କଟକ, ୬।୦୨: କଟକ ବାଲିଯାତ୍ରା ଉପର ପଡ଼ିଆରେ ଆସନ୍ତା ୯ରୁ ୧୩ ତାରିଖ ପର୍ଯ୍ୟନ୍ତ ୫ ଦିନ ଧରି କଳିଙ୍ଗ ମାରିଟାଇମ୍ ଏକ୍ସପୋ-୨୦୨୪ ଅନୁଷ୍ଠିତ ହେବାକୁ ଯାଉଛି । ଏଥିରେ ନୌସେନା ଯନ୍ତ୍ରପାତି ନିର୍ମାଣ ଓ ବ୍ୟବହାର ସଂକ୍ରାନ୍ତରେ ପ୍ରଦର୍ଶନୀ ଓ ପ୍ରଶିକ୍ଷଣ ଶିବିର ଅନୁଷ୍ଠିତ ହେବ । ଏହାବାଦ୍ ୫ଶହ ଷ୍ଟଲ୍ ସାଙ୍ଗକୁ ଫୁଡ୍ ଓ ଗେମ୍ ଜୋନ୍ ମଧ୍ୟ ସ୍ଥାନ ପାଇବ । ମଙ୍ଗଳବାର ଓସିଏ ସମ୍ମିଳନୀ କକ୍ଷରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଓଡିଶା ଇଣ୍ଡଷ୍ଟ୍ରିଜ୍ ଆସୋସିଏସନ୍ (ଓଆଇଏ)ର ସଭାପତି ତଥା ଭାରତ ମସଲାର ପରିଚାଳନା ନିର୍ଦ୍ଦେଶକ ସୁଶାନ୍ତ କୁମାର ପଣ୍ଡା ଏହି ସୂଚନା ଦେଇଛନ୍ତି । ଶ୍ରୀ ପଣ୍ଡା କହିଛନ୍ତି, କେନ୍ଦ୍ର ଓ ରାଜ୍ୟ ସରକାରଙ୍କ ଏମ୍ଏସ୍ଏମ୍ଇ ବିଭାଗ, ଓଡିଶା ଇଣ୍ଡଷ୍ଟ୍ରିଜ୍ ଆସୋସିଏସନ୍, ନାଭି ଫାଉଣ୍ଡେସନର ଓଡ଼ିଶା ଚାପ୍ଟର ଓ ଇଡ୍କୋ ସହଯୋଗରେ ଏହି କାର୍ଯ୍ୟକ୍ରମ ହେବ । ଏହି ଏକ୍ସପୋରେ ପ୍ରତିଦିନ ପୂର୍ବାହ୍ଣ ୧୦ଟାରୁ ଅପରାହ୍ଣ ୧ଟା ପର୍ଯ୍ୟନ୍ତ କ୍ରେତା ବିକ୍ରେତାଙ୍କୁ ନେଇ କର୍ମଶାଳା ହେବ ।
ଏତଦ୍ବ୍ୟତୀତ ନାଭି ଫାଉଣ୍ଡେସନ୍ ଫକ୍ଷରୁ ଆକର୍ଷଣୀୟ ବ୍ୟାଣ୍ଡ୍ ସୋ’ ପରିବେଷଣ କରାଯିବ । ପ୍ରତ୍ୟେହ ସଂଧ୍ୟାରେ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ହେବ । ସାମ୍ବାଦିକ ସମ୍ମିଳନୀରେ ଅଧ୍ୟକ୍ଷତା କରି ଓଆଇଏ ଅଧ୍ୟକ୍ଷ ଅବନୀ କାନୁନଗୋ କହିଥିଲେ, ନୌବାଣିଜ୍ୟ କ୍ଷେତ୍ରରେ କଟକର ସ୍ୱତନ୍ତ୍ର ସ୍ଥାନ ରହିଛି । ଏକ୍ସପୋରେ ସାମୁଦ୍ରିକ ପୋତର ଯନ୍ତ୍ରପାତି ସଂକ୍ରାନ୍ତରେ ସଚେତନତା କର୍ମଶାଳା ଅନୁଷ୍ଠିତ ହେବ । ଏମ୍ଏସ୍ଏମ୍ଇ ଶିଳ୍ପୋଦ୍ୟୋଗୀମାନେ ନୌସେନାକୁ କି ପ୍ରକାରର ଯନ୍ତ୍ରାଂଶ ଯୋଗାଇପାରିବେ ସେ ସଂପର୍କରେ ଦିଲ୍ଲୀରୁ ଆସୁଥିବା ନୌସେନା ଅଧିକାରୀମାନଙ୍କ ସହ ଆଲୋଚନା କରାଯିବ । ଏଥିରୁ ବର୍ତ୍ତମାନ ଓ ଭବିଷ୍ୟତର ଶିଳ୍ପୋଦ୍ୟୋଗୀମାନେ ଆଗକୁ ବଢ଼ିବାର ପର୍ଯ୍ୟାପ୍ତ ସୁଯୋଗ ପାଇବେ ବୋଲି ଶ୍ରୀ କାନୁନଗୋ ସୂଚନା ଦେଇଥିଲେ । ନାଭି ଫାଉଣ୍ଡେସନ୍ ଓଡ଼ିଶା ଚାପ୍ଟର ପ୍ରେସିଡେଣ୍ଟ୍ ଭାଇସ୍ ଆଡ୍ମିରାଲ୍ ଆର୍.କେ. ମହାନ୍ତି ଏହି କାର୍ଯ୍ୟକ୍ରମ ଦ୍ୱାରା ନୌବାହିନୀ ସମ୍ପର୍କିତ ବିଭିନ୍ନ ସୂଚନା ଲୋକଙ୍କୁ ମିଳିପାରିବ ବୋଲି କହିଥିଲେ । ସମ୍ମିଳନୀରେ ଓଆଇଏର ସାଧାରଣ ସଂପାଦକ ଗୌର ଗୋପାଳ ସେନ୍, ପୂର୍ବତନ ସଭାପତି ରାଜେଶ କାନୁନଗୋ, ସଂଯୋଜକ ପ୍ରଫୁଲ୍ଲ ସିଂ, ଉପସଭାପତି ବିନୋଦ ଭୂତ ଉପସ୍ଥିତ ଥିଲେ ।
