ଭଦ୍ରକ,୨୯/୦୯: ସୋସିଆଲ ମିଡିଆରେ ମନ୍ତବ୍ୟକୁ ନେଇ ଶୁକ୍ରବାର ଭଦ୍ରକର ପୁରୁଣା ବଜାର ଅଞ୍ଚଳ ଅଶାନ୍ତ ହୋଇପଡ଼ିଥିଲା । ଢେଲାମାଡ଼ ଓ ବିକ୍ଷୋଭ ପରେ ସେହି ଅଞ୍ଚଳ ଏବେ ପୁଲିସ କବ୍ଜାରେ ରହିଛି । ଦିନ ତମାମ ପୁଲିସ ପଇଁତରା ମାରିଛି । କ୍ୟାମ୍ପ ପକାଇଛି । ଅସ୍ଥାୟୀ ଟେଣ୍ଟ ପକାଇ ଛକ ବଜାର ଜଗିଛି । ସହରରେ ୧୬୩ ଧାରା ବଳବତ୍ତର ରହିଛି । ଉତ୍ତେଜନାମୂଳକ ପରିସ୍ଥିତିକୁ ଦେଖି ଜିଲ୍ଲାବ୍ୟାପୀ ଇଣ୍ଟରନେଟ ସେବା ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ରହିଛି । ପୁରୁଣା ବଜାର ଥାନାରେ ୨ଟି ମାମଲା ଦାୟର କରାଯାଇଛି । ହିଂସାକାଣ୍ଡରେ ସମ୍ପୃକ୍ତ ଥିବା ୭ ଜଣଙ୍କୁ ଗିରଫ କରାଯାଇଛି । ସେପଟେ ଧାମନଗରରେ ଶୁକ୍ରବାର ରାତିରେ ଚାଲିଥିବା ୩ ଘଣ୍ଟାର ଥାନା ଘେରାଉ ଘଟଣାକୁ ନେଇ ଜିଲ୍ଲାପ୍ରଶାସନ ସଜାଗ ହୋଇଛି ।
ଧାମନଗର ଏନଏସି ଓ ଦୋବଲ ଅଞ୍ଚଳରେ ୧୬୩ ଧାରା ଲାଗୁ ହୋଇଛି । ବିଳମ୍ବିତ ରାତିରେ ଜିଲ୍ଲାପାଳ ଓ ଏସପି ଘଟଣାସ୍ଥଳ ପରିଦର୍ଶନ କରିଛନ୍ତି । ବର୍ତ୍ତମାନ ଭଦ୍ରକ ସହରରେ ୧୨ ପ୍ଲାଟୁନ ପୁଲିସ ମୁତୟନ ହୋଇଛନ୍ତି । ଧାମନଗର ଥାନା ଅଞ୍ଚଳରେ ୬ ପ୍ଲାଟୁନ ଫୋର୍ସ ନିୟୋଜିତ ହୋଇଛନ୍ତି । ଦୁଇ ପ୍ଲାଟୁନ ରାପିଡ୍ଆକ୍ସନ ଫୋର୍ସ ଭଦ୍ରକରେ ପହଞ୍ଚିଛନ୍ତି । ସେମାନଙ୍କୁ ନେଇ ସାରା ସହରରେ ସନ୍ଧ୍ୟାରେ ଫ୍ଲାଗମାର୍ଚ୍ଚ କରାଯାଇଛି ।
ଶନିବାର ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ଭଦ୍ରକ ଗସ୍ତ କରି ଶାନ୍ତି ବଜାୟ ରଖିବାକୁ ନିବେଦନ କରିଛନ୍ତି । ଏସ୍ପିଙ୍କ କାର୍ଯ୍ୟାଳୟରେ ଅନୁଷ୍ଠିତ ବୈଠକରେ ମନ୍ତ୍ରୀ ସୂର୍ଯ୍ୟବଂଶୀଙ୍କ ସହ ଏସ୍ପି ବରୁଣ ଗୁଣ୍ଠୁପାଲି, ଜିଲ୍ଲାପାଳ ଦିଲ୍ଲୀପ ରାଉତରାଏ, ସାଂସଦ ଅଭିମନ୍ୟୁ ସେଠୀ, ଭଦ୍ରକ ବିଧାୟକ ସିତାଂଶୁ ଶେଖର ମହାପାତ୍ର ପ୍ରମୁଖ ଉପସ୍ଥିତ ଥିଲେ । ଭଦ୍ରକ ସନ୍ଥିଆ ବଜାର ସାଳନ୍ଦୀ ସେତୁ ଉପରେ ଶୁକ୍ରବାର ବିକ୍ଷୋଭକାରୀଙ୍କ ସୀମା ଲଂଘିବା ଘଟଣାରେ ପୁଲିସ ପ୍ରଶାସନ କଡ଼ା ପଦକ୍ଷେପ ଆରମ୍ଭ କରିଛି । ଏହି ବିକ୍ଷୋଭରେ ସାମିଲ ଶତାଧିକ ଲୋକଙ୍କ ନାମରେ ମାମଲା ଦାଏର କରିଛି । ବିକ୍ଷୋଭକାରୀଙ୍କ ଢେଲା ମାଡ଼ରେ ଆହତ ଦୁଇ ପୁଲିସ ଅଧିକାରୀଙ୍କ ପ୍ରସଙ୍ଗକୁ ନେଇ ପୁଲିସ ନିଜ ଆଡ଼ୁ ୨୭୦/୨୪ରେ ମାମଲା ରୁଜୁ କରି ୭ ଜଣଙ୍କୁ ଜେଲ ପଠାଇଛି । ଗିରଫ ସଂଖ୍ୟା ଆହୁରି ବଢିବ ବୋଲି ଆଇଆଇସି କହିଛନ୍ତି । ସେହିଭଳି ଅଧିକ ସଂଖ୍ୟକ ଲୋକଙ୍କୁ ମେଳି କରି ଆନ୍ଦୋଳନ କରିବା, ସର୍ବସାଧାରଣ ରାସ୍ତାକୁ ଦୀର୍ଘ ସମୟ ଧରି ଅବରୋଧ କରିବାକୁ ନେଇ ଉକ୍ତ ମାମଲାରେ ଶତାଧିକ ଆନ୍ଦୋଳନକାରୀଙ୍କ ବିରୋଧରେ ରୁଜୁ ହୋଇଛି ।
ଆନ୍ଦୋଳନ ବେଳର ଭିଡିଓ ଫୁଟେଜ ଯାଞ୍ଚ କରାଯାଇ ଅଭିଯୁକ୍ତଙ୍କୁ ଚିହ୍ନଟ ଚାଲିଛି । ସେହିଭଳି ସୋସିଆଲ ମିଡିଆ ମନ୍ତବ୍ୟକୁ ନେଇ ୨୬୯/୨୪ରେ ମାମଲା ରୁଜୁ ହୋଇଛି । ସାଇବର ସେଲ ଦ୍ୱାରା ଏହାର ତଦନ୍ତ ଜାରି ରହିଛି । ଶୁକ୍ରବାର ବିଳମ୍ବିତ ରାତିରୁ ପୁଲିସ ନାକାବନ୍ଦୀ କରି ଯାଞ୍ଚ ଆରମ୍ଭ କରିଛି । ପୁରୁଣା ବଜାର ଥାନା ଅଞ୍ଚଳ ନଂଘା ମହଲା ସମେତ ବିଭିନ୍ନ ଅଞ୍ଚଳରେ ଚଢ଼ଉ କରାଯାଇଛି । ଜିଲ୍ଲାରେ ଏଡିଜି ଶୁକ୍ରବାର ରାତିରୁ ଆସି ସ୍ଥିତିର ସମୀକ୍ଷା କରିଛନ୍ତି । ପୂର୍ବାଞ୍ଚଳ ଡିଆଇଜି ସତ୍ୟଜିତ ନାୟକଙ୍କ ସମେତ ଏସପି ବରୁଣ ଗୁଣ୍ଠୁପାଲି ଜିଲ୍ଲା ଆଇନ ଶୃଙ୍ଖଳା ଦାୟିତ୍ୱକୁ ପରିଚାଳନା କରୁଛନ୍ତି ।
ଶୁକ୍ରବାର ଥିବା ୧୦ ପ୍ଲାଟୁନ ଫୋର୍ସ ସମେତ ଆଜି ଆଉ ୨ ପ୍ଲାଟୁନ ଫୋର୍ସ ପହଞ୍ଚି ପଇଁତରା ମାରିଛନ୍ତି । ଗଣମାଧ୍ୟମକୁ ସୂଚନା ଦେଇ ଜିଲ୍ଲାପାଳ ଦିଲ୍ଲୀପ ରାଉତରାୟ କହିଛନ୍ତି, ଜିଲ୍ଲାର ସ୍ଥିତି ନିୟନ୍ତ୍ରଣାଧୀନ ରହିଛି । ସୋସିଆଲ ମିଡିଆର ଅପବ୍ୟବହାର ନେଇ ଇଣ୍ଟରନେଟକୁ ବିଚ୍ଛିନ୍ନ କରାଯାଇଛି । ସ୍ଥିତି ଉପରେ ନଜର ରହିଛି । ପରବର୍ତ୍ତୀ ସମୟରେ ବିଚାର ବିମର୍ଷ କରାଯାଇ ଇଣ୍ଟରନେଟ ସେବା ଚାଲୁ ହେବ କି ନାହିଁ ନିଷ୍ପତ୍ତି ନିଆଯିବ । ଏସ୍ପି ଶ୍ରୀ ଗୁଣ୍ଠୁପାଲି କହିଛନ୍ତି ଯେ, ଏବେ ଜିଲ୍ଲାରେ ମୋଟ ୧୮ ପ୍ଲାଟୁନ ଫୋର୍ସ ମୁତୟନ ହୋଇଛନ୍ତି । ୨ ପ୍ଲାଟୁନ ଆରଏଏଫ ଆସି ପହଞ୍ଚିଛନ୍ତି । ପୁଲିସ ପ୍ରଶାସନ ପୂରା ସଜାଗ ରହିଛି । ଆଇନ ଶୃଙ୍ଖଳା ସ୍ଥିତି ଠିକ ରହିଥିବା ସେ ପ୍ରକାଶ କରିଛନ୍ତି ।
ମୁଖ୍ୟ ଅଭିଯୁକ୍ତ ଗିରଫ
ସୋସିଆଲ ମିଡିଆ ମନ୍ତବ୍ୟକୁ ନେଇ ଉଠିଥିବା ବିବାଦର ମୁଖ୍ୟ ଅଭିଯୁକ୍ତ ପୁଲିସ ହାତରେ ଧରାପଡ଼ିଛି । ଏକ ନିର୍ଦ୍ଦିଷ୍ଟ ଧର୍ମକୁ ଆକ୍ଷେପ କଳାଭଳି ସୋସିଆଲ ମିଡିଆରେ ପୋଷ୍ଟିଂ ପ୍ରସଙ୍ଗ ନେଇ ଭଦ୍ରକ ପୁରୁଣା ବଜାର ଥାନାରେ ଅଭିଯୋଗ ହୋଇଥିଲା । ପୁଲିସ ୨୬୯/୨୪ରେ ମାମଲା ଦାଏର କରିଥିଲା । ଅଭିଯୋଗକାରୀଙ୍କ ପକ୍ଷରୁ ତୁରନ୍ତ ସମ୍ପୃକ୍ତ ଅଭିଯୁକ୍ତକୁ ଧରିବାକୁ ଦାବି ହୋଇଥିଲା । ଏହି ମାମଲାକୁ ନେଇ ଗତକାଲି ସନ୍ଥିଆ ପୋଲ ଉପରେ ଆନ୍ଦୋଳନ ତୀବ୍ରତର ହୋଇ ଢେଲା ପଥର ମାଡ଼ ହୋଇଥିଲା । ଆଜି ଉକ୍ତ ଅଭିଯୋଗର ମୁଖ୍ୟ ଅଭିଯୁକ୍ତକୁ ଭଦ୍ରକ ପୁଲିସ ଗିରଫ କରିଛି । ଅଭିଯୁକ୍ତକୁ ପୁଲିସ ଅଜ୍ଞାତ ସ୍ଥାନରେ ରଖି ଜେରା କରୁଥିବା ଏସ୍ପି ସୂଚନା ଦେଇଛନ୍ତି ।
