍ୟମ ନିକଟରେ ପ୍ରକାଶ କରିଛନ୍ତି । ସେହିପରି  ବଳଭଦ୍ରପୁର ଗ୍ରାମର ସନ୍ତୋଷ କୁମାର କାଣ୍ଡିଙ୍କ ଗତ ୫ଦିନ  ମଧ୍ୟରେ ୨୦ଟି ଛେଳି ଅଜଣା ରୋଗରେ ଆକ୍ରାନ୍ତ ହୋଇ ପ୍ରାଣ  ହରାଇଥିବାବେଳେ ଅବଶିଷ୍ଟ ୨୦ଟି ଛେଳି ସାମାନ୍ୟ ଅସୁସ୍ଥ  ଥିବା ସନ୍ତୋଷ ପ୍ରକାଶ କରିଛନ୍ତି । ଏହି ଘଟଣା ପରେ ସ୍ଥାନୀୟ  ଅଞ୍ଚଳର ଅନେକ ଛେଳି ଚାଷୀ ଚିନ୍ତିତ ହୋଇପଡିଛନ୍ତି । ଦିନକୁ  ଦିନ ଛେଳି ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଛି । ତୁରନ୍ତ ଏଦିଗରେ  ବିଭାଗ ଦୃଷ୍ଟି ଦେଇ ପଦକ୍ଷେପ ନେବାକୁ ଦାବି ହୋଇଛି । 

ଏ  ନେଇ ଅସ୍ତରଙ୍ଗ ବ୍ଲକ ପ୍ରାଣୀ ଚିକିତ୍ସାଧିକାରୀ ଡକ୍ଟର ଶୁଭଶ୍ରୀ  ପ୍ରଧାନ କହିଛନ୍ତି, ବର୍ଷା ଋତୁରେ ପିପିଆର ରୋଗ ପ୍ରାୟତଃ  ଛେଳିଙ୍କ ଦେହରେ ଦେଖାଯାଏ । ଏହି ରୋଗ ପାଇଁ ଅସ୍ତରଙ୍ଗର  ୭୦ରୁ ୮୦ ଭାଗ ଅଞ୍ଚଳରେ ଟିକାକରଣ ହୋଇଛି । ଯଦି ଛେଳି  ଦେହରେ ଏହି ରୋଗ ହୋଇଛି ତୁରନ୍ତ ଚାଷୀମାନେ ନିକଟସ୍ଥ  ପ୍ରାଣୀ ଚିକିତ୍ସାଳୟରେ ଦେଖାକରନ୍ତୁ । ଛେଳିଠାରେ ଜ୍ୱର, ଝାଡା,  ମୁହଁ, ଆଖି, ନାକରୁ ପାଣି ବାହାରିବା ଲକ୍ଷଣ ଦେଖାଗଲେ  ତୁରନ୍ତ ନିକଟସ୍ଥ ପ୍ରାଣୀ ଚିକିତ୍ସାଳୟରେ ଚିକିତ୍ସା କରିବାକୁ ଶୁଭଶ୍ରୀ  ସୂଚନା ଦେଇଛନ୍ତି । ଏ ନେଇ ସ୍ଥାନୀୟ ଅଞ୍ଚଳ ଯୁବକ ତଥା  ସମାଜସେବୀ ଦଷ୍ମନ୍ତ କୁମାର ପରିଡା କହିଛନ୍ତି, ବିଭାଗୀୟ  ଅଧିକାରୀ ଓ ବ୍ଲକ ପ୍ରାଣୀଧନ ଚିକିତ୍ସାଧିକାରୀ ଏହି ଘଟଣାକୁ ଗୁରୁତ୍ୱ ଦେଇ ଟିକାଦେବାର ବ୍ୟବସ୍ଥା କରନ୍ତୁ ।