ନୂଆଦିଲ୍ଲୀ: ଭାରତ ରାଷ୍ଟ୍ର ସମିତି (BRS) ନେତା କେ.କବିତା ଆଜି (ଶନିବାର) ତେଲେଙ୍ଗାନାର ଇତିକିଆଲରେ ପ୍ରଚାର କରୁଥିବା ସମୟରେ ହଠାତ ଅଚେତ ହୋଇଯାଇଥିଲେ । ଆଗାମୀ ବିଧାନସଭା ନିର୍ବାଚନ ପାଇଁ ମତଦାନ ପୂର୍ବରୁ ସେ ତାଙ୍କ ଦଳର ପ୍ରାର୍ଥୀ ପାଇଁ ପ୍ରଚାର କରୁଥିଲେ । ଏହି ସମୟରେ ଏଭଳି ଅଘଟଣ ଘଟିଥିଲା । 

ମୁଖ୍ୟମନ୍ତ୍ରୀ କେ.ଚନ୍ଦ୍ରଶେଖର ରାଓଙ୍କ ଝିଅ କେ.କବିତା ଏକ ଖୋଲା ଗାଡି ଉପରେ  ମାଇକ୍ରୋଫୋନ୍ ମାଧ୍ୟମରେ ତାଙ୍କ ସମର୍ଥକଙ୍କୁ ସମ୍ବୋଧିତ କରୁଥିଲେ । ଆଉ ଏହି ସମୟରେ ସେ ହଠାତ ଅଚେତ ହୋଇପଡିଥିଲେ । ପାଖରେ ଥିବା ସମର୍ଥକ ମାନେ ତାଙ୍କୁ ଧରିନେଇଥିଲେ । ଏହି ଘଟଣା ସମ୍ପର୍କରେ କବିତାଙ୍କ ଟିମ୍ ଏକ ବିବୃତ୍ତି ଜାରି କରିଛି । ଏଥିରେ କୁହାଯାଇଛି ଯେ ଡିହାଇଡ୍ରେସନ୍ କାରଣରୁ ତାଙ୍କ ସ୍ୱାସ୍ଥ୍ୟ ଅବସ୍ଥା ଖରାପ ହୋଇଯାଇଥିଲା ଏବଂ କିଛି ସମୟ ପରେ ଏହି ଅଭିଯାନ ଆରମ୍ଭ ହୋଇଥିଲା । 

ଏହି ଘଟଣାର କିଛି ସମୟ ପରେ କେ.କବିତା ଏକ ଭିଡିଓ ଜାରି କରିଛନ୍ତି । ଏଥିରେ ସେ ଏକ ଘର ଭିତରେ ଏକ ଖଟ ଉପରେ ବସିଥିବାର ନଜର ଆସିଛନ୍ତି । ଭିଡିଓରେ ସେ ଏକ ଛୋଟ ଝିଅ ସହିତ କଥା ହେଉଛନ୍ତି । ଭିଡିଓ ପୋଷ୍ଟ କରି ସେ ସୋସିଆଲ ମିଡିଆ ପ୍ଲାଟଫର୍ମରେ ଲେଖିଛନ୍ତି ଯେ, ମୁଁ ସମ୍ପୂର୍ଣ୍ଣ ସୁସ୍ଥ ଅଛି । ଏଇ ଛୋଟ ଛୁଆଟି ସହ ମୋର ସାକ୍ଷାତ ହେଲା । ଏହା ପରେ ମୁଁ ଅଧିକ ଶକ୍ତିଶାଳୀ ଅନୁଭବ କରୁଛି । 

#WATCH | BRS MLC K Kavitha fell unconscious during a road show at Itikyal in Telangana

More details awaited.

(Source: BRS) pic.twitter.com/VRIBlvALF2

— ANI (@ANI) November 18, 2023

ସୂଚନାଯୋଗ୍ୟ ଯେ, ୧୧୯ ଟି ଆସନ ବିଶିଷ୍ଟ ତେଲେଙ୍ଗାନାରେ ନଭେମ୍ବର ୩୦ ରେ ଭୋଟ୍ ଗ୍ରହଣ କରାଯିବ ଏବଂ ଡିସେମ୍ବର ୩ ରେ ଭୋଟ୍ ଗଣନା କରାଯିବ । ରାଜସ୍ଥାନ, ଛତିଶଗଡ, ମଧ୍ୟପ୍ରଦେଶ ଏବଂ ମିଜୋରାମରେ ଅନୁଷ୍ଠିତ ବିଧାନସଭା ନିର୍ବାଚନର ଫଳାଫଳ ମଧ୍ୟ ସେହି ଦିନ ଆସିବ । ଏଥର ତେଲେଙ୍ଗାନାରେ ବିଆରଏସ, ବିଜେପି ଏବଂ କଂଗ୍ରେସ ମଧ୍ୟରେ ଏକ ତ୍ରିକୋଣୀୟ ପ୍ରତିଯୋଗିତା ହେଉଛି ।