ବ୍ଲୋଏମ୍ଫଟନ,୩୦/୦୧: ଚଳିତ ୧୯ବର୍ଷରୁ କମ୍ ବିଶ୍ୱକପ୍ର ସୁପର ସିକ୍ସ ରାଉଣ୍ଡ୍ରେ ମଙ୍ଗଳବାର ଡିଫେଣ୍ଡିଂ ଚାମ୍ପିଅନ୍ ଭାରତ ଓ ନ୍ୟୁଜିଲାଣ୍ଡ ପରସ୍ପରକୁ ଭେଟିବେ । ପ୍ରାଥମିକ ରାଉଣ୍ଡ୍ରେ ଭାରତ ସମସ୍ତ ମ୍ୟାଚ୍ ଜିତି ଗ୍ରୁପ୍-ଏ’ ପଏଣ୍ଟ ତାଲିକାର ଶୀର୍ଷ ସ୍ଥାନ ଦଖଲ କରିଥିଲା । ନ୍ୟୁଜିଲାଣ୍ଡ ଗ୍ରୁପ୍-ଡି’ରେ ଖେଳିଥିବା ୩ଟି ମ୍ୟାଚ୍ରୁ ୨ଟି ବିଜୟ ସହ ମୋଟ୍ ୪ ପଏଣ୍ଟ ହାତେଇଥିଲା । ଏହି ଗ୍ରୁପ୍ରେ ପାକିସ୍ତାନ ସର୍ବାଧିକ ୬ ପଏଣ୍ଟ ହାସଲ କରିଥିଲା ।
ପୂର୍ବ ରେକର୍ଡକୁ ଦେଖିଲେ ଭାରତର ପଲା ଭାରି ରହିବ । ୧୯ବର୍ଷରୁ କମ୍ ବିଶ୍ୱକପରେ ନ୍ୟୁଜିଲାଣ୍ଡ ପୂର୍ବରୁ କେବେ ଭାରତକୁ ହରାଇ ନାହିଁ । ଏଥର ମଧ୍ୟ ଭାରତ ବେଶ୍ ଶକ୍ତିଶାଳୀ ଦଳ ଭାବେ ଉଭା ହୋଇଛି । ପ୍ରାଥମିକ ରାଉଣ୍ଡ୍ରେ ମୁସିର ଖାନ୍ ଓ ଆର୍ସିନ କୁଲକର୍ଣ୍ଣୀ ଶତକ ଅର୍ଜନ କରିସାରିଛନ୍ତି । ଆଦର୍ଶ ସିଂହ ମଧ୍ୟ ଦମ୍ଦାର ଅର୍ଦ୍ଧଶତକୀୟ ପାଳି ଖେଳିଛନ୍ତି ।
ଭାରତର ବୋଲିଂ ବିଭାଗ ବେଶ୍ ସନ୍ତୁଳିତ ରହିଛି । ବାମ ହାତି ପେସ୍ ବୋଲର ନମନ ତିୱାରୀ ଘାତକ ବୋଲିଂ କରି ୮ଟି ୱିକେଟ୍ ନେଇଛନ୍ତି । ସ୍ପିନର ସୌମ୍ୟ ପାଣ୍ଡେ ମଧ୍ୟ ୮ଟି ୱିକେଟ୍ ନେଇ ସାରିଛନ୍ତି । ନ୍ୟୁଜିଲାଣ୍ଡ ସେଭଳି ଆଖି ଦୃଶିଆ ପ୍ରଦର୍ଶନ କରିନାହିଁ । ମାତ୍ର ଭାରତକୁ ହରାଇ ବିପର୍ଯ୍ୟୟ ରଚନା କରିବାର କ୍ଷମତା ଦଳ ନିକଟରେ ରହିଛି । ଡାହଣ ହାତି ବ୍ୟାଟର ସ୍ନେହିତ ରେଡ୍ଡୀ ଓ ବୋଲର ମାଥ୍ୟୁ ରେୱେଙ୍କ ଉପରେ ଦଳ ନିର୍ଭର କରିବ ।
ଭାରତୀୟ ଦଳ: ଆର୍ସିନ କୁଲକର୍ଣ୍ଣୀ, ଆଦର୍ଶ ସିଂହ, ରୁଦ୍ର ମୟୂର ପଟେଲ, ସଚିନ ଢାସ୍, ପ୍ରିୟାଂଶୁ ମୋଲିୟା, ମୁସିର ଖାନ, ଉଦୟ ସହରନ୍ (ଅଧିନାୟକ), ଆରାଭେଲି ଅଭିନାଶ ରାଓ, ସୌମ୍ୟ କୁମାର ପାଣ୍ଡେ, ମୁରୁଗାନ ଅଭିଷେକ, ଇନ୍ନେଶ ମହାଜନ, ଧନୁଶ ଗୌଡ଼ା, ଆରାଧ୍ୟ ଶୁକ୍ଳା, ରାଜ ଲିମ୍ବାନି, ନମନ ତିୱାରୀ ।