ନୂଆଦିଲ୍ଲୀ ୦୭/୦୯ : ଗୋଟିଏ ବିସ୍କୁଟର ମୂଲ୍ୟ ଯଦି ୧ ଲକ୍ଷ ଟଙ୍କା ବୋଲି ଆମେ କହୁ, ତେବେ ଆପଣ ନିଶ୍ଚୟ ସୁନା ବିସ୍କୁଟ କଥା ଭାବିବେ । ଏଠାରେ ମାମଲା କିନ୍ତୁ ଖାଇବା ବିସ୍କୁଟକୁ ନେଇ । ତାମିଲନାଡୁରେ ଏକ କଂଜୁମର କୋର୍ଟ ଭାରତର ଅଗ୍ରଣୀ ଫାଷ୍ଟ୍-ମୁଭିଂ କଂଜୁମର ଗୁଡ୍ସ (ଏଫ୍ଏମ୍ସିଜି) ମାର୍କେଟର୍, ଆଇଟିସି ଫୁଡ୍ ଲିଃ.କୁ ଜଣେ ଗ୍ରାହକଙ୍କୁ ୧ ଲକ୍ଷ ଟଙ୍କା ଦେବାକୁ ନିର୍ଦ୍ଦେଶ ଦେଇଛନ୍ତି।
ପି ଦିଲ୍ଲିବାବୁ ନାମକ ଗ୍ରାହକ ଅଭିଯୋଗ କରିଥିଲେ ଯେ କମ୍ପାନିର ବିସ୍କୁଟ ବ୍ରାଣ୍ଡ ‘ସନ୍ଫିଷ୍ଟ୍ ମ୍ୟାରି ଲାଇଟ୍’ର ଗୋଟିଏ ପ୍ୟାକେଟ୍ରେ ୧୫ଟି ବିସ୍କୁଟ ଥିଲା, କିନ୍ତୁ ତା’ର ଖୋଳରେ ୧୬ଟି ବିସ୍କୁଟ ଅଛି ବୋଲି ଉଲ୍ଲେଖ ହୋଇଛି । ପ୍ୟାକେଟ୍ରୁ ବାଦ୍ ପଡ଼ିଥିବା ସେହି ଗୋଟିଏ ବିସ୍କୁଟ ଏବେ କମ୍ପାନି ପାଇଁ ସବୁଠୁ ମହଙ୍ଗା ହୋଇଛି ।
ଗଣମାଧ୍ୟମ ଅନୁସାରେ, ତିରୁଭଲ୍ଲୁରର ଡିଷ୍ଟ୍ରିକ୍ଟ କଂଜୁମର ଡିସ୍ପୁଟ୍ସ ରିଡ୍ରେସାଲ ଫୋରମ୍ ଆଇଟିସି ଫୁଡ୍ସକୁ ଗ୍ରାହକଙ୍କ ଅଭିଯୋଗ କ୍ରମେ ପ୍ୟାକେଟ୍ରୁ ଗାୟବ ଗୋଟିଏ ବିସ୍କୁଟ ବାବଦକୁ ୧ ଲକ୍ଷ ଟଙ୍କା ପ୍ରଦାନ କରିବାକୁ ନିର୍ଦ୍ଦେଶ ଦେଇଛି । ଦିଲ୍ଲିବାବୁ ମକଦ୍ଦମାରେ କରିଥିବା ଖର୍ଚ୍ଚକୁ ଦୃଷ୍ଟିରେ ରଖି ଆଉ ୧୦ ହଜାର ଟଙ୍କା ଦେବାକୁ ମଧ୍ୟ କୋର୍ଟ କହିଛି । ସୂଚନାଯୋଗ୍ୟ, ଦିଲ୍ଲିବାବୁ ଏଫ୍ଏମ୍ସିଜିରେ କମ୍ପାନି ଓ ବିସ୍କୁଟ ପ୍ୟାକେଟ୍କୁ ବିକ୍ରି କରିଥିବା ଦୋକାନ ବିରୋଧରେ ୧୦୦ କୋଟି ଟଙ୍କା ଦାବି କରିଥିଲେ । ଅନୀତିକର ବ୍ୟବସାୟ ଓ ସେବା ଅଭାବ ସମ୍ପର୍କିତ କାର୍ଯ୍ୟକଳାପ ଲାଗି ୧୦ କୋଟି କ୍ଷତିପୂରଣ ମଧ୍ୟ ଦାବି କରିଥିଲେ । ମାମଲାର ଶୁଣାଣିରେ କଂଜୁମର କୋର୍ଟ ଆଇଟିସି ଫୁଡ୍ ଦେଇଥିବା ଯୁକ୍ତିକୁ ଖଣ୍ଡନ କରିଥିଲେ । ସଂଖ୍ୟା ଅନୁସାରେ ନୁହେଁ, ଓଜନ ଅନୁସାରେ ପ୍ୟାକେଟ୍ ହୋଇ ବିସ୍କୁଟ ବିକ୍ରି ହୋଇଥିଲା ବୋଲି କମ୍ପାନି ଯୁକ୍ତି କରିଥିଲା । ନିର୍ଦ୍ଦିଷ୍ଟ ବ୍ୟାଚ୍ ସଂଖ୍ୟାରେ ପ୍ୟାକ୍ହୋଇଥିବା ବିସ୍କୁଟ ବିକ୍ରିକୁ ବନ୍ଦ କରିବାକୁ ମଧ୍ୟ କୋର୍ଟ ନିର୍ଦ୍ଦେଶ ଦେଇଛନ୍ତି ।
