ବେଙ୍ଗଲୁରୁ, ୨୪/୦୩: କାର୍ ଭିତରୁ ୩ ଜଣଙ୍କ ଅର୍ଦ୍ଧ ଦଗ୍ଧ ମୃତଦେହ ମିଳିଛି । କର୍ଣ୍ଣାଟକର ଟୁମାକୁରୁ ଜିଲ୍ଲା ବେଲ୍ଟହାଙ୍ଗଡ଼ି ଅଞ୍ଚଳରୁ ମରଶରୀର ମିଳିଥିବା ବେଳେ ଟଙ୍କା ପାଇଁ ବିଭତ୍ସ ହତ୍ୟା କରାଯାଇଥିବା ସନ୍ଦେହ କରୁଛି ପୋଲିସ ।
ଟୁମାକୁରୁ ପୋଲିସ ଅଧୀକ୍ଷକ ଅଶୋକ କେ ଭି କହିଛନ୍ତି, ତଦନ୍ତକାରୀ ଟିମକୁ ହତ୍ୟାକାରୀଙ୍କ ବାବଦରେ ପ୍ରମାଣ ମିଳିଛି । ଖୁବଶୀଘ୍ର ଅଭିଯୁକ୍ତମାନଙ୍କୁ ଧରିବାରେ ଟିମ୍ ସଫଳ ହେବ ବୋଲି କହିଛନ୍ତି ଏସପି । ଟୁମାକୁରୁ ସହର ଉକଣ୍ଠରେ ଥିବା କୁଚାଙ୍ଗି ଗାଁ ନିକଟ ନାଳ କଡ଼ରେ ଥିବା କାରରୁ ୩ ଜଣଙ୍କ ମୃତଦେହ ମିଳିଛି ।
୩ ଜଣଙ୍କ ସହ ଦୁର୍ବୃତ୍ତ କାରରେ ନିଆଁ ଲଗାଇ ଦେଇଥିବା ପୋଲିସ ସନ୍ଦେହ କରୁଛି । ମୃତକ ମାଙ୍ଗାଲୁରୁ ଜିଲ୍ଲାର । ହତ୍ୟାକାଣ୍ଡରେ ସାମିଲ୍ ଅଭିଯୁକ୍ତଙ୍କୁ ନେଇ ପୋଲିସକୁ ସୁରାକ୍ ମିଳିଛି । ଟଙ୍କା ଦେଣନେଣକୁ ନେଇ ଏହି ହତ୍ୟାକାଣ୍ଡ ହୋଇଥିବା ପୋଲିସ ।
ଫରେନସିକ୍ ରିପୋର୍ଟ କହୁଛି, ୩ ଜଣଙ୍କୁ ଅନ୍ୟତ୍ର ହତ୍ୟା କରାଯାଇ ସେମାନଙ୍କ ମରଶରୀରକୁ ଟୁମାକୁରୁ ଆଣି ଜାଳି ଦିଆ ଯାଇଛି । ପୋଲିସର ଅନ୍ୟ ସୂତ୍ର ଅନୁସାରେ, ସୁନା ଗହଣା କ୍ରୟ ପାଇଁ ମୃତକ ଟଙ୍କା ନେଇ ଆସିଥିବା ବେଳେ ଏହି ହତ୍ୟାକାଣ୍ଡ ଘଟିଛି ।
ତେବେ ସୁନା ବିକ୍ରି ପାଇଁ ଆସିଥିବା ଅଭିଯୁକ୍ତ ହତ୍ୟା କରିବା ସହ ଟଙ୍କା ଲୁଟି ନେଇ ଯାଇ କାର୍ ସହ ସେମାନଙ୍କୁ ଜୀବନ୍ତ ଜାଳି ଦେଇଥିବା ସନ୍ଦେହ କରାଯାଉଛି । ପୋଲିସ ଅନୁସାରେ, ଏହି ହତ୍ୟାକାଣ୍ଡରେ ପ୍ରାୟ ୬ ଜଣଙ୍କ ସମ୍ପୃକ୍ତି ରହିଛି ।