ପୁରୀ,୨୩/୦୩: ଶ୍ରୀମନ୍ଦିର ନାଟମଣ୍ଡପ ମରାମତି ଶେଷ ହୋଇଛି । ନିର୍ଦ୍ଧାରିତ ସମୟ ପୂର୍ବରୁ ନାଟମଣ୍ଡପରେ ସୃଷ୍ଟି ଫାଟ ମରାମତି କରାଯିବା ସହ ଷ୍ଟେନଲେସ ଷ୍ଟିଲ ଭାରା ଦିଆଯାଇଛି । ଏନେଇ ଏଏସ୍‌ଆଇ ପୁରୀ ସର୍କଲ ଅଧିକାରୀ ସୂଚନା ଦେଇଛନ୍ତି । ଏହା ପରେ ରତ୍ନଭଣ୍ଡାର ମରାମତିକୁ ପ୍ରାଥମିକତା ଦିଆଯିବ ବୋଲି ସେ କହିଛନ୍ତି । 

ସୂଚନା ଥାଉକି, ହାଇକୋର୍ଟଙ୍କ ନିର୍ଦ୍ଦେଶକ୍ରମେ ଶ୍ରୀମନ୍ଦିର ପ୍ରଶାସନ ଓ ଏଏସ୍‌ଆଇ ନାଟମଣ୍ଡପ ମରାମତିକୁ ଗୁରୁତ୍ୱ ଦେଇଥିଲେ । ନାଟମଣ୍ଡପ ମରାମତି ନିମନ୍ତେ ଗତ ମାସ ୨୩ ତାରିଖରୁ ଚଳିତ ମାସ ୧୯ ତାରିଖ ପର୍ଯ୍ୟନ୍ତ ସ୍ୱତନ୍ତ୍ର ନୀତି ନିର୍ଘଣ୍ଟ ହୋଇଥିଲା । ପ୍ରତିଦିନ ଦିନ ଗୋଟାଏରୁ ସନ୍ଧ୍ୟା ୭ ପର୍ଯ୍ୟନ୍ତ ଏଏସ୍‌ଆଇକୁ ମରାମତି କାମ କରିବାକୁ ସ୍ୱତନ୍ତ୍ର ସମୟ ଦିଆଯାଇଥିଲା । ତେବେ ଏହି ସମୟଠାରୁ ସାମାନ୍ୟ ବିଳମ୍ବ ହୋଇଥିଲେ ହେଁ ମରାମତି କାମ ସରିଛି । 

୨୦୧୭ରେ ଏଏସ୍‌ଆଇ ଏହି କାମ ହାତକୁ ନେଇଥିଲା । ମାତ୍ର କାମ କରିନଥିଲା । ଏନେଇ ମାମଲା ହାଇକୋର୍ଟକୁ ଯାଇଥିଲା । ହାଇକୋର୍ଟ ଏଏସ୍‌ଆଇ ଓ ଶ୍ରୀମନ୍ଦିର ପ୍ରଶାସନ ଉପରେ ଅସନ୍ତୋଷ ପ୍ରକାଶ କରିଥିଲେ । ତୁରନ୍ତ କାମ ସାରିବାକୁ ନିର୍ଦ୍ଦେଶ ଦେଇଥିଲେ । ନାଟମଣ୍ଡପରେ ଫାଟ ଯୋଗୁଁ ପାଣି ଗଳିବା ସହ ଏହି ପୁରାତନ ଐତିହ୍ୟ କୀର୍ତ୍ତିରାଜି ଉପରେ ବିପଦ ବଢ଼ିଥିଲା । ସେପଟେ ନାଟମଣ୍ଡପ ସଂଲଗ୍ନ ରତ୍ନଭଣ୍ଡାର କାନ୍ଥର ଫାଟ ହୋଇଥିବା ଏଏସ୍‌ଆଇ ସୁପରିଣ୍ଟେଣ୍ଡେଣ୍ଟ କହିଛନ୍ତି ।