ଚାନ୍ଦବାଲି,୨୩/୦୯: ଅଙ୍ଗନବାଡ଼ି କେନ୍ଦ୍ରରେ ୧୫ ଦିନ ହେଲାଣି ଝୁଲୁଛି ତାଲା । ବ୍ରହ୍ମଟିକ୍ରି ଅଙ୍ଗନବାଡ଼ି କେନ୍ଦ୍ରରେ କର୍ମୀଙ୍କ ଅନୁପସ୍ଥିତି ନେଇ ଅଭିଭାବକ ମହଲରେ ଦେଖାଦେଇଛି ତୀବ୍ର ଅସନ୍ତୋଷ । ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକ ତୋଟାପଡା ସେକ୍ଟର ଖଦାଳପୋଖରୀ ପଞ୍ଚାୟତ ବ୍ରହ୍ମଟିକ୍ରି ଅଙ୍ଗନବାଡ଼ି କେନ୍ଦ୍ରରେ ଏଭଳି ଦୃଶ୍ୟ ଦଖିବାକୁ ମିଳିଛି । 

ସୂଚନା ମୁତାବକ, ଅଗଷ୍ଟ ୬ ତାରିଖ ଅର୍ଥାତ ମଙ୍ଗଳବାରରେ ଅଙ୍ଗନବାଡ଼ି କର୍ମୀଙ୍କ ଅନୁପସ୍ଥିତ ଥିଲେ । ତାଙ୍କ ଅନୁପସ୍ଥିତିରେ ତାଙ୍କର ସହାୟକ ଭୁଲ୍ ବଶତଃ ଜଣେ ୨୧ ବର୍ଷରୁ କମ୍ ବୟଷର ମହିଳାଙ୍କୁ ସୁଭଦ୍ରା ଫର୍ମ ଦେଇଥିଲେ । ସେହି ମହିଳା ଅଯୋଗ୍ୟ ହିତାଧୀକାରୀ ଜାଣିବା ପରେ ଅଙ୍ଗନବାଡ଼ି କର୍ମୀ ତାଙ୍କୁ ଫର୍ମ ଫେରସ୍ତ ପାଇଁ ମାଗିଥିଲେ। ତେବେ ଏହି ଘଟଣାରୁ ଆରମ୍ଭ  ହୋଇଥିଲା ମହାଭାରତ । ଉଭୟଙ୍କ ମଧ୍ୟରେ କଥା କଟାକଟି ହୋଇ ଅଙ୍ଗନବାଡ଼ି କର୍ମୀ ମାଡ଼ ଖାଇଥିଲେ । ପରେ ବାଂଶଡା ଥାନାରେ ଉଭୟ ପକ୍ଷରୁ ଅଭିଯୋଗ କରାଯାଇଥିଲା । ପୋଲିସ ମଧ୍ୟ ଅଙ୍ଗନବାଡ଼ି କର୍ମୀଙ୍କ ଅଭିଯୋଗ ଅନୁଯାୟୀ ଜଣକୁ ଗିରଫ କରିଛି ।

କିନ୍ତୁ ଏବେ ଅଙ୍ଗନବାଡ଼ି କେନ୍ଦ୍ରରେ ତାଲା ଝୁଲୁଛି । ଏଥିରେ କୁନିକୁନି ପିଲାମାନେ କି ଦୋଷ କରିଥିଲେ । ଅଙ୍ଗନବାଡ଼ି କେନ୍ଦ୍ରରେ ପାଠପଢା ତ ଦୂରର କଥା, ଏଯାଏଁ ସେମାନଙ୍କ ପାଇଁ ଆସୁଥିବା ପୃଷ୍ଟିକର ଖାଦ୍ୟରୁ ମଧ୍ୟ ପିଲାମାନେ ବଞ୍ଚିତ ରହିଥିବା ଅଭିଯୋଗ ହୋଇଛି । ୧୫ ଦିନ ହେଲା ଅଙ୍ଗନବାଡ଼ିରେ ତାଲା ପଡିଛି କିନ୍ତୁ ପ୍ରଶାସନ ଏହାର କୌଣସି ସମାଧାନ କରିପାରିନାହିଁ । 

ଅନ୍ୟ ପଟେ ଅଙ୍ଗନବାଡ଼ି କର୍ମୀ ମାଡ଼ ଖାଇଥିବା ନେଇ ଦେହ ଅସୁସ୍ଥ ଅଛି ଏବଂ ଅସୁରକ୍ଷିତ ମନେ କରୁଥିବା ପ୍ରକାଶ କରି ଛୁଟି ନେଇ ଥିବା କହିଛନ୍ତି ଅଙ୍ଗନବାଡି କର୍ମୀ । ଅଙ୍ଗନବାଡ଼ି କେନ୍ଦ୍ରରେ କର୍ମୀ ଅନୁପସ୍ଥିତିରେ ସହାୟକଙ୍କ ଦ୍ଵାରା କେନ୍ଦ୍ର ଚାଲିବ ବୋଲି କର୍ମୀ ଦିପ୍ତିରେଖା ବଳ କହିଛନ୍ତି। ଏହି ପରିପ୍ରେକ୍ଷୀରେ ତୋଟାପଡା ସେକ୍ଟର ସୁପରଭାଇଜର ମନୋରମା ବାରିକ କହିଛନ୍ତି, ଅଙ୍ଗନବାଡ଼ି କେନ୍ଦ୍ରରେ ତାଲା ଝୁଲିବା ଘଟଣା ମୁଁ ଜାଣି ନାହିଁ । କେବଳ କର୍ମୀଙ୍କ ଉପରେ ମାଡ଼ ହୋଇଥିବା ନେଇ ସେ ଛୁଟିରେ ଥିଲେ । ଅଙ୍ଗନବାଡ଼ି କେନ୍ଦ୍ରର ସହାୟିକା ଦାୟିତ୍ବ ରହିଛନ୍ତି । ତେବେ ଏହାର ସମାଧାନ ତୁରନ୍ତ କରାଯିବ ବୋଲି ପ୍ରତିକ୍ରିୟା ରଖିଛନ୍ତି।