ହାଇଦ୍ରାବାଦ,୧୯/୦୯:  ଅଲ ଇଣ୍ଡିଆ ମଜଲିସ୍-ଏ-ଇତ୍ତେହାଦୁଲ ମୁସଲିମିନ୍ (ଏଆଇଏମ୍ଆଇଏମ୍) ମୁଖ୍ୟ ତଥା ହାଇଦ୍ରାବାଦ ସାଂସଦ ଅସଦୁଦ୍ଦିନ ଅଓ୍ବେସି ପୁଣି ଥରେ ବିରୋଧୀଦଳର ନେତୃତ୍ୱାଧୀନ ଇଣ୍ଡିଆ (I.N.D.I.A.) ମିଳିତ ମେଣ୍ଟ ଉପରେ ଆକ୍ରମଣ କରିଛନ୍ତି। ସେ କହିଛନ୍ତି ଯେ ଯଦି ସେ ଏହି ମିଳିତ ମଞ୍ଚର ଅଂଶ ହୋଇଥାନ୍ତେ ତେବେ ସେ ଶ୍ୱାସରୁଦ୍ଧ ହୋଇଯାଇଥାନ୍ତେ। ଦିଲ୍ଲୀର ଲୋକଙ୍କୁ ସମ୍ବୋଧିତ କରି ଅଓ୍ବେସି କହିଛନ୍ତି ଯେ ସେ ଭାରତ ମିଳିତ ମେଣ୍ଟ ଅଂଶ ନୁହଁନ୍ତି। ଏପରିକି ଏହି ମେଣ୍ଟ ନର୍କକୁ ଯାଉ ବୋଲି କହିଛନ୍ତି ଅଓ୍ବେସି।

ଭାରତ ମିଳିତ ମେଣ୍ଟରେ ଯୋଗଦେବାକୁ ନିମନ୍ତ୍ରଣ ନ ପାଇବାରୁ ଅୱେସି କହିଛନ୍ତି ଯେ ସେ ଏଥିରେ ଆଦୌ ଚିନ୍ତିତ ନୁହଁନ୍ତି। ଅୱେସି କହିଛନ୍ତି, 'ଆମେ I.N.D.I.A. ମିଳିତ ମେଣ୍ଟର ନୁହେଁ କି ଏଥିପାଇଁ ମୁଁ ଚିନ୍ତା ବି କରେ ନାହିଁ। ମୁଁ ସେଠାରେ ଶ୍ୱାସରୁଦ୍ଧ ହୋଇଯାଇଥା’ନ୍ତି। ସେମାନେ କାହିଁକି ସେମାନଙ୍କ ଆଦର୍ଶକୁ ନେଇ ବିଜେପି ବିରୋଧରେ ଠିଆ ହେଉନାହାଁନ୍ତି ବୋଲି ପ୍ରଶ୍ନ କରିଛନ୍ତି ଅଓ୍ବେସି। ସେ କହିଛନ୍ତି ଯେ ଯଦି ସେମାନେ ଆମକୁ ଟିକେଟ୍ ଦିଅନ୍ତି ତେବେ ସେମାନେ ହିନ୍ଦୁ ଭୋଟ୍ ପାଇବେ ନାହିଁ। ସେ କହିଛନ୍ତି, 'ମୁଁ ଏସବୁ ଖୋଲାଖୋଲି କହୁଛି ଏବଂ ସେମାନେ ଏହାକୁ ରୁଦ୍ଧଦ୍ବାର ବୈଠକରେ ଆଲୋଚନା କରନ୍ତି।' 

ଲୋକମାନଙ୍କୁ ସମ୍ବୋଧିତ କରିବାବେଳେ ଅୱେସି ପୂର୍ବତନ କଂଗ୍ରେସ ସଭାପତି ତଥା ସାଂସଦ ରାହୁଲ ଗାନ୍ଧୀଙ୍କୁ ମଧ୍ୟ ଟାର୍ଗେଟ କରିଥିଲେ। ସେ କହିଛନ୍ତି ଯେ ୱାୟାନାଡ଼ାରେ ରାହୁଲଙ୍କ ବୁଡ଼ି ଯାଉଥିବା ଡଙ୍ଗାକୁ ମୁସଲିମ ଲିଗ୍‌ ରକ୍ଷା କରି‌ଥିଲା। ୨୦୧୯ ଲୋକସଭା ନିର୍ବାଚନରେ ଆମେଥୀ ଆସନରୁ ରାହୁଲ ହାରିଯାଇଥିଲା। ଆମେଥୀ ଗାନ୍ଧୀ ପରିବାରର ଗଡ଼ ବୋଲି ବିବେଚନା କରାଯାଏ। ଆମେଥୀ ରାହୁଲଙ୍କ ପାରମ୍ପାରିକ ଆସନ ମଧ୍ୟ ରହିଆସିଛି। କିନ୍ତୁ ଲୋକସଭା ନିର୍ବାଚନରେ ସେ ଏହି ଆସନରୁ ବିଜେପି ନେତ୍ରୀ ତଥା କେନ୍ଦ୍ର ମନ୍ତ୍ରୀ ସ୍ମୃତି ଇରାନୀଙ୍କ ଠାରୁ ହାରିଥିଲେ।

ହାଇଦ୍ରାବାଦ ସାଂସଦ ଏପରି ସମୟରେ ରାହୁଲ ଗାନ୍ଧୀଙ୍କ ଉପରେ ଘୋର ଆକ୍ରମଣ କରିଛନ୍ତି ଯେତେବଳେ କି ନିକଟରେ କଂଗ୍ରେସ ନେତା ଅଓ୍ବେସିଙ୍କୁ ନେଇ ଏକ ବିବୃତ୍ତି ଦେଇଥିଲେ। ରାହୁଲ କହିଥିଲେ ଯେ ସରକାରୀ ଏଜେନ୍ସି ମାଧ୍ୟମରେ ବିରୋଧୀ ଦଳର ନେତାଙ୍କୁ ଆକ୍ରମଣ କରାଯାଉଛି। କିନ୍ତୁ ଏଆଇଏମ୍ଆଇଏମ୍ ନେତାଙ୍କ ବିରୋଧରେ କୌଣସି ମାମଲା ପଞ୍ଜିକୃତ ହୋଇନାହିଁ, କାରଣ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସେମାନଙ୍କୁ ନିଜର ବୋଲି ବିବେଚନା କରନ୍ତି।