ଅହମ୍ମଦାବାଦ: ଆଇପିଏଲ୍ ୨୦୨୪ର ଏଲିମିନେଟର ମ୍ୟାଚ୍ ରାଜସ୍ଥାନ ରୟାଲ୍ସ ଏବଂ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ମଧ୍ୟରେ ଅହମ୍ମଦାବାଦରେ ଖେଳାଯିବ । ଆଜି ରାତି ୭ଟା ୩୦ରେ ଖେଳ ଆରମ୍ଭ ହେବାକୁ ଥିବା ବେଳେ ଏବେ ବିରାଟ କୋହଲିଙ୍କୁ ନେଇ ଏକ ବଡ଼ ଖବର ସାମ୍ନାକୁ ଆସିଛି । ଯେଉଥି ପାଇଁ ବେଙ୍ଗାଲୁରୁ ଟିମ୍ ମ୍ୟାଚ୍ ପୂର୍ବରୁ ନିଜର ପ୍ରାକ୍ଟିସ୍ ସେସନ ରଦ୍ଦ କରିଦେଇଛି ।
ବିରାଟ କୋହଲିଙ୍କ ଜୀବନ ପ୍ରତି ବିପଦ ଥିବା ଆଶଙ୍କା କରି ଆରସିବି ଟିମ୍ ଅଭ୍ୟାସ୍ କରିପାରି ନାହିଁ । ଏହା ସହ ଟିମ ପକ୍ଷରୁ ହେବାକୁ ଥିବା ସାମ୍ବାଦିକ ସମ୍ମିଳନୀ ମଧ୍ୟ ରଦ୍ଦ କରାଯାଇଛି । କିନ୍ତୁ ଏନେଇ କୌଣସି ଔପଚାରିକ ସୂଚନା ମିଳିପାରି ନାହିଁ । ସପଟେ ମିଳିଥିବା ସୂଚନା ଅନୁସାରେ, ଗୁଜରାଟ ପୋଲିସ ୪ ଜଣ ସନ୍ଦିଗ୍ଧଙ୍କୁ ଗିରଫ କରିଛି । ସେମାନେ ସମସ୍ତେ ଆତଙ୍କବାଦୀ କାର୍ଯ୍ୟକଳାପ ସହ ଜଡ଼ିତ ଥାଇପାରନ୍ତି ବୋଲି ପୋଲିସ ସନ୍ଦେହ କରୁଛି । ତେବେ ବିରାଟ କୋହଲିଙ୍କ ସୁରକ୍ଷା ଦୃଷ୍ଟିରୁ ଆରସିବି ପ୍ରାକ୍ଟିସ୍ ସେସନ ରଦ୍ଦ କରିଛି ।
ଆଜି ରାଜସ୍ଥାନ ଏବଂ ବେଙ୍ଗାଲୁରୁ ମଧ୍ୟରେ ନକଆଉଟ୍ ମ୍ୟାଚ୍ ଖେଳାଯିବ । ଏହି ମ୍ୟାଚ୍ରେ ଯେଉଁ ଟିମ୍ ବିଜୟୀ ହେବ ହାଇଦ୍ରାବାଦ ସହ ଖେଳିବ । ଯେଉଁ ଟିମ୍ ପରାସ୍ତ ହେବ ତାକୁ ଚଳିତ ଆଇପିଏଲରୁ ବିଦାୟ ନେବାକୁ ପଡ଼ିବ । ଏହା ପୂର୍ବରୁ ପ୍ରଥମ କ୍ବାଲିଫାଏର ମ୍ୟାଚ୍ରେ ହାଇଦ୍ରାବାଦକୁ ହରାଇ କୋଲକାତା ନାଇଟ୍ ରାଇଡର୍ସ ଆଇପିଏଲ ୨୦୨୪ରେ ଫାଇନାଲକୁ ପ୍ରବେଶ କରିସାରିଛି ।
