ମୁମ୍ବାଇ,୨୫/୫:ବଲିଉଡ ଭାଇଜାନ ସଲମାନ ଖାନ। ତାଙ୍କର ୯୦ ଦଶକର ଚଳଚ୍ଚିତ୍ର 'ମେନେ ପ୍ୟାର କିୟା'ବେଶ୍ ଲୋକପ୍ରିୟତା ହାସଲ କରିଥିଲା । ଏହି ରୋମାଣ୍ଟିକ ଫିଲ୍ମରେ ସଲମାନଙ୍କ ସହ ଅଭିନେତ୍ରୀ ଭାଗ୍ୟଶ୍ରୀ ମୁଖ୍ୟ ଭୂମିକାରେ ଅଭିନୟ କରିଥିଲେ । ଫିଲ୍ମଟି ବକ୍ସ ଅଫିସରେ ସୁପର ହିଟ ହୋଇଥିଲା। ତେବେ ଫିଲ୍ମର ହିଟ ଗୀତ 'କବୁତର ଯା ଯା' ଶୁଟିଂ ସମୟରେ ଭାବ ବିହ୍ବଳ ହୋଇଥିଲେ ସଲମାନ । ଯାହାକୁ ନେଇ ଅଭିନେତା ନିକଟରେ ହେଲୋ ଇଣ୍ଡୋ ଆରବୀୟ ସହ ଏକ ସାକ୍ଷାତକାରରେ କହିଛନ୍ତି ।
୧୯୮୯ରେ ରିଲିଜ ହୋଇଥିବା 'ମେନେ ପ୍ୟାର କିୟା' ତାଙ୍କର ପ୍ରିୟ ଚଳଚ୍ଚିତ୍ର ମଧ୍ୟରୁ ଅନ୍ୟତମ ଥିଲା । ସେତେବେଳେ ସେ ମାତ୍ର ୨୩ ବର୍ଷର ହୋଇଥିଲେ । ତେଣୁ 'କବୁତର ଯା ଯା' ଗୀତର ସୁଟିଂ ସମୟ ତାଙ୍କ ପାଇଁ ସ୍ମରଣୀୟ ଥିଲା । ସେହି ସମୟରେ ସେ ଅନୁଭବ କରିଥଲେ ଯେ ଏହି ରୋଲ କେବଳ ତାଙ୍କ ପାଇଁ। ଏଥିପାଇଁ ବଡ ଚଳଚ୍ଚିତ୍ରର ମଧ୍ୟ ଅଭିନୟ କରିପାରିବାର ଆତ୍ମବିଶ୍ବାସ ଜାଗ୍ରତ ହୋଇଥିଲା। ଯାହାକୁ ନେଇ ତାଙ୍କ ଆଖିରେ ଖୁସିର ଲୁହ ତାଙ୍କ ଆଖିରେ ଆସିଥିବା କହିଥିଲେ ଅଭିନେତା।
ସୁରଜ ବରଯାତ୍ୟାଙ୍କ ନିର୍ଦ୍ଦେଶିତ ଫିଲ୍ମ 'ମେନେ ପ୍ୟାର କିୟା' ଫିଲ୍ମରେ ଅଭିନୟ କରିବାକୁ ସଲମାନଙ୍କୁ ଅନେକ ଅଡିସନ ଦେବାକୁ ପଡିଥିଲା। ଏହି ଚଳଚ୍ଚିତ୍ର ଗୀତଗୁଡିକର ଆଜି ମଧ୍ୟ ଲୋକପ୍ରିୟତା ରହିଛି। ୫୮ ବର୍ଷ ବୟସରେ ଅଭିନେତା ଆଜି ବି ଗୋଟେ ପରେ ଗୋଟେ ହିଟ ଫିଲ୍ମ ଦଉଛନ୍ତି । ନିଜର ଅଭିନୟ ମାଧ୍ୟମରେ ସମସ୍ତଙ୍କ ହୃଦୟରେ ରାଜ କରୁଛନ୍ତି ଅଭିନେତା । ସଲମାନଙ୍କୁ ଶେଷଥର ପାଇଁ 'ଟାଇଗର ୩'ରେ ଦେଖିବାକୁ ମିଳିଥିଲା । ତାଙ୍କୁ ଆଗାମୀ ଫିଲ୍ମ ସିକନ୍ଦରରେ ଦେଖିବାକୁ ମିଳିବ । ଯହାର ନିର୍ଦ୍ଦେଶନା ଦେଉଛନ୍ତି ଏଆର ମୁରଗଦାସ । ଏହି ଫିଲ୍ମ ଆସନ୍ତା ବର୍ଷ ଇଦ ଅବସରରେ ରିଲିଜ ହେବ ।
