ହାଇଦ୍ରାବାଦ, ୦୩/୧୦: ତେଲେଙ୍ଗାନା ମୁଖ୍ୟମନ୍ତ୍ରୀ ତଥା ବିଆରଏସ୍ ମୁଖ୍ୟ କେ ଚନ୍ଦ୍ରଶେଖର ରାଓ (କେସିଆର) ଏନଡିଏରେ ସାମିଲ ହେବାକୁ ଅନୁରୋଧ କରିଥିଲେ ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ତେଲେଙ୍ଗାନାରେ ହେବାକୁ ଥିବା ବିଧାନସଭା ନିର୍ବାଚନ ପୂର୍ବରୁ ପ୍ରଧାନମନ୍ତ୍ରୀ ମୋଦୀ ଆଜି ନିଜାମାବାଦରେ ପହଞ୍ଚିଥିଲେ । ସେଠାରେ ଜନସଭାକୁ ସମ୍ବୋଧନ କରିବା ବେଳେ ମୁଖ୍ୟମନ୍ତ୍ରୀ ଚନ୍ଦ୍ରଶେଖରଙ୍କୁ ନେଇ ବଡ଼ ମନ୍ତବ୍ୟ ଦେଇଛନ୍ତି ମୋଦୀ । ସେ କହିଛନ୍ତି, ଭାରତୀୟ ଜନତା ପାର୍ଟିର ଜଣେ ସମାଲୋଚକ ଭାବେ କେସିଆର ପରିଚିତ । ହେଲେ ସେ ବିଜେପି ନେତୃତ୍ବାଧୀନ ମେଣ୍ଟ ଏନଡିଏରେ ସାମିଲ ହେବାକୁ ଚାହୁଁଥିଲେ । ହେଲେ ମୁଁ ତାଙ୍କୁ ଏନଡିଏ ମେଣ୍ଟରେ ସାମିଲ ହେବାରୁ ରୋକିଥିଲି ବୋଲି ପିଏମ ମୋଦୀ କହିଛନ୍ତି ।
ସେ ଆହୁରି କହିଛନ୍ତି ଯେ, କେସିଆର ଜାଣିଛନ୍ତି ତାଙ୍କ ଭାରତ ରାଷ୍ଟ୍ରୀୟ ସମିତି(ବିଆରଏସ୍) ଦଳ ଏନଡିଏରେ ସାମିଲ ହେବାକୁ କେତେ ପ୍ରଚେଷ୍ଟା କରିଛି । ଏହାକୁ ବ୍ୟକ୍ତିଗତ ଭାବେ ଖଣ୍ଡନ କରାଯାଉଛି । କିନ୍ତୁ ଯେତେବେଳେ ଆମେ କହିଲୁ ତେଲେଙ୍ଗାନର ଲୋକଙ୍କ ସହ ଧୋକା କରାଯିବ ନାହିଁ ତାପରେ କେସିଆରଙ୍କ ମୁଣ୍ଡ ଚକ୍କର ଖାଇଥିଲା ବୋଲି ପିଏମ ମୋଦୀ ଦାବି କରିଛନ୍ତି । ଏହା ସହ କେସିଆରଙ୍କୁ ଟାର୍ଗେଟ କରି ମୋଦୀ କହିଛନ୍ତି, ‘ଏମାନେ ଗଣତନ୍ତ୍ରକୁ ଲୁଟତନ୍ତ୍ର ଏବଂ ପ୍ରଜାତନ୍ତ୍ରକୁ ପରିବାରତନ୍ତ୍ର କରିସାରିଛନ୍ତି । କେସିଆର ଦିଲ୍ଲୀରେ ଯେଉଁ ସୁନ୍ଦର ବ୍ୟବହାର ଦେଖାଇଥିଲେ ତାହା ତାଙ୍କର ସ୍ବଭାବ ନୁହେଁ । ସେ କହିଥିଲେ ଆପଣଙ୍କ (ମୋଦୀ) ଶାସନରେ ଦେଶ ଉନ୍ନତି କରୁଛି ।’
ସେପଟେ କେସିଆର ସମସ୍ତ ଦାୟିତ୍ବ କେଟି ରାମାରାଓ(କେଟିଆର)ଙ୍କୁ ହସ୍ତାନ୍ତର କରିବାକୁ ଚାହୁଁଥିଲେ । ଏବଂ ସେଥିପାଇଁ ମୋଦୀଙ୍କ ଆଶୀର୍ବାଦ ଚାହିଁଥିଲେ । ହେଲେ ସେ କେସିଆରଙ୍କୁ ଏହା ଲୋକତନ୍ତ୍ର ବୋଲି କହିବା ସହ ଆପଣ କିଏ ଦାୟିତ୍ବ ହସ୍ତାନ୍ତର କରିବେ କେଟି ରାମାରାଓଙ୍କୁ ? ଆପଣ କଣ ରାଜା ବୋଲି କେସିଆରଙ୍କୁ ପଚାରିଥିଲେ ବୋଲି ମୋଦୀ କହିଛନ୍ତି । ଏହା ପରଠାରୁ କେସିଆର ତାଙ୍କ ସାମ୍ନାକୁ ଆସୁନାହାନ୍ତି କି ନଜର ମିଶାଇ ପାରୁନାହାନ୍ତି ବୋଲି କହିଛନ୍ତି ପିଏମ ମୋଦୀ ।
ସେପଟେ ପ୍ରଧାନମନ୍ତ୍ରୀ ମୋଦୀଙ୍କ ମନ୍ତବ୍ୟରେ ପାଲଟା ଜବାବ ଦେଇଛନ୍ତି କେଟି ରାମାରାଓ । ସେ କହିଛନ୍ତି ଏଥିପାଇଁ ବିଜେପିକୁ ସବୁଠାରୁ ବଡ଼ ମିଛ ଫ୍ୟାକ୍ଟ୍ରି ବୋଲି କୁହାଯାଏ । ପ୍ରଧାନମନ୍ତ୍ରୀ ମୋଦୀ ହ୍ବାଟସଆପ୍ ୟୁନିଭର୍ସିଟିର ମୁଖ୍ୟ ସଂଚଳକ । ଏହା ସହ ବିଆରଏସ ନେତାମାନେ ମଧ୍ୟ ପ୍ରଧାନମନ୍ତ୍ରୀ ମୋଦୀଙ୍କ ସମେତ ବିଜେପିକୁ ଟାର୍ଗେଟ କରିଛନ୍ତି ।
