ୱାଶିଂଟନ୍,୨୮/୦୯: ଆମେରିକାର ଫ୍ଲୋରିଡାରେ ଗୁରୁବାର ରାତିରେ ଲ୍ୟାଣ୍ଡଫଲ୍ କରିଛି ବାତ୍ୟା 'ହେଲେନେ' । ଏହାର ପ୍ରଭାବରେ ପ୍ରତି ଘଣ୍ଟାରେ ୨୨୫ କିମି ବେଗରେ ପବନ ବହୁଛି । ୧୨ ରାଜ୍ୟରେ ଏହାର ପ୍ରଭାବ ଦେଖିବାକୁ ମିଳିଛି । ୩୯ ଜଣଙ୍କ ମୃତ୍ୟୁ ଘଟିଥିବାବେଳେ ୧ କୋଟି ୨୦ ଲକ୍ଷରୁ ଊଦ୍ଧ୍ୱର୍ ଲୋକ ପ୍ରଭାବିତ ହୋଇଛନ୍ତି । ଫ୍ଲୋରିଡା ସମେତ ଜର୍ଜିଆ, ନର୍ଥ କାରୋଲିନା, ସାଉଥ କାରୋଲିନା, ଭର୍ଜିନିଆ ଏବଂ ଆଲବାମାରେ ଜରୁରିକାଳୀନ ସ୍ଥିତି ଘୋଷଣା କରାଯାଇଛି । ଏହି ରାଜ୍ୟଗୁଡ଼ିକରେ ୧ ହଜାରରୁ ଊଦ୍ଧ୍ୱର୍ ବିମାନ ବାତିଲ କରାଯାଇଛି । ୪ ହଜାରରୁ ଅଧିକ ବିମାନ ସେବା ବାଧାପ୍ରାପ୍ତ ହୋଇଛି । ପ୍ରବଳ ବର୍ଷା ଯୋଗୁ ରାସ୍ତାଘାଟ, ଘରଦ୍ୱାର ବୁଡ଼ିଯାଇଛି । ଲୋକେ ଘର ଭିତରେ ବି ଡଙ୍ଗା ଚଲାଉଥିବାର ଦୃଶ୍ୟ ଦେଖିବାକୁ ମିଳିଛି ।
ଷ୍ଟେଟ୍ ଏମର୍ଜେନ୍ସି ସର୍ଭିସ ଅନୁସାରେ, ଆଗାମୀ ୩ ଦିନରେ ୫ କୋଟି ଲୋକ ଏଥିରେ ପ୍ରଭାବିତ ହୋଇପାରନ୍ତି । ବାତ୍ୟା ଯୋଗୁ ୪୦ ଲକ୍ଷରୁ ଊଦ୍ଧ୍ୱର୍ ଲୋକଙ୍କ ଘରେ ବିଦ୍ୟୁତ୍ ଯୋଗାଣ ଠପ୍ ହୋଇଛି । ତଳିଆ ଅଞ୍ଚଳରେ ରହୁଥିବା ଲୋକଙ୍କୁ ଉଦ୍ଧାର କରି ସୁରକ୍ଷିତ ସ୍ଥାନକୁ ପଠାଯାଇଛି । ଏହା ଏ ପର୍ଯ୍ୟନ୍ତର ସବୁଠୁ ଶକ୍ତିଶାଳୀ ଝଡ଼ ବୋଲି ଫ୍ଲୋରିଡାର ରାଜଧାନୀ ଟାଲାହୈସି ମେୟର ଜନ୍ ଡେଲି କହିଛନ୍ତି । ଏଥିଯୋଗୁ ଏହି ସହରର ବ୍ୟାପକ କ୍ଷୟକ୍ଷତି ଘଟିଛି ।
ଆମେରିକା ପାଣିପାଗ ବିଜ୍ଞାନୀ ଫିଲ୍ କ୍ଲାଟ୍ଜ୍ବୈକ୍ କହିଛନ୍ତି, ଗତ ୩୫ ବର୍ଷ ଭିତରେ କେବଳ ୩ଟି ଝଡ଼ ହେଲେନ୍ଠାରୁ ବଡ଼ ଥିଲା । ୨୦୧୭ରେ ଇରମା, ୨୦୦୫ରେ ୱିଲ୍ମା ଏବଂ ୧୯୯୫ରେ ଓପଲ୍ ବଡ଼ ଝଡ଼ ଥିଲା । ହେଲେନ ପ୍ରଭାବରେ ଲଗାତର ବର୍ଷା ଯୋଗୁ ନର୍ଥ କାରୋଲିନାରେ ସ୍ୱାନ୍ନାନୋଆ ନଦୀ ବିପଦସଙ୍କେତ ସ୍ତର ଟପିଛି । ଅନେକ ସ୍ଥାନରେ ବନ୍ୟା ସ୍ଥିତି ଉପୁଜିଛି । ଦକ୍ଷିଣପୂର୍ବ ଅଞ୍ଚଳରେ ବନ୍ୟା ସହ ଭୂସ୍ଖଳନ ଆଶଙ୍କା ବଢ଼ିଛି।
