ବୀରମହାରାଜପୁର, ୧୨/୦୯ : ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ସୁବଳୟା ଥାନା ଅନ୍ତର୍ଗତ ଡୁଲେଶର ଉଚ୍ଚ ପ୍ରାଥମିକ ବିଦ୍ୟାଳୟରେ ଶିକ୍ଷକ ମନଇଛା ବିଦ୍ୟାଳୟକୁ ଆସୁଛନ୍ତି। ଏନେଇ ବାରମ୍ବାର ଅଭିଯୋଗ ପରେ କେହି ନଶୁଣିବାରୁ ଆଜି ସ୍କୁଲ ଗେଟରେ ତାଳା ପକାଇଲେ ଗ୍ରାମବାସୀ।
ସୁଚନା ମୁତାବକ ପିତାମହୁଳ କ୍ଲଷ୍ଟର ଅଧିନସ୍ଥ ଡୁଲେଶର ଉଚ୍ଚ ପ୍ରାଥମିକ ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଥିବା ବେଳେ ୧୦୬ ଜଣ ଛାତ୍ରଛାତ୍ରୀଙ୍କ ପାଇଁ ଅଛନ୍ତି ୫ ଜଣ ଶିକ୍ଷକ। ହେଲେ ୫ ଜଣ ଶିକ୍ଷକ ଶିକ୍ଷାଦାନ ପାଇଁ କେବେ ଏକ ସମୟରେ ସ୍କୁଲ ଆସନ୍ତି ନାହିଁ ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ବିଦ୍ୟାଳୟକୁ ଦିନ ୧୧ ଟା ପର୍ଯ୍ୟନ୍ତ ପ୍ରଧାନ ଶିକ୍ଷକଙ୍କ ସମେତ ୨ ଜଣ ସହକାରୀ ଶିକ୍ଷକ ଆସିନଥିବା ବେଳେ ଛାତ୍ରଛାତ୍ରୀମାନେ ବାହାରେ ବୁଳାବୁଲି କରୁଛନ୍ତି। ଏହା ଦେଖି ଗ୍ରାମବାସୀମାନେ ବିଦ୍ୟାଲୟରେ ପଚାରିବା ବେଳେକୁ ଶିକ୍ଷକ ଆସିନଥିବା ଜାଣିପାରି ମୁଖ୍ୟ ଗେଟ୍ରେ ତାଲା ପକାଇ ଦେଇଥିଲେ।
ସୂଚନା ପାଇ ପିତାମହୁଳ କ୍ଲଷ୍ଟର ସିଆରସିସି କୈାସ୍ତୁଭମଣି ଦାସ ପହଞ୍ଚି ଗ୍ରାମବାସୀଙ୍କ ସହ ଆଳୋଚନା କରିଥିଲେ ମଧ୍ୟ ଗ୍ରାମବାସୀ ନିଜ ଜିଦରେ ଅଟଳ ରହିବାରୁ ବୀରମହାରାଜପୁର ବି.ଇ.ଓ ଙ୍କୁ ସୂଚନା ଦେଇଥିଲେ । କିନ୍ତୁ ଗ୍ରାମବାସୀଙ୍କ ସହ ଆଲୋଚନା ପାଇଁ କୈାଣସି ଅଧିକାରି ବର୍ତ୍ତମାନ ପର୍ଯ୍ୟନ୍ତ ପହଞ୍ଚି ନଥିବା ଜଣାଯାଇଛି । ଏନେଇ ବିଦ୍ୟାଳୟର ପ୍ରଧାନ ଶିକ୍ଷକ ରାଜକିଶୋର ନାଏକଙ୍କ ସହ ଯୋଗାଯୋଗ କରାଯିବାରୁ ବିଦ୍ୟାଳୟକୁ ମୁଁ ଠିକ୍ ସମୟରେ ଆସିଥିଲି କହିଥିଲେ। ସେ କହିଥିଲେ ଯେ, ଜଣେ ଶିକ୍ଷକ ଆଜି ବିଳମ୍ବରେ ଆସିଲେ ଏବଂ ୧୨ ଟା ସମୟରେ ଛୁଟି ଦରଖାସ୍ତ ଦେଇଛନ୍ତି।
