ନୂଆଦିଲ୍ଲୀ,୨୯।୫: ଦିଲ୍ଲୀ ଦଙ୍ଗା ଓ ଦେଶଦ୍ରୋହ ମାମଲାରେ ଜେଏନ୍ୟୁର ପୂର୍ବତନ ଛାତ୍ର ନେତା ଶର୍ଜିଲ୍ ଇମାମଙ୍କୁ ମିଳିଲା ଜାମିନ୍। ଦିଲ୍ଲୀ ହାଇକୋର୍ଟ ବୁଧବାର ତାଙ୍କୁ ଜାମିନ ପ୍ରଦାନ କରିଛନ୍ତି। ହେଟ୍ ସ୍ପିଚ୍ ଦେବା ମାମଲାରେ ଶରଜିଲ୍କୁ ଗିରଫ କରାଯାଇଥିଲା। ପ୍ରାୟ ସାଢ଼େ ଚାରି ବର୍ଷ ପରେ ଶରଜିଲ୍ଙ୍କୁ ଜାମିନ ମିଳିଛି।
୧୩ ଡିସେମ୍ବର ୨୦୧୯ ରେ ଜାମିଆ ଇସଲାମିଆ ଓ ୧୬ ଡିସେମ୍ବର ୨୦୧୯ ରେ ଆଲିଗଡ ମୁସଲିମ୍ ବିଶ୍ବବିଦ୍ୟାଳୟରେ ଦେଇଥିବା ନିଜ ଭାଷଣକୁ ନେଇ ବିବାଦର ପରିସକୁ ଆସିଥିଲେ। ଆସାମ ଓ ଉତ୍ତରପୂର୍ବକୁ ଦେଶରୁ କାଟି ଅଲଗା କରିବାର ସେ ଧମକ ଦେଇଥିଲେ। ଯାହାକୁ ନେଇ ସାରା ଦେଶରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ଶରଜିଲ ବିରୋଧରେ ଦେଶର ବିଭିନ୍ନ ସ୍ଥାନରେ ଦେଶଦ୍ରୋହ ମାମଲା ରୁଜୁ ହୋଇଥିଲା। ଏହାପରେ ୨୦୨୦ ଜାନୁଆରୀ ୨୮ରେ ଶରଜିଲକୁ ଦିଲ୍ଲୀ କ୍ରାଇମବ୍ରାଞ୍ଜ ବିହାରର ଜେହେନାବାଦଠାରୁ ଗିରଫ କରିଥିଲା। ତାଙ୍କୁ ଏହି ମାମଲାରେ ୭ ବର୍ଷର ଜେଲ ଦଣ୍ଡାଦେଶ ମିଳିଥିଲା। ତେବେ ଏଥିରୁ ସାଢ଼େ ୪ ବର୍ଷ ସେ ଜେଲ୍ରେ କାଟି ସାରିଛନ୍ତି। ଏହାକୁ ଆଧାର କରି ସେ ଜାମିନ ଅବେଦନ କରିଥିଲେ।
ଫେବ୍ରୁଆରୀ ମାସରେ ଦିଲ୍ଲୀର କଡକଡଡୁମା କୋର୍ଟ ଶରଜିଲଙ୍କୁ ଆଇନଗତ ଜାମିନ ଦେବାକୁ ମନା କରିଦେଇଥିଲେ। ଏହି ରାୟକୁ ଚ୍ୟାଲେଞ୍ଜ କରି ସେ ହାଇକୋର୍ଟର ଦ୍ୱାରସ୍ଥ ହୋଇଥିଲେ। ନ୍ୟାୟମୂର୍ତ୍ତି ସୁରେଶ କୁମାର କେତ ଓ ନ୍ୟାୟମୂର୍ତ୍ତି ମନୋଜ ଜୈନଙ୍କ ଖଣ୍ଡପୀଠ ବୁଧବାର ଦୁଇ ପକ୍ଷର ଯୁକ୍ତି ଶୁଣିବା ପରେ ଶରଜିଲ୍ଙ୍କୁ ଜାମିନ୍ ପ୍ରଦାନ କରିଥିଲେ।
