ନୂଆଦିଲ୍ଲୀ,୧୫/୦୪: ଅଭିବୃଦ୍ଧିଶୀଳ ରାଷ୍ଟ୍ରଙ୍କ ମଧ୍ୟରେ ଭାରତ ଏବେ ସବୁଠାରୁ ଆଗରେ ରହିଛି । ଜିଡିପି ଦୃଷ୍ଟିକୋଣରୁ ଭାରତ ବର୍ତ୍ତମାନ ୫ମ ସ୍ଥାନରେ ରହିଛି । ତେବେ ୨୦୭୫ ବେଳକୁ ଦେଶ ଦ୍ୱିତୟ ବଡ ଅର୍ଥନୀତି ପାଲଟିବ । ବର୍ତ୍ତମାନ ଭାରତ ଜିଡିପିର ଆକାର ୪.୧୧ ଟ୍ରିଲିୟନ ଡଲାର ଥିବା ବେଳେ ୨୦୭୫ ବେଳକୁ ଏହା ୫୨.୫ ଟ୍ରିଲିୟନ ଡଲାରକୁ ବୃଦ୍ଧି ହେବ ବୋଲି ଗୋଲ୍ଡ ମ୍ୟାନ ସ୍ୟାଚ୍ ପକ୍ଷରୁ ଆକଳନ କରାଯାଇଛି । ବର୍ତ୍ତମାନ ଆମେରିକା ବିଶ୍ୱର ୧ ନମ୍ବର ଅର୍ଥବ୍ୟବସ୍ଥା । ଏହା ପରେ ଚୀନ, ଜର୍ମାନୀ ଏବଂ ଜାପାନ ରହିଛନ୍ତି । ୨୦୨୭ ସୁଦ୍ଧା ଭାରତ ବିଶ୍ୱର ତୃତୀୟ ବଡ ଅର୍ଥ ବ୍ୟବସ୍ଥା ପାଲଟିବ ବୋଲି କୁହାଯାଉଛି । ସେହିଭଳି ୨୦୭୫ ବେଳକୁ ବିଶ୍ୱର ଶୀର୍ଷ ୧୦ ଅର୍ଥ ବ୍ୟବସ୍ଥା ମଧ୍ୟରେ ୪ ଇସଲାମୀୟ ଦେଶ ସାମିଲ ହେବାର ସମ୍ଭାବନା ରହିଛି ।
ଏବେ କୌଣସି ଦେଶ ଟପ୍ ୧୦ ମଧ୍ୟରେ ନାହାନ୍ତି । ଇଣ୍ଡୋନେସିଆ ୧.୫୧ ଲକ୍ଷ କୋଟି ଡଲାର ଜିଡିପି ସହ ୧୬ତମ, ତୁର୍କୀ ୧.୩୪ ଲକ୍ଷ କୋଟି ଡଲାର ଅର୍ଥନୀତି ସହ ୧୭ତମ ଏବଂ ସାଉଦି ଆରବ ୧.୧୧ ଲକ୍ଷ କୋଟି ଡଲାର ଜିଡିପି ସହ ୧୯ତମ ସ୍ଥାନରେ ରହିଛି । ୨୦୭୫ ବେଳକୁ ଇଣ୍ଡୋନେସିଆ, ନାଇଜେରିଆ, ପାକିସ୍ତାନ ଏବଂ ଇଜିଷ୍ଟ ଭଳି ଦେଶ ଟପ୍ ୧୦ରେ ସାମିଲ ହୋଇପାରନ୍ତି । ୧୩.୭ ଟ୍ରିଲିୟନ ଡଲାର ଜିଡିପି ସହ ଇଣ୍ଡୋନେସିଆ ୪ର୍ଥ ଏବଂ ନାଇଜେରିଆ ୫ମ ସ୍ଥାନରେ ରହିବ । ସେହିଭଳି ୧୨.୩ ଟ୍ରିଲିୟନ ଡଲାର ଜିଡିପି ସହ ପାକିସ୍ତାନ ୬ଷ୍ଠ ସ୍ଥାନରେ ରହିପାରେ । ବର୍ତ୍ତମାନ ପାକିସ୍ତାନ ଆର୍ଥିକ ସଙ୍କଟ ଦେଇ ଗତି କରୁଛି । ଏହାର ଜିଡିପି ୩୪୦.୬୪ ବିଲିୟନ ଡଲାର । ଯାହା ମହାରାଷ୍ଟ୍ରର ଜିଡିପି ଠାରୁ ମଧ୍ୟ କମ୍ । ଟାଟା ଗ୍ରୁପର ବଜାର ପୁଞ୍ଜିକରଣ ପାକିସ୍ତାନ ଠାରୁ ମଧ୍ୟ ଅଧିକ ।
ବିଶ୍ୱର ଆହ୍ୱାନପୂର୍ଣ୍ଣ ସ୍ଥିତିରେ ମଧ୍ୟ ଭାରତ ଅଭିବୃଦ୍ଧି ଧାରା ଜାରି ରଖିଛି । ଘରୋଇ ବଜାର ଜାରି ରଖିଥିବା ସଂସ୍କାର ପଦକ୍ଷେପ ଅଭିବୃଦ୍ଧିକୁ ତ୍ୱରାନ୍ୱିତ କରୁଛି । ଦେଶର ଅର୍ଥନୀତି ଉପରେ ବିଦେଶୀ ନିବେଶକମାନେ ଆଶା ପ୍ରକଟ କରୁଛନ୍ତି । ଫଳରେ ଘରୋଇ ନିବେଶ ବଢ଼ୁଛି । ନିବେଶକୁ ପ୍ରୋତ୍ସାହିତ କରିବା ଦେଶରେ କେନ୍ଦ୍ର ସରକାର ପୁଞ୍ଜି ଖର୍ଚ୍ଚକୁ ମଧ୍ୟ ବଢ଼ାଉଛନ୍ତି ।