ସୋନପୁର, ୨୯।୦୧ : ବିଦ୍ୟୁତ୍ ଖୁଣ୍ଟରେ ପିଟିହେଲା ବାଇକ୍‌। ୨ ବାଇକ୍ ଆରୋହୀ ମୃତ। ସୋନପୁର ଜିଲ୍ଲା ବୀରମହାରାଜପୁର ଥାନା ଉଫୁଲା ନିକଟରେ ଏଭଳି ମର୍ମନ୍ତୁଦ ଦୁର୍ଘଟଣା ଘଟିଛି। ମୃତକ ହେଲେ କମୀରା ଗାଁର ସମ୍ୱିତ ପ୍ରଧାନ ଏବଂ ବୁଠୀପଦର ଗାଁର ସିପକ ନାଗ।

ସୂଚନା ଅନୁଯାୟୀ, ରବିବାର ବିଳମ୍ବିତ ରାତିରେ କମୀରା ଗାଁର ସମ୍ୱିତ ପ୍ରଧାନ ଏବଂ ବୁଠୀପଦର ଗାଁର ସିପକ ନାଗ ଏକ ବାଇକ୍‌ ଯୋଗେ ବୀରମହାରାଜପୁର ପଟରୁ ଫେରୁଥିଲେ। ଉଫୁଲା ନିକଟରେ ବାଇକ୍‌ଟି ଏକ ବିଦ୍ୟୁତ ଖୁଣ୍ଟରେ ପିଟି ହୋଇଥିଲା । ଯାହାଫଳରେ ଉଭୟ ଗାଡିରୁ ଛିଟିକି ପଡିଥିଲେ । ଦୁହିଁଙ୍କ ମୁଣ୍ଡ ମାଡ଼ ହୋଇ ପ୍ରବଳ ରକ୍ତସ୍ରାବ ହୋଇଥିଲା । ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ଉଭୟଙ୍କୁ ଆମ୍ବୁଲାନ୍ସ ଯୋଗେ ବୀରମହାରାଜପୁର ଡାକ୍ତରଖାନାରେ ଭର୍ତ୍ତି କରିଥିଲେ। ହେଲେ ସେଠାରେ ଉଭୟଙ୍କୁ ଡାକ୍ତର ମୃତ ଘୋଷଣା କରିଥିଲେ।