ଭୁବନେଶ୍ୱର,୦୧/୦୯: ସରକାରୀ ମେଡିକାଲ ଓ ଇଞ୍ଜିନିୟରିଂ କଲେଜରେ ପଢ଼ୁଥିବା ଏସ୍ଟି ଓ ଏସ୍ସି ଛାତ୍ରଛାତ୍ରୀଙ୍କୁ କୋର୍ସ ଫି ଫେରସ୍ତ କରାଯିବ । ନାମଲେଖା ଦେୟ, ସିଟ୍ ଗ୍ରହଣ ଦେୟ, ପ୍ରାରମ୍ଭିକ ଜମା, ବାର୍ଷିକ ପାଠ୍ୟକ୍ରମ ଫି (ଟ୍ୟୁସନ୍ ଫି ଏବଂ ଅନୁଷ୍ଠାନର ସମସ୍ତ ବାଧ୍ୟତାମୂଳକ ଦେୟ), ହଷ୍ଟେଲ୍ ନାମଲେଖା ଦେୟ ଏବଂ ବାର୍ଷିକ ହଷ୍ଟେଲ୍ ଓ ମେସ୍ ଚାର୍ଜ ଛାଡ଼ କରାଯିବ । ଏ ସମସ୍ତ ଖର୍ଚ୍ଚ ଅନୁସୂଚିତ ଜାତି ଉନ୍ନୟନ, ସଂଖ୍ୟାଲଘୁ ଓ ପଛୁଆ ବର୍ଗ କଲ୍ୟାଣ ବିଭାଗ ପକ୍ଷରୁ କରାଯିବ । ଏଥିସହ ସହ ପାଠପଢ଼ା ପାଇଁ ସମସ୍ତ ଆନୁଷଙ୍ଗିକ ଖର୍ଚ୍ଚ ତଥା ବହି, ଅଧ୍ୟୟନ ସାମଗ୍ରୀ କୋଚିଂ, ଟ୍ୟୁଟୋରିଆଲ୍ ଖର୍ଚ୍ଚ ବହନ କରିବ ବିଭାଗ । ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ, ସଂଖ୍ୟାଲଘୁ ଓ ପଛୁଆ ବର୍ଗ କଲ୍ୟାଣ ବିଭାଗ ପକ୍ଷରୁ ମୁଖ୍ୟମନ୍ତ୍ରୀ ମେଧାବୀ ଛାତ୍ର ପ୍ରୋତ୍ସାହନ ଯୋଜନା (ଏମ୍ଏମ୍ସିପିୱାଇ)ରେ ଏହି ଆର୍ଥିକ ସହାୟତା ପ୍ରଦାନ କରାଯିବ ।
ଏମ୍ଏମ୍ସିପିୱାଇ ଅଧୀନରେ ସରକାରୀ ଶିକ୍ଷାନୁଷ୍ଠାନରେ ଏମ୍ବିବିଏସ୍ ଏବଂ ଇଞ୍ଜିନିୟରିଂ (ବିଟେକ୍ ଓ ଏମ୍ଟେକ୍) ପଢ଼ୁଥିବା ଏସ୍ସି ଓ ଏସ୍ଟି ଛାତ୍ରଛାତ୍ରୀଙ୍କ ପାଠ୍ୟକ୍ରମ ଅବଧିର ସମ୍ପୂର୍ଣ୍ଣ କୋର୍ସ ଫି ଅନ୍ତର୍ଭୁକ୍ତ କରାଯିବ । ୨୦୨୩-୨୪ ଶିକ୍ଷା ବର୍ଷରୁ ଏହାକୁ ଲାଗୁ କରାଯିବ । ଅନୁଷ୍ଠାନର ଡିନ୍ ତଥା ମୁଖ୍ୟ ଏବଂ ଛାତ୍ରଛାତ୍ରୀଙ୍କ ସ୍ୱାକ୍ଷରିତ ଏ ସମସ୍ତ ଖର୍ଚ୍ଚକୁ ଏହି ଯୋଜନା ଅଧୀନରେ ଭରଣା କରିବାକୁ ଜିଲ୍ଲାପାଳଙ୍କ ପାଖକୁ ପଠାଯିବ । ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ, ସଂଖ୍ୟାଲଘୁ ଓ ପଛୁଆ ବର୍ଗ କଲ୍ୟାଣ ବିଭାଗ ପକ୍ଷରୁ ସମସ୍ତ ପାଠପଢ଼ା ଖର୍ଚ୍ଚ ବହନ କରାଯିବ । ଏନେଇ ବିଭାଗୀୟ ସଚିବ ରୂପା ରୋଶନ ସାହୁ ସମସ୍ତ ଜିଲ୍ଲାପାଳଙ୍କୁ ଚିଠି ଲେଖି ଜଣାଇଛନ୍ତି ।
