ଭୁବନେଶ୍ୱର,୦୭/୦୬: କିଏ ହେବ କଂଗ୍ରେସ ବିଧାୟକ  ଦଳ ନେତା । ସେ ନେଇ ଏବେଠୁ ଚର୍ଚ୍ଚା ଆରମ୍ଭ ହୋଇଛି । ଏ  ନେଇ ଦୌଡ଼ରେ ସବୁଠୁ ଆଗରେ ରହିଛନ୍ତି ଜୟପୁର ବିଧାୟକ ତାରାପ୍ରସାଦ ବାହିନୀପତି । ତାରା ବିଧାନସଭାକୁ ୫ଥର ନିର୍ବାଚିତ ହୋଇଛନ୍ତି । ସେ ୨୦୦୦, ୨୦୦୪ରେ କୋରାପୁଟରୁ ଓ ୨୦୧୪,  ୨୦୧୯ ଓ ୨୦୨୪ରେ ଜୟପୁର ଆସନରୁ ବିଧାନସଭାକୁ ନିର୍ବାଚିତ  ହୋଇଛନ୍ତି । ଦୀର୍ଘ ଦିନର ଅଭିଜ୍ଞତା ଯୋଗୁଁ ତାଙ୍କୁ କଂଗ୍ରେସର ବିଧାୟକ ଦଳ ନେତା କରାଯିବ ବୋଲି ଶୁଣାଯାଉଛି । 

ସେହିପରି ସାନଖେମୁଣ୍ଡି ବିଧାୟକ ରମେଶ ଜେନାଙ୍କ ନାମ ବି ଚର୍ଚ୍ଚାରେ ରହିଛି ।  ରମେଶ ୩ ଥରର ବିଧାୟକ । ସେ ୨୦୦୯, ୨୦୧୯ ଓ ୨୦୨୪ରେ  ବିଧାନସଭାକୁ ଆସିଛନ୍ତି । ଅନ୍ୟ ଦୁଇ ବିଧାୟକ ଦୁଇ ଥର ଲେଖାଏଁ  ଜିତିଛନ୍ତି । ସେମାନେ ହେଲେ ରାଜଗାଙ୍ଗପୁର ବିଧାୟକ ଡାକ୍ତର ସି  ଏସ୍‌ ରାଜନ ଏକା ଓ ମୋହନା ବିଧାୟକ ଦାଶରଥି ଗମାଙ୍ଗ । ଦୁହେଁ  ୨୦୧୯ରେ ଜିତିଥିବା ବେଳେ ଚଳିତ ଥର ବି ଜିତିଛନ୍ତି । ଏହି  ୪ଜଣଙ୍କ ମଧ୍ୟରୁ କିଏ ଗୃହର ନେତା ଓ କିଏ ଉପନେତା ହେବ ତାହା  ଶୀଘ୍ର ସ୍ପଷ୍ଟ ହେବ ବୋଲି ପ୍ରଭାରୀ ଡ. ଅଜୟ କୁମାର କହିଛନ୍ତି ।