କାଶୀପୁର, ୦୭/୦୨ : କାଶୀପୁର ବ୍ଲକର ବିଭିନ୍ନ ସ୍ଥାନରେ ଛତୁ ଫୁଟିବା ଭଳି ଖୋଲା ଯାଇଛି ଘରୋଇ କ୍ଲିନିକ ଏବଂ ପାଥୋଲୋଜି। ପାଥୋଲୋଜିରେ ରୋଗୀଙ୍କ ରକ୍ତ ଓ ମଳ ମୂତ୍ର ପରୀକ୍ଷା କରିଯିବା ସହ କ୍ଲିନିକରେ ଚିକିତ୍ସା କରାଯାଉଛି। ହେଲେ ଅଧିକାଂଶ କ୍ଲିନିକ ଏବଂ ପାଥୋଲୋଜି ସରକାରଙ୍କ ନିୟମ ଅନୁଯାୟୀ ପଞ୍ଜିକୃତ ହୋଇ ନଥିବା ଜଣାଯାଇଛି। ପ୍ରତ୍ୟେକ କ୍ଲିନିକ୍ ଓ ପାଥୋଲୋଜି ଆଗରେ ପଞ୍ଜିକୃତ ସଂଖ୍ୟା ଲେଖାଥିବା ସୂଚନା ଫଳକ ଟଙ୍ଗା ଯିବାର ନିୟମ ରହିଛି। କିନ୍ତୁ ବିଭାଗୀୟ ଅଧିକାରୀଙ୍କ କଟକଣା ଅଭାବରୁ ଏହା କାର୍ଯ୍ୟକାରୀ ହେଉ ନଥିବାର ଅଭିଯୋଗ ହେଉଛି।

କାଶୀପୁର ବ୍ଲକ ସଦର ଏବଂ ଟିକିରିରେ ଥିବା କ୍ଲିନିକ ଆଗରେ ଟଙ୍ଗା ହୋଇଥିବା ଫଳକରେ ସରକାରଙ୍କ ପଞ୍ଜିକୃତ ସଂଖ୍ୟା ଉଲ୍ଲେଖ କରାଯାଇ ନଥିବାରୁ ଏହା ବେଆଇନ ଭାବେ ଚାଲୁ ଥିବାର ଅଭିଯୋଗ କରାଯାଉଛି। ଏ ସମ୍ପର୍କରେ କାଶୀପୁର ସିଏଚସି ଇନଚାର୍ଜ ଡାକ୍ତର ଏନଏନ ନାୟକଙ୍କୁ ପଚାରିବାରୁ ବ୍ଲକ ମଧ୍ୟରେ ସରକାରଙ୍କ ନିୟମ ଅନୁସାରେ ପଞ୍ଜିକୃତ ହୋଇଥିବା କୌଣସି କ୍ଲିନିକ ନଥିବା କହିଛନ୍ତି। ଆବଶ୍ୟକ ଶିକ୍ଷାଗତ ଯୋଗ୍ୟତା ନଥିବା ଅନଭିଜ୍ଞଙ୍କ ଦ୍ଵାରା ଚିକିତ୍ସା କରାଯାଉ ଥିବାରୁ ରୋଗୀଙ୍କ ଜୀବନ ପ୍ରତି ଭୟ ରହୁଛି। ତେବେ ବେଆଇନ ଭାବେ ଚାଲିଥିବା କ୍ଲିନିକ, ପାଥୋଲୋଜି ପ୍ରତି ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରାଯାଉଛି।