ବିହାର ୦୫/୦୨: ବିହାର ମୋତିହାରିରେ ନିକଟରେ ହୋଇଥିବା ଏକ ବିବାହ ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ଏହି ବିବାହର ବିଶେଷତ୍ୱ ହେଲା କନ୍ୟା ସୋଇଲ୍ଲୀନା ହେଉଛନ୍ତି ଇଣ୍ଡୋନେସିଆର ବାସିନ୍ଦା । ଭାରତକୁ ଆସି ସେ ସଂପୂର୍ଣ୍ଣ ହିନ୍ଦୁ ରୀତି ନୀତି ଅନୁସାରେ ମୋତିହାରିର ହର୍ଷବର୍ଦ୍ଧନ କୁମାରଙ୍କ ସହିତ ବିବାହବନ୍ଧନରେ ଆବଦ୍ଧ ହୋଇଛନ୍ତି । 

ମୋତିହାରିର ପତାହି ପ୍ରଖଣ୍ଡର ବାସିନ୍ଦା ଅଖିଳେଶ କୁମାରଙ୍କ ପୁଅ ହର୍ଷବର୍ଦ୍ଧନ କୁମାର ୨୦୧୮ରେ ଇଣ୍ଡୋନେସିଆ ଯାଇଥିଲେ । ସେଠାକାର ଏକ ବିଶ୍ୱବିଦ୍ୟାଳୟରେ ତାଙ୍କର ସୋଇଲ୍ଲୀନାଙ୍କ ସହ ସାକ୍ଷାତ ହୋଇଥିଲା । ଧୀରେ ଧୀରେ ସେମାନେ ପରସ୍ପରର ନିକଟତର ହୋଇଥିଲେ । ଇତିମଧ୍ୟରେ ୨୦୨୧ରେ ଜୟପୁରସ୍ଥିତ ଏକ ବିଶ୍ୱବିଦ୍ୟାଳୟରେ ସହାୟକ ପ୍ରଫେସର ଭାବେ ଯୋଗ ଦେବାକୁ ଭାରତ ପଳାଇ ଆସିଥିଲେ ହର୍ଷବର୍ଦ୍ଧନ । କିନ୍ତୁ ସ୍ଥାନର ଦୂରତ୍ୱ ସେମାନଙ୍କ ମନରେ ଦୂରତ୍ୱ ସୃଷ୍ଟି କରିପାରିନଥିଲା । ସାତ ଜନ୍ମର ସାଥୀ ହେବାକୁ ନିଷ୍ପତ୍ତି ନେଇଥିଲେ ଏହି ଦମ୍ପତି । ସେ ଅନୁସାରେ, ପ୍ରଥମେ ଇଣ୍ଡୋନେସିଆରେ ବିବାହ କରିଥିଲେ । ଏହାପରେ ସୋଇଲ୍ଲୀନା ନିକଟରେ ନିଜ ମା’ଙ୍କ ସହିତ ଭାରତ ଆସିବା ପରେ ମୋତିହାରିରେ ହିନ୍ଦୁ ପରମ୍ପରା ଅନୁସାରେ ବିବାହ କରିଛନ୍ତି । ବିବାହ ସମୟରେ ଭାରତୀୟ ପୋଷାକ ପିନ୍ଧି ସୋଇଲ୍ଲୀନା ଅତ୍ୟନ୍ତ ସୁନ୍ଦର ଦିଶୁଥିଲେ ।