ନୀଳଗିରି,୨୪/୦୮: ନୀଳଗିରି ବ୍ଲକ ଅଧୀନ  ଧୋବଶିଳା ଉଦୟ ନାରାୟଣ ବିଦ୍ୟାପୀଠରେ ପୂର୍ବରୁ କାର୍ଯ୍ୟରତ ହିନ୍ଦୀ ଶିକ୍ଷକ ଚାକିରୀ ହରାଇ ଦୀର୍ଘ ୨୦ ବର୍ଷ ନ୍ୟାୟିକ ସଂଘର୍ଷ ଜାରି ରଖିଥିଲେ । ଶେଷରେ ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ୨୦  ବର୍ଷ ପରେ ଚାକିରି ଫେରିପାଇଛନ୍ତି ହିନ୍ଦୀ ଶିକ୍ଷକ ରମେଶ ଚନ୍ଦ୍ର ପରିଡ଼ା । ମାଜିଷ୍ଟ୍ରେଟଙ୍କ ଉପସ୍ଥିତିରେ ଶୁକ୍ରବାର ସେ କାର୍ଯ୍ୟରେ ଯୋଗଦାନ କରିଥିବା ବେଳେ ତାଙ୍କ ସ୍ଥାନରେ ୨୦  ବର୍ଷ ଚାକିରୀ କରିଥିବ ଶିକ୍ଷୟିତ୍ରୀ ବିନୋଦିନୀ ନାୟକଙ୍କ ଭାଗ୍ୟ କ’ଣ ହେବ ତାହା ଅସ୍ପଷ୍ଟ । ସଂପୃକ୍ତା ଶିକ୍ଷୟିତ୍ରୀ ନିଜ ଚାକିରି ନେଇ ନ୍ୟାୟ ଆଶାରେ ଉପରିସ୍ଥ ଅଧିକାରୀଙ୍କ ଠାରୁ ଆରମ୍ଭ  କରି ସାଂସଦଙ୍କ ଉପରେ ଭରଷା କରିଛନ୍ତି ।   

ସୂଚନାଯୋଗ୍ୟ ନୀଳଗିରି ବ୍ଲକ ଧୋବଶିଳା  ଉଦୟ ନାରାୟଣ ବିଦ୍ୟାପୀଠରେ ୧୯୯୧  ମସିହାରେ ହିନ୍ଦୀ ଶିକ୍ଷକ ଭାବେ ରମେଶ  ଚନ୍ଦ୍ର ପରିଡ଼ା କାର୍ଯ୍ୟରେ ଯୋଗ ଦେଇଥିଲେ । ୨୦୦୪ ମସିହାରେ ତତ୍କାଳୀନ ପ୍ରଧାନଶିକ୍ଷକ  ତାଙ୍କୁ ଦୀର୍ଘବର୍ଷ ଅନୁପସ୍ଥିତ ରହିବା କାରଣରୁ ତାଙ୍କ ସ୍ଥାନରେ ବିନୋଦିନୀ ନାୟକଙ୍କୁ ନିଯୁକ୍ତି  ଦେଇଥିଲେ । ସେହି ଦିନଠାରୁ ଶ୍ରୀମତୀ ନାୟକ  ବିଦ୍ୟାଳୟରେ କାର୍ଯ୍ୟରତ ଅଛନ୍ତି । ଇତିମଧ୍ୟରେ ସେ ସରକାରୀ ମାନ୍ୟତା ମଧ୍ୟ ପାଇ ସାରିଛନ୍ତି ।  ହେଲେ ନ୍ୟାୟ ପାଇଁ ପୁରାତନ ଶିକ୍ଷକ ଶ୍ରୀ  ପରିଡ଼ା ରାଜନେତାଙ୍କ ଠାରୁ ଆରମ୍ଭ କରି ବିଭାଗୀୟ ଅଧିକାରୀଙ୍କ ପାଖକୁ ଦୌଡ଼ି ନିରାଶ  ହେବା ପରେ କୋର୍ଟଙ୍କ ଦ୍ୱାରସ୍ଥ ହୋଇଥିଲେ ।  ହାଇକୋର୍ଟରୁ ନିରାଶ ହେବା ପରେଶେଷରେ  ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ ।  

ସୁପ୍ରିମକାର୍ଟ ତାଙ୍କ ସପକ୍ଷରେ ରାୟ ଦେଇଥିଲେ । ହେଲେ ଏହି ରାୟ ସତ୍ତେ୍ୱ ସେ ଦୀର୍ଘଦିନ ଧରି  ଚାକିରୀରେ ଯୋଗଦାନ କରି ପାରିନଥିଲେ । ଜିଲ୍ଲା ଶିକ୍ଷାଧିକାରୀଙ୍କ ନିର୍ଦ୍ଦେଶ ପରେ ମଧ୍ୟ ପ୍ରଧାନ  ଶିକ୍ଷକ ଏହା କାର୍ଯ୍ୟକାରୀ କରୁନଥିବା ବେଳେ ବିଦ୍ୟାଳୟର ପରିଚାଳନା କମିଟି ଶିକ୍ଷୟିତ୍ରୀ  ଶ୍ରୀମତୀ ନାୟକଙ୍କ ସପକ୍ଷରେ ଥିଲେ । ପରେ  ଶ୍ରୀ ପରିଡ଼ା ସାଂସଦ ପ୍ରତାପ ଷଡ଼ଙ୍ଗୀଙ୍କ ପାଖକୁ  ଯାଇ ନ୍ୟାୟ ଭିକ୍ଷା କରିଥିଲେ । ସାଂସଦ କୋର୍ଟ  ନିର୍ଦ୍ଦେଶ ପାଳନ କରିବା ନେଇ ଜିଲ୍ଲାପାଳଙ୍କ ଦୃଷ୍ଟି  ଆକର୍ଷଣ କରିଥିଲେ । ଶେଷରେ ଶୁକ୍ରବାର ଜିଲ୍ଲା  ଶିକ୍ଷାଧିକାରିଣୀ ପ୍ରତିଭା ମଞ୍ଜରୀ ଦାସ, ଅତିରିକ୍ତ  ଜିଲ୍ଲା ଶିକ୍ଷାଧିକାରିଣୀ, ବ୍ଲକ ଶିକ୍ଷାଧିକାରିଣୀ,  ମାଜିଷ୍ଟ୍ରେଟ ବିଦ୍ୟାଳୟକୁ ଯାଇ ପୁରାତନ ହିନ୍ଦୀ  ଶିକ୍ଷକ ରମେଶ ପରିଡ଼ାଙ୍କୁ ଦାୟିତ୍ୱ ଅର୍ପଣ  କରିଥିଲେ । ଅପରପକ୍ଷେ ତାଙ୍କ ସ୍ଥାନରେ ଦୀର୍ଘ ୨୦  ବର୍ଷ ଚାକିରୀରେ ଅବସ୍ଥାପିତ ହୋଇ ସରକାରୀ  ମାନ୍ୟତା ପାଇଥିବା ଶିକ୍ଷୟିତ୍ରୀ ବିନୋଦିନୀ ନାୟକ  ନିଜର ଭବିଷ୍ୟତ ନେଇ ଚିନ୍ତାରେ ପଡ଼ିଛନ୍ତି ।  ତେବେ ଜିଲ୍ଲା ଶିକ୍ଷାଧିକାରିଣୀ ଉଭୟ ଶିକ୍ଷାଦାନ  ଜାରି ରଖିବେ ଓ ଏନେଇ ନିର୍ଦ୍ଦେଶନାମା  ପ୍ରଦାନ କରିବେ ବୋଲି ପ୍ରତିଶ୍ରୁତି ଦେଇଛନ୍ତି ।