ଭୁବନେଶ୍ୱର,୦୯/୦୮: ‘ରାମାୟଣ’, ‘ମହାଭାରତ’ ଓ ପୁରାଣଶାସ୍ତ୍ରଠାରୁ ଆରମ୍ଭ କରି ଆଧୁନିକ ଲେଖକଙ୍କର ପୁସ୍ତକ ବି ମିଳିଯାଉଛି ଇଣ୍ଟରନେଟ୍ରେ । ହେଲେ ଆଜିବି ପ୍ରତି ଘରେ ରାମାୟଣ, ମହାଭାରତ, ପୁରାଣ, ଭାଗବତ ଆଦି ଧର୍ମ ପୁସ୍ତକର ଚାହିଦା ରହିଛି । ତା'ଛଡ଼ା ପଥଶ୍ରମ ଦୂର କରିବା କିମ୍ବା ଅବସର ବିନୋଦନ ପାଇଁ ଟ୍ରେନ୍, ବସ୍ରେ ଅନେକ ଲୋକ ବହି, ପତ୍ରପତ୍ରିକା ପଢ଼ିବାକୁ ଭଲ ପାଆନ୍ତି । ଯୁଗ ଯେତେ ଡିଜିଟାଲ୍ ହେଲେ ବି ବହିର ଚାହିଦା କମିନି । କାହିଁକି ନା ସାଇତି ରଖି ଦରକାର ସମୟରେ ପୁଣି ପଢ଼ିବା ଲାଗି ବହି ଦରକାର । ପୁସ୍ତକପ୍ରେମୀ ମାନଙ୍କ ଆଲମାରୀ ତ ବିଭିନ୍ନ ପୁସ୍ତକରେ ଭରି ରହିଥାଏ । ବହିର ଜାଗା କେବେ ଇଣ୍ଟରନେଟ୍ କିମ୍ବା ଇ-ବୁକ୍ ନେବା ସମ୍ଭବ ନୁହେଁ । ଅନ୍ୟଅର୍ଥରେ କହିବାକୁ ଗଲେ ଇବୁକ୍ କେବେବି ପାଠକଙ୍କୁ ପୁସ୍ତକ ମୋହରୁ ଦୂରେଇ ପାରିବ ନାହିଁ ।
ଇଣ୍ଟରନେଟ୍ରେ ପୃଥିବୀର ଯେକୌଣସି ଲେଖକଙ୍କର ବହି ଖୋଜିଲେ ମିଳିପାରୁଛି । ତଥାପି ଛାପା ବହି ପଢ଼ିବାର ଆଗ୍ରହ କମିନି । ପାଠକଙ୍କ ଆଗ୍ରହ ଦେଖି ରାଜାଧାନୀ ଭୁବନେଶ୍ୱରରେ ବର୍ତ୍ତମାନ ଅନେକ ନୂତନ ପ୍ରକାଶନ ସଂସ୍ଥା ମଧ୍ୟ ଗଢ଼ି ଉଠିଛି । କେତେକ ପ୍ରକାଶନ ସଂସ୍ଥା ପ୍ରଥମକରି ପୁସ୍ତକ ପ୍ରକାଶ କରିବାକୁ ଚାହୁଁଥିବା ଯୁବ ଲେଖକମାନଙ୍କୁ ଉତ୍ସାହିତ କରି ସେମାନଙ୍କ ପୁସ୍ତକକୁ ପ୍ରକାଶ କରୁଛନ୍ତି । ରାଜଧାନୀରେ ତଥା ରାଜ୍ୟର ବିଭିନ୍ନ ଅଞ୍ଚଳରେ ବହି ପଢ଼ାକୁ ପ୍ରୋତ୍ସାହିତ କରିବା ଲାଗି ପୁସ୍ତକ ମେଳା ମଧ୍ୟ ଆୟୋଜିତ ହେଉଛି ।
ପୁରୁଣା ବସଷ୍ଟାଣ୍ଡରେ ଥିବା ମା'ନାରାୟଣୀ ବୁକ୍ ଷ୍ଟଲର ମାଲିକ ବାବୁଲା ବେହେରା କହନ୍ତି, "ମୋର ଅନେକ ନିର୍ଦ୍ଦିଷ୍ଟ ଗ୍ରାହକ ଅଛନ୍ତି ଯେଉଁମାନେ ନିୟମିତ ଭାବରେ ବହି କିଣିବାକୁ ଆସନ୍ତି । ବିଶେଷକରି ପାଠକ ପ୍ରତିଭା ରାୟ, ବିଭୂତି ପଟ୍ଟନାୟକ, ମନୋଜ ଦାସ, ଗୋପିନାଥ ମହାନ୍ତି, ଗୌରହରି ଦାସ , ଅଜୟ ସ୍ୱାଇଁଙ୍କ ଭଳି ଲେଖକଙ୍କର ପୁସ୍ତକକୁ ଅଧିକ ଖୋଜୁଛନ୍ତି । ଏଥିସହିତ ଅନେକ ଯୁବ ଲେଖକଙ୍କ ବହି ମଧ୍ୟ ଭଲ ବିକ୍ରି ହେଉଛି' ।
