ନୂଆଦିଲ୍ଲୀ/ଭୁବନେଶ୍ୱର,୦୩/୦୫: ଚଳିତ ଆର୍ଥିକବର୍ଷର ପ୍ରଥମ ମାସରେ ସାମଗ୍ରୀ ଏବଂ ସେବା ଟିକସ(ଜିଏସ୍ଟି) ଆଦାୟରେ ରେକର୍ଡ କରିଛି ରାଜ୍ୟ । ୨୦୨୪ ଏପ୍ରିଲ ମାସରେ ଓଡ଼ିଶା ସର୍ବାଧିକ ୫୯୦୨.୨୫ କୋଟି ଟଙ୍କାର ମୋଟ ଜିଏସ୍ଟି (ସିଜିଏସ୍ଟି୍ମଆଇଜିଏସ୍ଟି୍ମଓଜିଏସ୍ଟି୍ମସେସ୍) ଆଦାୟ କରିଥିବା ଜଣାପଡ଼ିଛି ।
ପୂର୍ବବର୍ଷ ସମାନ ସମୟରେ ରାଜ୍ୟ ୫୦୩୫.୭୪ କୋଟି ଟଙ୍କାର ପରୋକ୍ଷ ଟିକସ ସଂଗ୍ରହ କରିଥିଲା । ଏ କ୍ଷେତ୍ରରେ ୧୭.୨୧% ଅଭିବୃଦ୍ଧି ହାସଲ କରିଛି ରାଜ୍ୟ । ତେବେ ସମାନ ଅବଧିରେ ଜାତୀୟ ସ୍ତରରେ ଅଭିବୃଦ୍ଧି ହାର ରହିଛି ୧୨.୪% ।
ଓଡ଼ିଶା ମଧ୍ୟ ରେକର୍ଡ ରାଜ୍ୟ ଜିଏସ୍ଟି(ଓଜିଏସ୍ଟି୍ମଆଇଜିଏସ୍ଟି ସେଟେଲ୍ମେଣ୍ଟ) ଆଦାୟ କରିଛି । ଚଳିତ ଆର୍ଥିକବର୍ଷର ପ୍ରଥମ ମାସରେ ରାଜ୍ୟ ୨୯୯୬.୦୫ କୋଟିର ରାଜ୍ୟ ଜିଏସ୍ଟି ଆଦାୟ କରିଛି, ଯାହାକି ୨୦୨୩ ଏପ୍ରିଲରେ ୨୨୫୩.୭୧ କୋଟି ଟଙ୍କା ଥିଲା । ଏ କ୍ଷେତ୍ରରେ ୩୨.୯୪% ଅଭିବୃଦ୍ଧି ଦେଖିବାକୁ ମିଳିଛି । ଏଥିମଧ୍ୟରୁ ୨୦୮୧.୮୩ କୋଟିର ଓଜିଏସ୍ଟି ମଧ୍ୟ ଏଯାବତ ସର୍ବାଧିକ ଓଜିଏସ୍ଟି ଆଦାୟ ।
ସରକାରୀ ତଥ୍ୟ ଅନୁସାରେ ୨୦୨୪ ଏପ୍ରିଲରେ ରାଜ୍ୟରେ ୨୩.୧୫ ଲକ୍ଷ ଇ-ୱେ ବିଲ୍ ଜାରି ହୋଇଛି । ଏହା ୨୦୨୩ ଏପ୍ରିଲରେ ୨୦.୯୦ ଲକ୍ଷ ଥିଲା । ଏ କ୍ଷେତ୍ରରେ ୧୦.୭୬% ଅଭିବୃଦ୍ଧି ଦେଖିବାକୁ ମିଳିଛି । ଜାରି ହୋଇଥିବା ୨୩.୧୫ ଲକ୍ଷ ଇ-ୱେ ବିଲ୍ ମଧ୍ୟରୁ ୧୨.୩୮ ଲକ୍ଷ ହେଉଛି ଇଣ୍ଟ୍ରା-ଷ୍ଟେଟ୍ ଇ-ୱେ ବିଲ୍ ଏବଂ ୮.୫୧ ଲକ୍ଷ ହେଉଛି ଇଣ୍ଟର୍-ଷ୍ଟେଟ୍ ଇ-ୱେ ବିଲ୍ ।
କେନ୍ଦ୍ର ଅର୍ଥ ମନ୍ତ୍ରାଳୟ ତଥ୍ୟ ଅନୁସାରେ ଚଳିତବର୍ଷ ଏପ୍ରିଲରେ ଦେଶରେ ରେକର୍ଡ ୨.୧୦ ଲକ୍ଷ କୋଟି ଟଙ୍କାର ଜିଏସ୍ଟି ଆଦାୟ ହୋଇଛି । ଏ କ୍ଷେତ୍ରରେ ପ୍ରଥମ ଥର ପାଇଁ ୨ ଲକ୍ଷ କୋଟି ମାଇଲ୍ଖୁଣ୍ଟ ପାର୍ ହୋଇଛି । ବିଭିନ୍ନ ପ୍ରକାର ରିଫଣ୍ଡ୍ ପରେ ନେଟ୍ ରାଜସ୍ୱ ଆଦାୟ ୧.୯୨ ଲକ୍ଷ କୋଟି ଟଙ୍କା ରହିଛି । ଘରୋଇ କାରବାର ଏବଂ ଆମଦାନି ବୃଦ୍ଧି ଯୋଗୁ ମୋଟ ଜିଏସ୍ଟି ଆଦାୟରେ ୧୨.୪% ଅଭିବୃଦ୍ଧି ଦେଖିବାକୁ ମିଳିଛି ।
ଏହି ୨.୧୦ ଲକ୍ଷ କୋଟି ଟଙ୍କା ମଧ୍ୟରୁ କେନ୍ଦ୍ରୀୟ ଜିଏସ୍ଟି ପରିମାଣ ୪୩,୮୪୬ କୋଟି ଟଙ୍କା ଥିବାବେଳେ ରାଜ୍ୟ ଜିଏସ୍ଟି ୫୩,୫୩୮ କୋଟି, ସମନ୍ୱିତ ଜିଏସ୍ଟି ୯୯,୬୨୩ କୋଟି ଏବଂ କ୍ଷତିପୂରଣ ସେସ୍ ବାବଦ ୧୩,୨୬୦ କୋଟି ଟଙ୍କା ରହିଛି ।
