ଭୁବନେଶ୍ୱର,୦୪/୦୨: ରାଜ୍ୟ ବଜେଟ ଆକାର ବଢ଼ିବ । ବ୍ୟୟବରାଦ ପୂର୍ବ ବର୍ଷ ତୁଳନାରେ ପାଖାପାଖି ୧୨% ପର୍ଯ୍ୟନ୍ତ ବଢ଼ିପାରେ । ସୂତ୍ରରୁ ଜଣାପଡ଼ିଛି, ୨୦୨୪-୨୫ ଆର୍ଥିକ ବର୍ଷରେ ବଜେଟ ବ୍ୟୟ ଅଟକଳ ୨ ଲକ୍ଷ ୬୦ ହଜାର କୋଟି ଟଙ୍କା ଟପିପାରେ । ଏ ସମ୍ପର୍କିତ କାମଚଳା ଚିଠା ବଜେଟ ପ୍ରସ୍ତାବକୁ ଶନିବାର ରାଜ୍ୟ ମନ୍ତ୍ରୀ ପରିଷଦ ଅନୁମୋଦନ ଦେଇଛି । ଆସନ୍ତା ୮ ତାରିଖରେ ଅର୍ଥମନ୍ତ୍ରୀ ବିକ୍ରମ ଆରୁଖ ବିଧାନସଭାରେ ବଜେଟ୍ ଉପସ୍ଥାପନ କରିବେ ।
ଆଗକୁ ନିର୍ବାଚନ ଥିବାରୁ ପରମ୍ପରା ମୁତାବକ ସରକାର ପୂର୍ଣାଙ୍ଗ ବଜେଟ୍ ବଦଳରେ କାମଚଳା ବଜେଟ୍ ଉପସ୍ଥାପନ କରିବେ । ନିର୍ବାଚନ ପରେ ନୂଆ ସରକାର ପୂର୍ଣାଙ୍ଗ ବଜେଟ୍ ଉପସ୍ଥାପନ କରିବେ । କାମଚଳା ବଜେଟରେ କାର୍ଯ୍ୟକ୍ରମ ଖର୍ଚ୍ଚ (ଯୋଜନା ବ୍ୟୟ) ପାଖାପାଖି ଦେଢ଼ ଲକ୍ଷ କୋଟି ଟଙ୍କା ଛୁଇଁବ ବୋଲି ଅନୁମାନ କରାଯାଉଛି । ୨୦୨୩-୨୪ ବଜେଟରେ ମୋଟ ବ୍ୟୟ ଅଟକଳ ୨ ଲକ୍ଷ ୩୦ ହଜାର କୋଟି ଥିଲା । ଏଥିରୁ କାର୍ଯ୍ୟକ୍ରମ ଖର୍ଚ୍ଚ ପାଇଁ ୧ ଲକ୍ଷ ୨୫ ହଜାର କୋଟି ଟଙ୍କା ବ୍ୟୟ ଅଟକଳ ଥିଲା ।
କେନ୍ଦ୍ରୀୟ ଟିକସରେ ରାଜ୍ୟର ଭାଗ ବାବଦରେ ଓଡ଼ିଶା ଏଥର ୫୫ ହଜାର କୋଟି ଟଙ୍କା ପାଇବ । ପାଖାପାଖି ୩୫ ହଜାର କୋଟି ଟଙ୍କାର କେନ୍ଦ୍ରୀୟ ଅନୁଦାନ ମିଳିପାରେ । ଏଣୁ କେନ୍ଦ୍ରୀୟ ସୂତ୍ରରୁ ପାଖାପାଖି ୯୦ ହଜାର କୋଟି ଟଙ୍କା ମିଳିବ । ପୂରା ଆର୍ଥିକ ବର୍ଷ ପାଇଁ ଆୟ ବ୍ୟୟ ପ୍ରସ୍ତାବ ଦେବା ସହିତ ସରକାର ୪ ମାସ (ଜୁଲାଇ ଯାଏ) ପାଇଁ ଆବଶ୍ୟକ ଅର୍ଥ ଖର୍ଚ୍ଚ ପାଇଁ ବିଧାନସଭାର ଅନୁମତି ଲୋଡ଼ିବେ ।
