ନୂଆଦିଲ୍ଲୀ,୬।୬: ଋଷ-ୟୁକ୍ରେନ୍ ଯୁଦ୍ଧକୁ ୨ ବର୍ଷରୁ ଅଧିକ ସମୟ ବିତିସାରିଛି। ଏପର୍ଯ୍ୟନ୍ତ ଅସ୍ତ୍ରଶସ୍ତ୍ରର ଅଭାବ କାରଣରୁ ୟୁକ୍ରେନ୍ ଋଷଠାରୁ ଯୁଦ୍ଧରେ ପଛୁଆ ରହିଛି। କିନ୍ତୁ ପାଶ୍ଚାତ୍ୟ ଦେଶର ଅସ୍ତ୍ରଶସ୍ତ୍ର ପ୍ରଦାନ କରିବା ପରେ ୟୁକ୍ରେନ୍ ପୁଣିଥରେ ଯୁଦ୍ଧ ଲଢିବାକୁ ଶକ୍ତି ପଯାଇଛି। ଋଷର ତୈଳ ବିଶୋଧନାଗାର ଓ ଇନ୍ଧନ ଡିପେ ଉପରେ ଡ୍ରୋନ୍ ଆକ୍ରମଣ କରି ଏହାକୁ ଉଡାଇ ଦେଇଛି।
ଟାର୍ଗେଟ କରାଯାଇଥିବା ଅଞ୍ଚଳର ଅଧିକାରୀମାନେ ଗୁରୁବାର ଏହି ସୂଚନା ଦେଇଛନ୍ତି। ଜେଲେନସ୍କି ଗୁରୁବାର ଫ୍ରାନ୍ସରେ ଡି-ଡେ ସ୍ମରଣୋତ୍ସବରେ ଆମେରିକା ରାଷ୍ଟ୍ରପତି ଜୋ ବାଇଡେନ୍ ସହିତ ବିଶ୍ବର ବହୁ ନେତାଙ୍କ ସହିତ ସାମିଲ ହୋଇଛନ୍ତି। ଶୁକ୍ରବାର ସେ ଫ୍ରାନ୍ସ ଅଧିକାରୀଙ୍କୁ ଭେଟିବେ। ଋଷ ରାଷ୍ଟ୍ରପତି ବ୍ଲାଡିମିର ପୁଟିନ୍ଙ୍କ ଚେତାବନୀର ଗୋଟିଏ ଦିନ ପରେ ଯାତ୍ରା କରିଛନ୍ତି ଜେଲେନସ୍କି।
ପୁଟିନ୍ କହିଥିଲେ ଋଷ ଅନ୍ୟ ଦେଶକୁ ଲମ୍ବା ଦୂରଗାମୀ ଅସ୍ତ୍ର ଯୋଗାଇପାରେ, ଯାହାଫଳରେ ପାଶ୍ଚାତ୍ୟ ଦେଶ ଉପରେ ଆକ୍ରମଣ କରିହେବ। ଏହି ଧମକ ସେତେବେଳେ ଆସିଥିଲା, ଯେତେବେଳେ ନାଟୋର ସହଯୋଗୀମାନେ କହିଥିଲେ, ଋଷ ଉପରେ ପାଶ୍ଚାତ୍ୟ ଦେଶର ହତିଆରରେ ୟୁକ୍ରେନ୍ ଆକ୍ରମଣ କରି ପାରିବ।
