ଭୁବନେଶ୍ୱର,୧୫/୪: ପରିବା ହାଟକୁ ବାଟ ନାହିଁ । ଗାଡି ପଶିପାରୁନି । ପ୍ଲାଷ୍ଟିକ ହାଟ ବସାଇବାକୁ ନେଇ ଏହି ସମସ୍ୟା ସୃଷ୍ଟି ହୋଇଛି । ତେବେ ପରିବା ହାଟକୁ ଯିବା ବାଟରେ ଏହି ପ୍ଲାଷ୍ଟିକ୍‌ ହାଟ ବସାଇବାକୁ  ବିଏମ୍‌ସି କେମିତି ଅନୁମତି ଦେଲା? ଅନୁମତି ପଛରେ କାହାର ହାତ ରହିଛି ? ଦୁଇ ଦିନ ତଳେ ପ୍ଲାଷ୍ଟିକ ବଜାରକୁ ନେଇ କଞ୍ଚାପରିବା ବ୍ୟବସାୟୀ  ସଂଘ ଏବଂ ବିଏମ୍‌ସି ମୁହଁମୁହିଁ ହୋଇଥିଲେ ।  ତେବେ ଏହାର ସମାଧାନ ହୋଇପାରିନଥିଲା । ତେଣୁ  ସୋମବାର ଉକ୍ତ ସଂଘ ସମେତ ୧୨ଟି ସଂଘର  ବିଏମ୍‌ସି ସହ ବୈଠକ ବସିବ ବୋଲି ଜଣାପଡିଛି।

ୟୁନିଟ୍‌-୧ ହାଟ ରାସ୍ତାକୁ ନେଇ ଦୁଇ ଦିନ ତଳେ ପରିବା ବ୍ୟବସାୟୀ ଏକାଠି ହୋଇଥିଲେ । ସେମାନେ  ଅଭିଯୋଗ କରିଥିଲେ ଯେ, କୌଣସି ପରିସ୍ଥିତିରେ  ରାସ୍ତାରେ ପ୍ଲାଷ୍ଟିକ ଦୋକାନ ଖୋଲିପାରିବ ନାହିଁ । ଦୋକାନ ଖୋଲିଲେ ପରିବା ଗାଡି ପଶିପାରୁନି ।  ମୁଖ୍ୟ ରାସ୍ତାରେ ପରିବା ଗାଡ଼ିରୁ ଖଲାସ କଲେ ଅଟୋ  ଖର୍ଚ୍ଚ ବଢୁଛି । ଏହାର ପ୍ରଭାବ ସିଧାସଳଖ ଗ୍ରାହକଙ୍କ  ଉପରେ ପଡୁଛି । ତେଣୁ ଲୋକଙ୍କ ସ୍ୱାର୍ଥ ଦୃଷ୍ଟିରୁ  ପରିବା ଗାଡି ପାଇଁ ରାସ୍ତା ଛଡାଯାଉ । କିନ୍ତୁ ଦୁର୍ଭାଗ୍ୟ  ବିଏମ୍‌ସି ଜାଣିଶୁଣି ପ୍ଲାଷ୍ଟିକ ବଜାର ଖୋଲିବାକୁ  ଅନୁମତି ଦେଇଛି । ତେବେ କାହା ସ୍ୱାର୍ଥରେ ଅନୁମତି  ଦିଆଗଲା? ଏହା ପଛରେ କାହାର ହାତ ରହିଛି?  କେତେ ଟଙ୍କା କାରବାର ହୋଇଛି? ଏପରି ପ୍ରଶ୍ନ  ଉଠାଇଛି କଞ୍ଚାପରିବା ବ୍ୟବସାୟୀ ସଂଘ ।  

ସୋମବାର କଞ୍ଚାପରିବା ବ୍ୟବସାୟୀ ସଂଘ  ସମେତ ୧୨ ସଂଘ ଏକାଠି ହେବେ । ଆଜି ଡେଙ୍ଗୁରା  ପିଟି ଏ ନେଇ ସମସ୍ତ ଦୋକାନୀଙ୍କୁ ଜଣାଇ  ଦିଆଯାଇଛି । ବୈଠକରେ ହାଟକୁ ଅବହେଳା ପ୍ରସଙ୍ଗ  ଉଠିବ । ବ୍ୟବସାୟୀ ସଂଘ ସଭାପତି କବିରାଜ  ସ୍ୱାଇଁଙ୍କ କହିବା କଥା, ବିଏମ୍‌ସି ଉଚିତ୍‌ ନ୍ୟାୟ  ଦେଉ । ଏକପାଖିଆ ନିଷ୍ପତ୍ତି ନ ହେଉ । ଲୋକଙ୍କ  ସ୍ୱାର୍ଥକୁ ଦୃଷ୍ଟିରେ ରଖାଯାଉ । ବାରମ୍ବାର ବିଏମ୍‌ସି,  ପୁଲିସ ବୈଠକ ହେଉଛି ହେଲେ ଏହାର ସମାଧାନ  କରାଯାଉନି । ତେଣୁ ଏଥର ସ୍ଥାୟୀ ସମାଧାନ  କରାଯାଉ ବୋଲି ଶ୍ରୀ ସ୍ୱାଇଁ ଦାବି କରିଛନ୍ତି ।