ଭୁବନେଶ୍ୱର ୧୧/୦୨: ପ୍ରସିଦ୍ଧ ଖଣ୍ଡଗିରି କୁମ୍ଭମେଳାକୁ ଆଉମାତ୍ର ୫ ଦିନ ରହିଲା । ଏଥର ଖଣ୍ଡଗିରି ମେଳାକୁ ଶାନ୍ତି ଶୃଙ୍ଖଳାର ସହ ସମାପନ କରିବା ପାଇଁ କମିଶନରେଟ୍ ପୁଲିସ ସମ୍ପୂର୍ଣ୍ଣ ପ୍ରସ୍ତୁତ ରହିଛି । ପୁଲିସ ପକ୍ଷରୁ ଖଣ୍ଡଗିରି ମୁଣ୍ଡିଆ ରାସ୍ତାରେ ଏକ କଣ୍ଟ୍ରୋଲ୍ ରୁମ୍ ଖୋଲାଯିବ । ଭିଡ଼କୁ ଲକ୍ଷ୍ୟରଖି ମେଳା ଭିତରେ ୧୬ଟି ସ୍ଥାନରେ ସିସି କ୍ୟାମେରା ଲଗାଯିବ । ପୁଲିସ କଣ୍ଟ୍ରୋଲ ରୁମ୍ରେ ସମସ୍ତ ସିସି କ୍ୟାମେରା ଉପରେ ନଜର ରଖାଯିବ । ମେଳା ପାଇଁ ୫ ପ୍ଲାଟୁନ୍ ପୁଲିସ ଫୋର୍ସ ମୁତୟନ ରହିବେ । ଏଥିପାଇଁ ସାଦା ପୋଷାକଧାରୀ ପୁଲିସ ଏବଂ ମହିଳା ପୁଲିସ ମଧ୍ୟ ନିୟୋଜିତ ରହିବେ । କୌଣସି ସ୍ଥାନରେ ଅପ୍ରୀତିକର ପରିସ୍ଥିତି ସୃଷ୍ଟି ହେଲେ ସଙ୍ଗେ ସଙ୍ଗେ ପୁଲିସ କାର୍ଯ୍ୟାନୁଷ୍ଠାନ ନିଆଯାଇ ପାରିବ । ଖଣ୍ଡଗିରି ଛକରେ ଭିଡ଼ ନିୟନ୍ତ୍ରଣ କରିବା ପାଇଁ ୨ ପ୍ଲାଟୁନ୍ ପୁଲିସ ଫୋର୍ସ ମୁତୟନ ରହିବେ ।
ସେହିପରି ଉଭୟ ଖଣ୍ଡଗିରି ଓ ଉଦୟଗିରି ମୁଣ୍ଡିଆର ବିଭିନ୍ନ ସ୍ଥାନରେ ପୁଲିସ ମୁତୟନ ରହିବେ । ଯାତ୍ରା କମିଟି ଗୁଡ଼ିକ ମଧ୍ୟ ଟେଣ୍ଟ ଭିତରେ ଏବଂ ଗେଟ୍ ମୁହଁରେ ସିସି କ୍ୟାମେରା ଲଗାଇବା ବାଧ୍ୟତାମୂଳକ କରାଯାଇଛି । ଯାତ୍ରା ଟେଣ୍ଟ୍ ଭିତରେ ମହିଳା ମାନଙ୍କ ସୁରକ୍ଷା ପାଇଁ ଏଭଳି ପଦକ୍ଷେପ ନିଆଯାଇଛି । ପ୍ରତି ପେଣ୍ଡାଲ ସମ୍ମୁଖରେ ପୁଲିସ ଏଡ୍ପୋଷ୍ଟ ରହିବ । ପ୍ରତ୍ୟେକ ଯାତ୍ରା କମିଟିର ୨ଜଣ ସଭ୍ୟ ପୁଲିସକୁ ସହାୟତା କରିବା ପାଇଁ ନିୟୋଜିତ ରହିବେ । କୌଣସି ଅଘଟଣ ଘଟିଲେ ସେମାନେ ସଙ୍ଗେ ସଙ୍ଗେ ପୁଲିସକୁ ଜଣାଇବେ । ସେମାନଙ୍କୁ ପୁଲିସ ପକ୍ଷରୁ ସ୍ୱତନ୍ତ୍ର ପରିଚୟ ପ୍ରଦାନ କରାଯିବ ବୋଲି ଖଣ୍ଡଗିରି ଥାନା ଅଧିକାରୀ ଅଭିମନ୍ୟୁ ଦାସ ସୂଚନା ଦେଇଛନ୍ତି । ଖଣ୍ଡଗିରିର ଅଧିଷ୍ଠାତ୍ରୀ ଦେବୀ ମା’ ବାରଭୂଜାଙ୍କ ମହୋତ୍ସବଠାରୁ ଆରମ୍ଭ କରି ମେଳା ଆରମ୍ଭ ଅର୍ଥାତ ମାଘ ସପ୍ତମୀଦିନ ଠାକୁର ଅନନ୍ତ କେଶରୀଙ୍କ ଯାତ୍ରା ଚିରାଚରିତ ଢ଼ଙ୍ଗରେ ପାଳନ କରାଯିବା ପାଇଁ କଡ଼ା ସୁରକ୍ଷା ଯୋଗାଇ ଦିଆଯିବ ବୋଲି ଶ୍ରୀ ଦାସ କହିଛନ୍ତି ।
ଚାଲିଛି ପେଣ୍ଡାଲ ପ୍ରସ୍ତୁତି, ଦୁଲୁକିବ ଖଣ୍ଡଗିରି
ଏଥର ଖଣ୍ଡଗିରି ମେଳାରେ ୬ଟି ପେଣ୍ଡାଲରେ ୧୨ଟି ନାମୀ ଅପେରାପାର୍ଟି ଯାତ୍ରା ପରିବେଷଣ କରିବେ । ୧୮ରୁ ୨୯ ତାରିଖ ପର୍ଯ୍ୟନ୍ତ ୨ଟି ପର୍ଯ୍ୟାୟରେ ଯାତ୍ରା ଲଢ଼େଇ ଚାଲିବ । ପ୍ରଥମ ପର୍ଯ୍ୟାୟରେ ସାଇ ସମ୍ରାଟ,କୋଣାର୍କ, କଳିଙ୍ଗ, ଦୁର୍ଗା ମନ୍ଦିର, ଗୌରୀ ଗଣନାଟ୍ୟ ଓ ଅଶୋକ ସମ୍ରାଟ ୬ଟି ଯାତ୍ରାପାର୍ଟି ମଇଦାନକୁ ଓହ୍ଲାଇବେ । ଦ୍ୱିତୀୟ ପର୍ଯ୍ୟାୟରେ ଆଉ ୬ଟି ପାର୍ଟି ତୁଳସୀ, ସୂର୍ଯ୍ୟମନ୍ଦିର, ଶିବାନୀ, ସ୍ୱର୍ଣ୍ଣ ମହଲ, ସ୍ୱପ୍ନ ମହଲ ଓ ରଙ୍ଗମହଲ ମଧ୍ୟରେ ଚାଲିବ କଡ଼ା ଟକ୍କର୍ । ଏଥିପାଇଁ ଟେଣ୍ଟ୍ ପ୍ରସ୍ତୁତି କାମ ଜୋର୍ସୋର୍ରେ ଚାଲିଛି । ବିଭିନ୍ନ ଅପେରା ପାର୍ଟିର ବ୍ୟାନର ଓ ହୋର୍ଡିଂ ମରା ସରିଲାଣି । ଯାତ୍ରାପାର୍ଟି ଗୁଡ଼ିକ ମଧ୍ୟରେ ଏଠାରେ ଏକରକମ ପ୍ରତିଯୋଗିତା ଲାଗିଥାଏ । ତେଣୁ ଏହାକୁ ଅଘୋଷିତ ଯାତ୍ରା ମହାସମର ବୋଲି ମଧ୍ୟ କୁହାଯାଏ । ସବୁ ଅପେରା ପାର୍ଟି ଗୁଡ଼ିକ ଦର୍ଶକଙ୍କୁ ଆକୃଷ୍ଟ କରିବା ପାଇଁ ସେମାନଙ୍କର ଶ୍ରେଷ୍ଠ ନାଟକ ଗୁଡ଼ିକ ଏଠାରେ ପ୍ରଦର୍ଶନ କରିଥାନ୍ତି । ୧୨ ରାତି ଧରି ଯାତ୍ରା ଡାଇଲଗ୍ରେ ଦୁଲୁକିବ ଖଣ୍ଡଗିରି ।