ମୁମ୍ବାଇ,୨୭।୧:  ମହାରାଷ୍ଟ୍ରରେ ସରିଲା ମରାଠା ସଂରକ୍ଷଣ ଆନ୍ଦୋଳନ । ଦୀର୍ଘ ଦିନ ଧରି ମହାରାଷ୍ଟ୍ରରେ ଚାଲିଥିବା ଏହି ମରାଠା ଆରକ୍ଷଣ ଆନ୍ଦୋଳନ ପ୍ରତ୍ୟାହୃତ ହୋଇଛି। ଶନିବାର ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଆନ୍ଦୋଳନକାରୀଙ୍କ ପାଖରେ ପହଞ୍ଚି ସମସ୍ତ ଦାବିକୁ ଗ୍ରହଣ କରିଛନ୍ତି। ଏଥିସହ ଆନ୍ଦୋଳନର ନେତା ମନୋଜ ଜରାଙ୍ଗେ ପାଟିଲଙ୍କୁ ଜୁସ୍ ପିଆଇ ଅନଶନ ଭଙ୍ଗ କରାଇଛନ୍ତି। 

ସରକାର ଦାବି ଗ୍ରହଣ କରିବା ପରେ ଜରାଙ୍ଗେ କହିଛନ୍ତି, ଆମେ ୪ ମାସ ଧରି ମରାଠା ସଂରକ୍ଷଣ ପାଇଁ ଲଢେଇ କରୁଥିଲୁ। ଏହି ସଂରକ୍ଷଣ ପାଇଁ ପ୍ରାୟ ୩୫୦ଜଣ ଯୁବକ ଆତ୍ମହତ୍ୟା କରିସାରିଛନ୍ତି। ଶେଷରେ ଆଜି ସେମାନଙ୍କ ସ୍ୱପ୍ନ ସାକାର ହୋଇଛି। ବର୍ତ୍ତମାନ ସଂରକ୍ଷଣ କାର୍ଯ୍ୟକାରୀ କରିବାର ଦାୟିତ୍ୱ ସରକାରଙ୍କର। ଯଦି ମୋତେ ଏଥର ପ୍ରତାରିତ କରାଯାଏ, ମୁଁ ମୁମ୍ବାଇର ଆଜାଦ ମଇଦାନକୁ ଓହ୍ଲାଇବି। 

ଉଲ୍ଳେଖନୀୟ ଯେ,, ଗତକାଲି ଜରାଙ୍ଗେ ସିନ୍ଦେ ସରକାରଙ୍କୁ ଏକ ଚେତାବନୀ ଦେଇ କହିଥିଲେ,   ଯଦି ଶନିବାର ସକାଳ ୧୧ ଟା ସୁଦ୍ଧା ସଂରକ୍ଷଣ ନିୟମ ଜାରି କରାନଯିବ, ତେବେ ସେ ୧୨ଟାରେ ମୁମ୍ବାଇର ଆଜାଦ ମଇଦାନରେ ପହଞ୍ଚି ବିକ୍ଷୋଭ କରିବେ। ଏହା ପରେ ସିନ୍ଦେ ସରକାର ଗତକାଲି ବିଳମ୍ବିତ ରାତିରେ ହିଁ ଜାରଙ୍ଗେଙ୍କ ନିକଟକୁ ଅଧ୍ୟାଦେଶର ଏକ ଡ୍ରାଫ୍ଟ ପଠାଇଥିଲେ। ଏଥିରେ ଜରାଙ୍ଗେଙ୍କ ଦ୍ୱାରା କରାଯାଇଥିବା ସମସ୍ତ ଦାବି ଗ୍ରହଣ କରାଯାଇଥିବା ନେଇ ଉଲ୍ଲେଖ କରାଯାଇଥିଲା। ସରକାର ସମସ୍ତ ଦାବିକୁ ଲିଖିତ ଆକାରରେ ଗ୍ରହଣ କରିବା ପରେ ଅନ୍ଦୋଳନ ପ୍ରତ୍ୟାହାର କରାଗଲା ବୋଲି ଆନ୍ଦୋଳନକାରୀଙ୍କ ପକ୍ଷରୁ ସୂଚନା ଦିଆଯାଇଛି। ଜରାଙ୍ଗେ କହିଛନ୍ତି, ମୁଖ୍ୟମନ୍ତ୍ରୀ ସିନ୍ଦେ ଏକ ଉଚିତ୍ ପଦକ୍ଷେପ ନେଇଛନ୍ତି, ସେଥିପାଇଁ ଆମର ବିକ୍ଷୋଭ ଶେଷ ହୋଇଛି ।