ମୁମ୍ବାଇ: ଦୀପାବଳିରେ ୩ ଘଣ୍ଟା ନୁହେଁ ବରଂ ୨ ଘଣ୍ଟା ବାଣ ଫୁଟାଇବା ପାଇଁ ଅନୁମତି ଦେଇଛନ୍ତି ବମ୍ବେ ହାଇକୋର୍ଟ  । ଦୀପାବଳିରେ ରାତି ୮ଟାରୁ ୧୦ଟା ଯାଏଁ ବାଣ ଫୁଟାଇପାରିବେ ଲୋକେ । ମୁମ୍ବାଇରେ ବଢ଼ୁଥିବା ବାୟୁ ପ୍ରଦୂଷଣକୁ ନଜରରେ ରଖି ବମ୍ବେ ହାଇକୋର୍ଟ ଏଭଳି ରାୟ ଦେଇଛନ୍ତି ।  ଏବେ ମୟାନଗରୀ ମୁମ୍ବାଇର ଏୟାର କ୍ବାଲିଟି ଇଣ୍ଡାକ୍ସ (ଏକ୍ୟୁଆଇ) ୮୨ ରହିଥିବା ବେଳେ ଆଗକୁ ଆହୁରି ସୁଧାର ଆସିପାରେ । ହେଲେ ଲୋକମାନେ ହାଇକୋର୍ଟଙ୍କ ନିର୍ଦ୍ଦେଶର ଅନୁପାଳନ କରିବେ । 

ସେପଟେ ମୁମ୍ବାଇର ଦାଦର ଅଞ୍ଚଳରେ ବାଣ ଦୋକାନ ଲାଗିଥିବା ବେଳେ ସେଠାରେ କିଣାକିଣି କରୁଥିବା ଗ୍ରାହମାନେ ଏଥର ବାଣ ଅଧିକ ଫୁଟାଇବେ ନାହିଁ ବୋଲି କହିଛନ୍ତି । ବାୟୁ ପ୍ରଦୂଷଣକୁ ନଜରରେ ରଖି ହାଇକୋର୍ଟ ଦେଇଥିବା ରାୟକୁ ମାନିବେ ବୋଲି ସେମାନ କହିଥିବା ବେଳେ ଦିଲ୍ଲୀ ଭଳି ମୁମ୍ବାଇର ସ୍ଥିତି ନେହଉ ବୋଲି ଆଶା ପ୍ରକାଶ କରିଛନ୍ତି । 

ସେହିଭଳି ଅନ୍ୟ କିଛି ଗ୍ରାହକଙ୍କ ମତରେ, ଯେତେ ବିଳମ୍ବ ହେଉ ନା କାହିଁକି ବାଣ ଫୁଟାଇବା ବନ୍ଦ ହେବ ନାହିଁ । ଆଉ ବାଣ ଫୁଟାଇଲେ ପ୍ରଦୂଷଣ ହେବା ସ୍ବଭାବିକ । ତେଣୁ ଲୋକଙ୍କୁ ଏଥିପାଇଁ ନିୟନ୍ତ୍ରଣରେ ରଖିହେବ ନାହିଁ ବୋଲି ସେମାନେ କହିଛନ୍ତି । 

ଅନ୍ୟପଟେ କେବଳ ଲୋକମାନଙ୍କୁ କହିଲେ ହେବ ନାହିଁ ଦୋକାନଗୁଡ଼ିକ ଉପରେ କଟକଣା ଲଗାଇବା ଦରକାର ବୋଲି କିଛି ଗ୍ରାହକ ମତ ଦେଇଛନ୍ତି । ଏହା ସହ ବାଣ ଦୋକାନରେ ପ୍ରବଳ ଭିଡ ହେଉଥିବା ବେଳେ ଗ୍ରାହକମାନେ ବହୁ ମାତ୍ରାରେ କିଣାକିଣି ମଧ୍ୟ କରୁଛନ୍ତି । ଏହା ସତ୍ତ୍ବେ ହାଇକୋର୍ଟଙ୍କ ନିର୍ଦ୍ଦେଶ ପାଳନ କରାଯିବ ବୋଲି କିଛି ଦୋକାନୀ କହିଛନ୍ତି । ସେହିଭଳି ଗ୍ରୀନ କ୍ରାକର୍ସ ବିକ୍ରି ହେଉଥିବାରୁ ଏଥର ବାୟୁ ପ୍ରଦୂଷଣ ସେତେଟା ହେବ ନାହିଁ । ତଥାପି ହାଇକୋର୍ଟଙ୍କ ରାୟ ଲୋକମାନଙ୍କ ହିତରେ ହୋଇଥିବାରୁ ସେସବୁ ପାଳନ ହେବ ବୋଲି କେହି କେହି କହିଛନ୍ତି ।