କୋଲକାତା: ପଶ୍ଚିମବଙ୍ଗରେ କଂଗ୍ରେସ ଏବଂ ମମତା ବାନାର୍ଜୀଙ୍କ ଦଳ ତୃଣମୂଳ କଂଗ୍ରେସ (ଟିଏମସି) ମଧ୍ୟରେ ଏକପ୍ରକାଶ ଶୀତଳ ଯୁଦ୍ଧ ଜାରି ରହିଛି । ମମତା ବନାର୍ଜୀଙ୍କ ସରକାର ରାହୁଲ ଗାନ୍ଧୀଙ୍କୁ ସରକାରୀ ଗେଷ୍ଟ ହାଉସ୍ ଦେବାକୁ ମନା କରିଦେଇଛି । ଏହାକୁ ନେଇ ରାଜ୍ୟରେ ଦୁଇ ଦଳର ନେତା ଏବଂ କାର୍ଯ୍ୟକର୍ତ୍ତାଙ୍କ ମଧ୍ୟରେ ବିବାଦ ଆରମ୍ଭ ହୋଇଯାଇଛି । ରାହୁଲ ଗାନ୍ଧୀଙ୍କୁ କାହିଁକି ଗେଷ୍ଟ ହାଉସ ଦିଆଗଲାନି ତାର କାରଣ ମଧ୍ୟ କହିଛି ଟିଏମସି । ଏହା ସହ କଂଗ୍ରେସ ଉପରେ ବର୍ଷିବା ସହ ଭୋଟ ସମୟରେ ଦଳକୁ ରାଜ୍ୟ କଥା ମନେ ପଡ଼ୁଛି ବୋଲି ଅଭିଯୋଗ କରିଛି ଟିଏମସି ।
ରାହୁଲ ଗାନ୍ଧୀଙ୍କ ଭାରତ ଯୋଡୋ ନ୍ୟାୟ ଯାତ୍ରା ଜାନୁଆରୀ ୩୧ରେ ମାଲଦାରେ ପହଞ୍ଚିବ । ଏହି ସମୟରେ ରାହୁଲ ଗାନ୍ଧୀଙ୍କ ସହ ଅନେକ ସାଂସଦ ମଧ୍ୟ ଉପସ୍ଥିତ ରହିବେ । ପଶ୍ଚିମବଙ୍ଗରେ ରହିବା ଲାଗି ରାହୁଲ ଗାନ୍ଧୀଙ୍କ ପାଇଁ ଦଳ ପକ୍ଷରୁ ଏକ ଗେଷ୍ଟ ହାଉସ ଡିମାଣ୍ଡ କରାଯାଇଥିଲା । କିନ୍ତୁ ତାଙ୍କୁ ଗେଷ୍ଟା ହାଉସ ମିଳିପାରି ନାହିଁ । ତେବେ ଦ୍ବିପ୍ରହର ଭୋଜନ ଲାଗି ରାହୁଲ ଗାନ୍ଧୀଙ୍କୁ ଗେଷ୍ଟ ହାଉସର ଆବଶ୍ୟକତା ଥିଲା । ଗେଷ୍ଟ ହାଉସ ନମିଳିବାରୁ କଂଗ୍ରେସକୁ ଜିଲ୍ଲାର ଏକ କ୍ଲବରେ ଭୋଜନ ପାଇଁ ବ୍ୟବସ୍ଥା କରାଯାଇଛି ।
ଜିଲ୍ଲା କଂଗ୍ରେସ ପକ୍ଷରୁ ରାଜ୍ୟ ଜଳ ଯୋଗାଣ ବିଭାଗର ଏକ ଗେଷ୍ଟ ହାଉସ ଲାଗି ଦାବି କରାଯାଇଥିଲା । ହେଲେ ମମତା ବାନାର୍ଜୀଙ୍କ ସରକାର କଂଗ୍ରେସର ଏହି ଦାବିକୁ ପ୍ରତ୍ୟାଖାନ କରିଦେଇଛି । ଏହା ପରେ କଂଗ୍ରେସ ଦେବୀପୁରର ଏକ କ୍ଲବରେ ରାହୁଲ ଗାନ୍ଧୀଙ୍କ ଭୋଜନ ଏବଂ ବିଶ୍ରାମ ଲାଗି ବ୍ୟବସ୍ଥା କରିଥିବା ଜଣାପଡ଼ିଛି ।
ତୃଣମୂଳ କଂଗ୍ରେସ ଅନୁସାରେ, ପଶ୍ଚିମବଙ୍ଗରେ ଏବେ ବିଭିନ୍ନ ସମାରୋହର ଆୟୋଜନ ହେଉଛି । ଫଳରେ ନେତମାନଙ୍କ ଲାଗି ସମସ୍ତ ଗେଷ୍ଟ ହାଉସ ବୁକ୍ ହୋଇଛି । ତେଣୁ ରାହୁଲ ଗାନ୍ଧୀଙ୍କ ଲାଗି ଗେଷ୍ଟ ହାଉସ ଉପଳବ୍ଧ କରାଇବା ସମ୍ଭବପର ନୁହେଁ । ସେପଟେ କଂଗ୍ରେସର କହିବା କଥା ହେଲା, ଶାସକ ଦଳ ଭୟ କରିଯାଇଛି ତେଣୁ ଗେଷ୍ଟ ହାଉସ ଦେବାକୁ ମନା କରୁଛି।
