ଭୁବନେଶ୍ୱର,୨୫/୦୩: ବଦଳିବ କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (ସିବିଏସ୍ଇ) ସିଲାବସ୍ । ଯୋଡ଼ି ହେବ ନୂଆ ବିଷୟ । ୨୦୨୪-୨୫ ଶିକ୍ଷା ବର୍ଷରୁ ଲାଗୁ ହେବ ଏହି ସବୁ ପାଠ୍ୟକ୍ରମ । ମାଧ୍ୟମିକ, ଉଚ୍ଚ ମାଧ୍ୟମିକ ଶ୍ରେଣୀ ପାଇଁ ନୂଆ କରିକୁଲ୍ମ ପ୍ରସ୍ତୁତ କରାଯାଇଛି । ତୃତୀୟ ଓ ଷଷ୍ଠ ଶ୍ରେଣୀର ସମ୍ପୂର୍ଣ୍ଣ ସିଲାବସ୍ରେ ପରିବର୍ତ୍ତନ କରାଯିବ । ଏନେଇ ଏନ୍ସିଇଆର୍ଟି ପକ୍ଷରୁ ଏସମସ୍ତ ପୁସ୍ତକ ପ୍ରସ୍ତୁତି କରାଯାଉଛି । ଖୁବ୍ ଶୀଘ୍ର ଏହି ସମସ୍ତ ପୁସ୍ତକ ପ୍ରକାଶିତ ହେବ । ଏନେଇ ଆଜି ସିବିଏସ୍ଇ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ଆସନ୍ତା ଏପ୍ରିଲ୍ ୧ରୁ ୨୦୨୪-୨୫ ପାଇଁ କ୍ଲାସ୍ ଆରମ୍ଭ ହେବ ।
ସିବିଏସ୍ଇ ନବମ ଓ ଦ୍ୱାଦଶ ଶ୍ରେଣୀର ସିଲାବସରେ ଏକାଡେମିକ୍ କଣ୍ଟେଣ୍ଟ ରହିବ । ପରୀକ୍ଷା ପାଇଁ ସିଲାବସ୍ ରହିବ । ଶିକ୍ଷଣୀୟ ଫଳାଫଳ ଏବଂ ଶିକ୍ଷାଗତ ଅଭ୍ୟାସ ସହ ଆସେସ୍ମେଣ୍ଟ ଗାଇଡ୍ଲାଇନ୍ ଆଦି ରହିବ । ଯାହା ଫଳରେ ପିଲାମାନେ ନିଜର ବୋର୍ଡ ପରୀକ୍ଷାରେ ସର୍ବଶ୍ରେଷ୍ଠ ପ୍ରଦାନ କରିବେ । ବହୁମୁଖୀ ଭାଷା, କଳାକୃତି ଶିକ୍ଷା, ଅଭିଜ୍ଞତାସମ୍ପର୍ଣ୍ଣ ଶିକ୍ଷା ଆଦିକୁ ଗୁରୁତ୍ୱ ଦିଆଯିବ । ନ୍ୟାସନାଲ୍ କରିକୁଲମ୍ ଫ୍ରେମ୍ୱାର୍କ ଫର୍ ସ୍କୁଲ୍ ଏଜୁକେସନ-୨୦୨୩କୁ ସିବିଏସ୍ଇ ଗୁରୁତ୍ୱ ଦେଇ ଏପରି ନିଷ୍ପତ୍ତି ନେଇଛି ।
ସେହିପରି ତୃତୀୟ ଓ ଷଷ୍ଠ ଶ୍ରେଣୀର ସିଲାବସ୍ରେ ପରିବର୍ତ୍ତନ କରାଯିବ । ଏନ୍ସିଇଆର୍ଟି ପକ୍ଷରୁ ପାଠ୍ୟପୁସ୍ତକକୁ ପ୍ରସ୍ତୁତ କରାଯାଉଛି । ଏହା ଖୁବ୍ ଶୀଘ୍ର ଶେଷ ହେବ ବୋଲି ଏନ୍ସିଇଆର୍ଟି ପକ୍ଷରୁ ଗତ ୧୮ ତାରିଖ ଦିନ ଏକ ଚିଠିରେ ସିବିଏସ୍ଇକୁ କୁହାଯାଇଛି । ଜାତୀୟ ଶିକ୍ଷା ନୀତି ୨୦୨୦କୁ ଆଧାର କରି ସିବିଏସ୍ଇ ନିର୍ଦ୍ଦେଶ କ୍ରମେ ପାଠ୍ୟକ୍ରମରେ ପରିବର୍ତ୍ତନ କରାଯାଇଛି ।
ସିବିଏସ୍ଇ ପକ୍ଷରୁ ସ୍ପଷ୍ଟ ଭାବେ କୁହାଯାଇଛି ଯେ, ଏନ୍ସିଇଆର୍ଟି ପକ୍ଷରୁ ଯେଉଁ ପର୍ଯ୍ୟନ୍ତ ନୂଆ ପୁସ୍ତକ ପ୍ରକାଶ ପାଇନାହିଁ ତେବେ ସେ ପର୍ଯ୍ୟନ୍ତ ୨୦୨୩ ପାଇଁ ଏନ୍ସିଇଆର୍ଟି ପ୍ରକାଶିତ ପୁସ୍ତକକୁ ଅନୁସରଣ କରାଯିବ । ଅନ୍ୟ କୌଣସି ଶ୍ରେଣୀର ପାଠ୍ୟକ୍ରମରେ ପରିବର୍ତ୍ତନ କରାଯାଇନାହିଁ । ୨୦୨୪-୨୫ ଶିକ୍ଷାବର୍ଷ ପାଇଁ ସିବିଏସ୍ଇ ୱେବ୍ସାଇଟ୍ରେ କରିକୁଲମ୍ ପ୍ରକାଶିତ ଅଛି । ଏହାକୁ ସମସ୍ତ ସ୍କୁଲ୍ ଅଧ୍ୟକ୍ଷଙ୍କୁ ଚିଠି କରାଯାଇଛି ।
