ସମ୍ବଲପୁର ୧୦/୦୬: ସମ୍ବଲପୁର ପ୍ରସିଦ୍ଧ ଶୀତଳ ଷଷ୍ଠୀ ଯାତ୍ରା ପାଇଁ ପୁଲିସ ପ୍ରଶାସନ ପକ୍ଷରୁ ସହରରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି । କିଭଳି ଭାବେ ସୁରୁଖୁରୁରେ ଯାତ୍ରା ସମାପନ ହେବ ସେନେଇ ସମସ୍ତ ପ୍ରସ୍ତୁତି ଚୂଡ଼ାନ୍ତ ହୋଇଛି । ସୋମବାର ରାତିରୁ ବରଯାତ୍ରୀ ଶୋଭାଯାତ୍ରାରୁ ନେଇ ୧୨ ତାରିଖରେ ଦେବ ଦେବ ମହାଦେବ ଓ ମାତା ପାର୍ବତୀଙ୍କର ମନ୍ଦିର ପ୍ରବେଶ ଯାଏ ସହରରେ ଗାଡ଼ିମଟର ଚଳାଚଳ ଉପରେ ଆଂଶିକ କଟକଣା ବଳବତ୍ତର ରହିବ । ଏହି ସମୟରେ ସୁରକ୍ଷା ବ୍ୟବସ୍ଥା ଉପରେ ନଜର ରଖିବାକୁ ମୋଟ ୩୨ ପ୍ଲାଟୁନ୍ ଫୋର୍ସ ମୁତୟନ ହେବେ । ଏଥିସହ ୨୨୫ ଜଣ ଅଫିସର ମଧ୍ୟରେ ଜଣେ ଏସ୍ପି, ୪ ଅତିରିକ୍ତ ଏସ୍ପି, ୧୫ଡ଼ିଏସ୍ପି, ୪୪ ଇନିସ୍ପେକ୍ଟର, ୧୬୧ ଏଏସ୍ଆଇ ଓ ଏସ୍ଆଇ ରହିଛନ୍ତି । ଏଥିସହ ୩୫ ଜଣ ହାବିଲଦାର, ୨୦୪ ଜଣ କଷ୍ଟେବଲ, ୬୬ ଜଣ ମହିଳା କନଷ୍ଟେବଲ, ୪୫୫ ଜଣ ହୋମଗାର୍ଡ଼ ରହିଥିବା ବେଳେ ୫୧ ଜଣ ଟ୍ରାଫିକ୍ କନଷ୍ଟେବଲ ରହିଛନ୍ତି ବୋଲି ଡିଆଇବି ଡିଏସ୍ପି ବାଲେଶ୍ୱର ଗିଧି ସୂଚନା ଦେଇଛନ୍ତି ।
ସମ୍ବଲୁପୁର ସହରରେ ଗତ ବର୍ଷ କର୍ଫ୍ୟୁ ହୋଇଥିବା ବେଳେ ଏହି ସମୟରେ ରେକର୍ଡ଼ ସଂଖ୍ୟକ ପୁଲିସ ମୁତୟନ ହୋଇଥିଲା । ଚଳିତ ବର୍ଷ ସମ୍ବଲପୁର ଶାନ୍ତ ରହିଥିବାରୁ ବିଗତ ବର୍ଷରେ ଯେମିତି ପୁଲିସ ମୁତୟ କରାଯାଏ ଠିକ ସେହିପରି କରାଯାଇଛି । ଷଷ୍ଠୀ ଶୋଭାଯାତ୍ରା ସହରର ଅନେକ ଗଳି ଦେଇ ଯାଇଥାଏ । ଏହି ଶୋଭାଯାତ୍ରାରେ ଏଥର ଉଭୟ ଏସ୍ପି ଓ ଜିଲ୍ଲାପାଳ ନୂତନ ରହିଥିବା ବେଳେ ଏହାକୁ ସୁରୁଖୁରୁରେ କରିବାକୁ ପ୍ରଶାସନ ପାଇଁ କାଠିକର ପାଠ ହେବ ବୋଲି କୁହାଯାଉଛି । ଅନେକ ସମୟରେ ପ୍ଲାଏ ଓଭରେ ଛୋଟ ବଡ଼ ଘଟଣା ଘଟିଯାଏ । ତେଣୁ ଏହାକୁ ଦୃଷ୍ଟିରେ ରଖି ଆଜି ଠାରୁ ଫ୍ଲାଏ ଓଭରକୁ ବେରିଗେଟିଂ ଦ୍ୱାରା ବନ୍ଦ କରିଦିଆଯାଇଛି ।
ଚଳିତ ବର୍ଷ ସମ୍ବଲପୁର ସହରରେ ୨୨ଟି କମିଟି ପକ୍ଷରୁ ଶୀତଳଷଷ୍ଠୀ ଯାତ୍ରା ହେଉଛି । ଯାହା ମଧ୍ୟରେ ନନ୍ଦପଡ଼ା, ଝାଡ଼ୁଆପଡ଼ା, ମୁଦିପଡ଼ା, ଗୁଦଲିଆବନ୍ଧ, ବାଲିବନ୍ଧା, ଦେଉଳବନ୍ଧ, ବାଲିବନ୍ଧା, ଶାଲିଆବଗିଚା, ଦଲେଇପଡ଼ା, ବଡ଼ବଜାର, ଠାକୁରପଡ଼ା, ଦୁର୍ଗାପାଲି, ବୁଢ଼ାରଜା, କଟରଧୂଆ, ବରେଇପାଲି, ସିନ୍ଦୁରପଙ୍କ, ମାନେଶ୍ୱର, ଭତରା, ସାକ୍ଷୀପଡ଼ା, କୁଲୁଥକାନି ପଡ଼ା ରହିଛି । ଏହାକୁ ବାଦ୍ ଦେଇ ବୁର୍ଲା, ହୀରାକୁଦ ବିଭିନ୍ନ ସ୍ଥାନରେ ମଧ୍ୟ ଷଷ୍ଠୀ ଯାତ୍ରା ହେଉଛି । ଏମାନଙ୍କ ମଧ୍ୟରେ ୫ଟି କମିଟି ଗ୍ରାଣ୍ଡ ଶୋଭାଯାତ୍ରା କରୁଛନ୍ତି ।
ସେପଟେ, ଷଷ୍ଠୀ ପାଇଁ ସହରରେ ୨ଟି ମୀନାବଜାର ମଧ୍ୟ ଲାଗିଛି । ଗୋଟିଏ ଅଇଁଠାପାଲି ପିଏଚ୍ଡି ପଡ଼ିଆରେ ଓ ଅନ୍ୟଟି ଧନୁପାଲି ଥାନା ଅନ୍ତର୍ଗତ ଚାରଭାଟି ପାଖରେ ରହିଛି । ଫଳରେ ଯାତ୍ରା ସମୟରେ ବିପୁଳ ଜନସମାଗମ ହେବାର ସମ୍ଭାବନା ରହିଥିବାରୁ ଗାଡ଼ି ମଟର ଚଳାଚଳ ଉପରେ ଆଂଶିକ କଟକଣା ଲାଗୁ ହୋଇଛି । ୧୦ ତାରିଖରେ ବରାତ ଥିବା ରୁଟ୍ରେ ଗାଡ଼ି ମଟର ବନ୍ଦ ଥିବା ବେଳେ ୧୧ ଓ ୧୨ ତାରିଖ ସହର ମଧ୍ୟକୁ ଚାରି ଚକିଆ ଯାନ ଛଡ଼ାଯିବ ନାହିଁ । ସହରକୁ ରେମେଡ଼, ପଞ୍ଚଗୋଛିଆ ଓ କାବେରୀ ହୋଟେଲ ଦେଇ ପସିବା ପାଇଁ ବ୍ୟବସ୍ଥା ରହିଛି । ବିଶେଷକରି ଶୋଭାଯାତ୍ରା ସମୟରେ ଅଇଁଠାପାଲି ବୁଢ଼ାରଜା ପଟରୁ ଚର୍ଚ୍ଚ ଛକ ଦେଇ ଲକ୍ଷ୍ମୀଟକିଜ ଯାଏ ରାସ୍ତାରେ ପ୍ରବେଶ ଦିଆଯିବ ନାହିଁ ।, ଜେଲ୍ ଛକରୁ ଜିଲ୍ଲା ସ୍କୁଲ ଛକ ଦେଇ ଲକ୍ଷ୍ମୀଟକିଜ ଓ ଗୋଲବଜାର ରାସ୍ତା, ସରଲାକାନିରୁ ଶକ୍ତି ମିଷ୍ଠାନ୍ନ ଭଣ୍ଡାର ରାସ୍ତା, ମୁଦିପଡ଼ା-ଲକ୍ଷ୍ମୀଟକିଜ ରାସ୍ତାରେ କଟକଣା ଲାଗୁ କରାଯାଇଛି । ଧନୁପାଲି ପଟରୁ ଜେଲ୍ ଛକକୁ ଆସୁଥିବା ଚାରିଚକିଆ ଗାଡ଼ିଗୁଡ଼ିକୁ ରିଂ ରୋଡ୍ ଦେଇ ବାହାରକୁ ଛଡ଼ାଯିବ ବୋଲି ସୂଚନା ମିଳିଛି ।